الماتىلىقتار تاريحي جادىگەرلەردى تەگىن تاماشالاۋعا مۇمكىندىك الدى: الماتىدا «مۋزەي ءتۇنى» وتپەك
حالىقارالىق مۋزەي كۇنىنىڭ قارساڭىندا الماتى «مۋزەي ءتۇنى» دەگەن كەڭ كولەمدى اكسياعا دايارلىق جاساپ جاتىر. وندا كەلگەن قوناقتار ەرەكشە ەكسپوزيسياعا، تەاترلاندىرىلعان ەكسكۋرسياعا، «جۇلدىزدى مۋزەيدى»، كۆەستتەر مەن سپەكتاكلداردى تاماشالاپ، الاشتانۋشىلارمەن، وقىمىستى-عالىمدارمەن جۇزدەسىپ، پىكىر الماسپاق. وڭىرلىك كوممۋنيكاسيالار ورتالىعىندا وتكەن پرەسس-كونفەرەنسيادا وسى مادەني جاڭالىقتىڭ جاي-جاپسارى ايتىلدى، دەپ حابارلايدى aqshamnews.kz
1978 جىلدىڭ 18 مامىرىنان بەرى بۇكىل الەم مۋزەي قىزمەتكەرلەرىنىڭ كاسىبي مەرەكەسىن اتاپ ءوتىپ كەلەدى. «مۋزەي ءتۇنى» اكسياسى العاش رەت 1997 جىلى بەرليندە وتكەن. بۇل ءداستۇردى قازاقستان دا 2005 جىلدان باستاپ اتاپ وتە باستاپ، ءقازىر اكسيانى قىزىقتاۋعا قوناق كوپ كەلەتىن بولدى.
«الماتى – وتكەن تاريح پەن قازىرگى شاق استاسىپ جاتقان ەرەكشە قالا. «مۋزەي ءتۇنى» - بۇل ناعىز مادەني ساياحات دەسەك بولادى. وندا وتكەن تاريحقا كوز جۇگىرتىپ، ونەر الەمىمەن تانىسىپ، ويىندارعا قاتىسىپ قايتا الاسىز»، - دەيدى الماتىداعى مۋزەيلەر بىرلەستىگىنىڭ ديرەكتورى ءلاززات ساعىندىقوۆا.
18 مامىر كۇنى تاڭعى ساعات 10:00-دەن باستاپ ءتۇننىڭ ءبىر ۋاعىنا دەيىن جەتى بىردەي مۋزەي كەلگەن قوناقتاردى تەگىن قابىلداماق:
- الماتى مۋزەيى،
- ىقىلاس اتىنداعى حالىق اسپاپتارى مۋزەيى
- د.ا. قونايەۆ مۋزەيى،
- س. مۇقانوۆتىڭ مۋزەي-ۇيى
- ع. مۇسىرەپوۆتىڭ مۇزەي-ۇيى،
- احمەت بايتۇرسىن ۇلىنىڭ مۋزەي-ۇيى،
- مۋلتيمەديالىق ءداستۇرلى مۋزىكا ورتالىعى.
حالىقارالىق اكسيانىڭ اياسىندا الماتىلىقتار مەن قالا قوناقتارى وتە قىزىقتى باعدارلامامەن تانىسپاق. بىرلەستىكتىڭ قۇرامىنا كىرەتىن مۋزەيلەردە وسىعان وراي بىرنەشە ءىس-شارا وتەدى.
- تانىمدىق ينتەراكتيۆتى كۆەستتەر مەن ۆيكتورينالار؛
- مۋزەي ەكسپوناتتارىنا تەاترلاندىرىلعان ەكسكۋرسيا؛
- الماتى مۋزەيىندە – «جاڭا عاسىر» تەاترىنىڭ قويىلىمى، «الماتى –ماحابباتىم مەنىڭ»، س. مۇقانوۆتىڭ مۋزەيىندە «ءمولدىر ماحاببات» سپەكتاكلى، ع. مۇسىرەپوۆتىڭ مۋزەيىندە «قىز جىبەك ارياسى»، د. ا. قونايەۆ مۋزەيىندە «ادالدىق –اسىل قاسيەت» قويىلىمى وتەدى؛
- الماتى قالاسىنىڭ مۋزەيىندە (ەلينا التىنبەكوۆانىڭ «ايەل بەينەسى جانە قارعالى ديادەماسى» مەن ارحەولوگ مارات نۋرپەيسوۆتىڭ «ەجەلگى الماتى: مىڭجىلدىق قالاسى») بەلگىلى قازاقستاندىق رەستاۆراتورلار مەن ارحەولوگتار لەكسياسى وقىماق.
- مۋزەي بىرلەستىگىندەگى «مۋزەيگە تارتۋ» اكسياسىندا قالانىڭ ءار تۇرعىنى ۇيدەگى باعالى بۇيىمدى اكەپ تارتۋ ەتەدى.
- «جۇلدىزدى مۋزەي»؛
- اشىق اسپان استىنداعى فوتوكورمە مەن كينو كورسەتىلىم؛
- بەلگىلى ونەر جۇلدىزدارى قاتىساتىن كونسەرت (ەركەش حاسەن، ەرنار اماندىق، «الاتاۋ سەرىلەرى» توبى مەن ت.ب.)؛
- كەزدەسۋلەر (جازۋشىلارمەن، وقىمىستى-عالىمدارمەن، الاشتانۋشىلارمەن، د. قونايەۆتىڭ قىزمەتتەستەرى، تۋعان-تۋىستارىمەن)؛
- جاساندى جادتى قولدانعان فوتوزونا؛
- ساز اسپاپتارىن جاسايتىن قولونەرشىلەردىڭ شەبەرلىك ساباعى مەن ت.ب..
مەرەكەلىك باعدارلاما 16 مامىر كۇنى الماتى مۋزەيىندە ۆەنگريانىڭ باس كونسۋلدىعىمەن بىرلەسىپ قولعا العان «ماتو حالىق ونەرى – ۆەنگر مادەنيەتىنىڭ مۇراسى» اتتى حالىقارالىق كورمەنىڭ اشىلۋ سالتاناتىمەن باستالادى. بۇل كورمە قازاقستاندا العاش رەت وتكەلى وتىر.
«ءبىز كەلگەن قوناقتارعا «ماتو حالىق ونەرى – ۆەنگر مادەنيەتىنىڭ مۇراسى» اتتى ۇلكەن كورمە ۇسىنباقپىز. بۇل كورمە بىزدە العاش رەت ءوتىپ وتىر. ماتو كەستەلەۋ ونەرى يۋنەسكو-نىڭ ماتەريالدىق ەمەس مادەني مۇراسىنىڭ تىزىمىنە ەنگەن. الماتى مۋزەيى سونى العاش رەت حالىقتىڭ نازارىنا ۇسىنادى»، - دەدى، ءلاززات ساعىندىقوۆا.
اكسيانىڭ ەرەكشى جوبالارىنىڭ ءبىرى – التى بىردەي مۋزەيدى قامتىعان كۆەست-ويىن بولىپ وتىر. وعان بەلگىلى بلوگەرلەر اڭساعان سادىرحانوۆ (ansagaan) پەن عالىمجان جانقۇلوۆ (galaland_) كەلىپ قاتىسىپ، ولار وندا ارنايى تاپسىرمانى ورىندايدى.
كۆەستتەر، مۋزەيلىك پازلدار، اكۆاگريم سەكىلدى كىشكەنتاي قوناقتارعا ارنالعان اۋماقتار دا جۇمىس ىستەيدى وسى كۇنى.
ءىس-شارانىڭ سوڭىنا قاراي اكسياعا قاتىسقاندارعا برەند سىيلىقتار مەن سەرتيفيكاتتار تابىس ەتىلەدى. ودان كەيىن ەرەكشە كوزگە تۇسكەن مۋزەي قىزمەتكەرلەرىن ماراپاتتاۋ ءراسىمى بولىپ وتەدى.
الماتى قالاسىنداعى مۋزەيلەردىڭ بىرلەستىگى بارشا جۇرتتى ونەر، تاريح پەن جاڭا اسەرگە تولى وسى كۇندى بىرگە وتكىزۋگە شاقىرىپ وتىر. «مۋزەي ءتۇنى – 2025» كىمنىڭ بولسىن ەسىندە قالاتىن ەرەكشە وقيعا بولماق.