الماتىدا جاز مەزگىلى تاياپ، قالا تۇرعىندارى سۋ جىلىنۋىن كۇتپەستەن، شومىلۋ ماۋسىمىن باستاپ كەتتى.
وسى رەتتە قالالىق قۇتقارۋشىلار سۋداعى قاۋىپسىزدىكتى ساقتاۋعا شاقىرىپ، جاۋاپسىزدىقتىڭ ارتى اۋىر زارداپتارعا اكەپ سوعاتىنىن ەسكەرتتى. وتكەن جىلى كۇشەيتىلگەن پروفيلاكتيكالىق شارالار ناتيجەسىندە قالا سۋ ايدىندارىندا ادام ولىمىنە جول بەرىلمەدى، 17 ادام قۇتقارىلدى، ونىڭ ىشىندە 6-ۋى بالا (سايران كولىندە)، دەپ حابارلايدى Almaty-akshamy.kz.
وكق بريفينگىندە الماتى قالاسى تجد ازاماتتىق قورعانىس باسقارماسىنىڭ باسشىسى ءانۋار يۋسۋپوۆ ءوز ۇسىنىستارىن ايتتى.
«الماتى قالاسى مەن تاۋ بوكتەرىندەگى ايماقتاردا 44 سۋ قويماسى بار. بۇل وزەندەر، كولدەر، ارنالار، توعاندار، ونىڭ 12ء-سى سۋعا ءتۇسۋ ماۋسىمىندا تۇرعىندارعا ءقاۋىپ توندىرەدى»، - دەپ حابارلادى ءا. يۋسۋپوۆ.
سۋداعى جازاتايىم وقيعالاردىڭ الدىن الۋ ماقساتىندا دەپارتامەنتپەن پوليسيا قىزمەتكەرلەرى، ق ر ۇك اسكەري قىزمەتشىلەرى، قۇتقارۋ قىزمەتىنىڭ جانە رقجق قۇتقارۋشىلارى، سونداي-اق ەرىكتىلەرمەن بىرلەسىپ رەيدتىك ءىس-شارالار جۇرگىزەدى.
«ءبىز سۋ ايدىندارىنداعى قوعامدىق ءتارتىپتى بۇزعانداردىڭ بارلىعىن اكىمشىلىك جاۋاپكەرشىلىككە تارتامىز. ماسەلەن، وتكەن جىلى اكىمشىلىك كودەكستىڭ 440-بابى بويىنشا 63 ادامعا جالپى سوماسى 790 مىڭ تەڭگە ايىپپۇل سالىندى»، - دەپ قوستى ول.
قازىرگى ۋاقىتتا دەپارتامەنت ب ا ق ارقىلى اۋقىمدى ۇگىت-ناسيحات جۇمىستارىن جۇرگىزىپ، بارلىق ءبىلىم بەرۋ جانە دەنساۋلىق ساقتاۋ نىساندارىندا، حالىق كوپ شوعىرلاناتىن ورىنداردا (سوو، ءسۇ، حقكو، ۆوكزالدار، مەتروپوليتەن، كينوتەاترلار)، سونداي-اق الماتى قالاسىنىڭ جولدارى بويىندا ورنالاسقان سمارتبوردتار مەن LED – ەكرانداردا بەينەروليكتەر كورسەتىلىمدەرى بەلسەندى جۇرگىزىلۋدە. سايران كولىنىڭ بويىنداعى (باتىس جانە شىعىس) جانە قونايەۆ قالاسىنا شىعاتىن جولداعى بيلبوردتاردا «سۋداعى قاۋىپسىزدىك» تاقىرىبىندا ەلەكتروندى باننەرلەر ورناتىلدى.
تجد مالىمەتىنشە، الماتىدا بالالاردى ءجۇزۋ داعدىلارىنا ۇيرەتەتىن 56 ءجۇزۋ باسسەينى بار (وقۋ مەرزىمى 3 اي). سونىمەن قاتار، قالانىڭ جالپى ءبىلىم بەرەتىن مەكتەپتەرىنىڭ 6 باسسەينىندە وقۋ-جاتتىعۋ جۇمىستارى جۇرگىزىلەدى. بۇگىنگى تاڭدا 6 مىڭعا جۋىق بالا وقىتىلدى. ءجۇزۋدى ۇيرەتۋ بالالاردىڭ سۋداعى قاۋىپسىزدىك ەرەجەلەرىن ءبىلۋ دەڭگەيىن ارتتىرادى.
سونىمەن قاتار قالادا «دامۋ بالا» باعدارلاماسى ىسكە قوسىلىپ، وندا 3500 جۋىق بالا جۇزۋدەن تەگىن وقۋعا جازىلدى.
قۇتقارۋشى قالا تۇرعىندارى مەن قوناقتارىن سۋ ايدىندارىنداعى قاۋىپسىزدىك ەرەجەلەرىن ساقتاۋعا، سونداي-اق تىيىم سالىنعان جەرلەردە سۋعا تۇسپەۋگە شاقىردى. سۋعا ءتۇسۋ ماۋسىمىندا سۋعا تۇسۋگە تىيىم سالىنعان جەرلەردە 70 «سۋعا شومىلۋعا بولمايدى» بەلگىسى، سونداي-اق 11 اقپاراتتىق ستەند ورناتىلدى.