ەرجان ەركىنبايەۆ الماتىنى 2023-2024 جىلدارى شىۇ-نىڭ مادەني جانە تۋريزم استاناسى رەتىندە بەكىتۋدى ۇسىندى.
17 ناۋرىزدا ءۇندىستاننىڭ ۆاراناسي قالاسىندا شانحاي ىنتىماقتاستىق ۇيىمى مەملەكەتتەرىنىڭ تۋريستىك اكىمشىلىكتەرى باسشىلارىنىڭ كەزدەسۋى ءوتتى. قازاقستاندىق دەلەگاسيانى ق ر مادەنيەت جانە سپورت ۆيسە-مينيسترى ەرجان ەركىنبايەۆ باسقاردى، دەپ حابارلايدى اlmaty-akshamy.kz مينيسترلىكتىڭ باسپا ءسوز قىزمەتىنە سىلتەمە جاساپ.
ءىس-شاراعا ءۇندىستان، جۇڭگو، قىرعىزستان، وزبەكستان، تاجىكستان، رەسەي مەن پاكىستان وكىلدەرى قاتىستى. تاراپتار شىۇ ەلدەرىندە تۋريزم سالاسىنداعى ىنتىماقتاستىقتى نىعايتۋعا جانە وسى يندۋستريانى بىرلەسىپ دامىتۋعا باعىتتالعان بىرنەشە قۇجاتقا قول قويدى.
ۆيسە-مينيستر ايتقان ۇسىنىستاردىڭ ءبىرى ءىرى حالىقارالىق ءىس-شارالار الاڭدارىندا، ونىڭ ىشىندە ءبىرىڭعاي ستەندتەردە شىۇ مەملەكەتتەرىنىڭ تۋريستىك الەۋەتىن ىلگەرىلەتۋدەگى كۇش-جىگەردى بىرىكتىرۋ بولدى. سونداي-اق ەرجان ەركىنبايەۆ الماتىنى 2023-2024 جىل ارالىعىندا شىۇ-نىڭ مادەني جانە تۋريستىك استاناسى ەتۋدى ۇسىندى.
«بۇگىنگى تاڭدا شىۇ ەلدەرىمەن بارلىق سالالاردا ىنتىماقتاستىقتى دامىتۋ مەن نىعايتۋدىڭ وڭ سەرپىنى بايقالادى، تۋريزم دە سولاردىڭ قاتارىندا. قازىرگى ۋاقىتتا قازاقستاندا ۆيزاسىز رەجيم 79 ەلدىڭ ازاماتتارى ءۇشىن جۇمىس ىستەيدى (شىۇ-عا مۇشە بارلىق مەملەكەتتەردى قوسا العاندا)، وسى ءتىزىمدى 100 ەلگە دەيىن جەتكىزۋ بويىنشا جۇمىس جۇرگىزىلۋدە، سونداي-اق 100-دەن استام اۋە جولدارى بويىنشا 30 مەملەكەتپەن تىكەلەي اۋە قاتىناسى بار»، - دەدى ەرجان ەركىنبايەۆ.
ايتا كەتۋ كەرەك، 2023 جىلدىڭ شىلدەسىنەن 2024 جىلدىڭ شىلدەسىنە دەيىن قازاقستان شانحاي ىنتىماقتاستىق ۇيىمىنا ءتوراعالىق ەتەدى.