الماتى قۋىرشاق تەاترى گرۋزياداعى حالىقارالىق فەستيۆالدە جەڭىسكە جەتتى.
الماتى مەملەكەتتىك قۋىرشاق تەاترى قازاق قۋىرشاق ونەرىنىڭ حالىقارالىق دەڭگەيدەگى جوعارى مارتەبەسىن تاعى ءبىر رەت دالەلدەدى. تەاتر گرۋزيادا وتكەن ءىى Batumi International Puppet Theatre Festival حالىقارالىق قۋىرشاق تەاترلارى فەستيۆالىندە «ۇزدىك رەجيسسەر» نوميناسياسىن جەڭىپ الدى، دەپ حابارلايدى aqshamnews.kz.
بۇل فەستيۆالگە يتاليا، يسپانيا، برازيليا، فرانسيا، پولشا، گرۋزيا جانە قازاقستاننىڭ ۇزدىك تەاتر ۇجىمدارى ب ا ق سىناسقان.
فەستيۆالدى باتۋمي مەملەكەتتىك قۋىرشاق تەاترى مەن گرۋزيانىڭ قۋىرشاق تەاترلارىنىڭ بىرلەستىگى ۇيىمداستىردى. بايقاۋدا 13 سپەكتاكل كورسەتىلىپ، قازىلار القاسىنىڭ شەشىمىمەن باستى ماراپاتتار قازاقستان، يسپانيا جانە گرۋزيا تەاترلارىنا بەرىلدى.
الماتى قۋىرشاق تەاترى رەپەرتۋارىنداعى ەڭ ەرەكشە قويىلىمنىڭ ءبىرى – اعىلشىن دراماتۋرگى ۋيليام شەكسپيردىڭ ايگىلى تراگەدياسى نەگىزىندە قويىلعان «ماكبەت. يلليۋزيا» سپەكتاكلىن ۇسىندى. ەكسپەريمەنتالدى تۇردە قويىلعان قويىلىم ەرەسەك اۋديتورياعا ارنالعان، ول ءوزىنىڭ ەرەكشە ادىسىمەن اسەر قالدىردى. رەجيسسەر دينا جۇمابايەۆا، سۋرەتشى يۋليا چەرنوۆا جانە حورەوگراف اننا سوي كورەرمەندەردى ادامي ەموسيا مەن امبيسيالاردىڭ كۇردەلى الەمىنە بويلاتاتىن ەرەكشە ۆيزۋالدى ءارى پلاستيكالىق اتموسفەرا جاسادى. سپەكتاكلدە جاندى اكتەرلەر مەن قۋىرشاقتار قاتار ويناپ، قويىلىمعا ايرىقشا كوركەمدىك اسەر بەردى. كلاسسيكانى باتىل دا زاماناۋي ينتەرپرەتاسيالاعانى ءۇشىن بۇل قويىلىم «ۇزدىك رەجيسسەر» نوميناسياسىمەن ماراپاتتالدى.
بايقاۋ باعدارلاماسىنانبولەك، فەستيۆال قاتىسۋشىلار مەن كورەرمەندەرگە ەۋروپانىڭ جەتەكشى ماماندارىنان قۋىرشاق جۇرگىزۋ مەن اكتەرلىك شەبەرلىك دارىستەرىن ۇسىندى. باتۋمي قالاسىنىڭ ورتالىعىندا وتكەن الىپ قۋىرشاقتاردىڭ شەرۋى قالا تۇرعىندارى ءۇشىن ناعىز مەرەكەگە اينالدى. الماتى قۋىرشاق تەاترى ءۇشىن بۇل فەستيۆال شىعارماشىلىق تۇرعىدان تاجىريبە الماسۋ الاڭى عانا ەمەس، جاڭا جەتىستىكتەرگە شابىت بەرگەن ماڭىزدى ءىس-شارا بولدى.
ايتا كەتەيىك، الماتى مەملەكەتتىك قۋىرشاق تەاترى 2024 جىلى 2-7 شىلدە ارالىعىندا كانادادا وتكەن The First International Ottawa Puppet Theatre Festival حالىقارالىق قۋىرشاق تەاترلارى فەستيۆالىندە گران-پري جەڭىپ العان بولاتىن.