ماماندار اتا-انالاردى، بالالاردى سۋ ايدىنىنداعى تالاپتى بۇزباۋعا، كوشە مەن ۇيدەگى قاۋىپسىزدىك ەرەجەلەرىن ورىنداۋعا شاقىرادى.
اپاتتاردىڭ كوپشىلىگى جابدىقتالماعان سۋ قويمالارىندا ورىن الادى. الماتى قالاسىنىڭ تجد قىزمەتكەرلەرى تالاپتى ورىنداۋعا جانە ءقاۋىپ توندىرمەۋگە شاقىرادى، دەپ حابارلايدى Almaty-akshamy.kz.
وڭىرلىك كوممۋنيكاسيالار قىزمەتىنىڭ بريفينگىندە 9 ماۋسىمدا وتكەن الماتى قالاسى توتەنشە جاعدايلار دەپارتامەنتى باسشىسىنىڭ ورىنباسارى، پولكوۆنيك ەرلان الىبەكوۆ قالا تۇرعىندارىن سۋداعى قاۋىپسىزدىك ەرەجەلەرىن ساقتاۋدى، تىيىم سالىنعان ورىندارعا بارماۋدى ەسكەرتتى.
ەرلان الىبەكوۆ بارلىق قۇتقارۋشىلار قالا تۇرعىندارىنىڭ «جابايى» جاعاجايلار مەن دەمالىس ورىندارىنا بارۋىنا الاڭدايتىنىن ايتتى. ونىڭ ايتۋىنشا، كەيبىر جاعاجايلاردا سۋ اعىنى قاتتى، اعىمدار، تەرەڭدىكتىڭ كۇرت وزگەرۋىنە ىقپال ەتەتىن جارتاستار، سىنعان پليتالار مەن اينەك بولۋى مۇمكىن.
سپيكەر بۇگىندە الماتى قالاسىندا شومىلۋعا رۇقسات ەتىلگەن 4 ورىن بارىن ەسكە سالدى، ولار:
- سايران كولى – تولە بي كوشەسىنەن وڭتۇستىك باعىتتا 200 مەتر – المالى اۋدانى؛
- سايران كولى – تولە بي كوشەسىنەن پيرسكە دەيىن وڭتۇستىك باعىتتا 300 مەتر – اۋەزوۆ اۋدانى؛
- د. قونايەۆ اتىنداعى ۇاك – باۋم توعايى – تۇركسىب اۋدانى؛
- د. قونايەۆ اتىنداعى ۇاك – دەمالىس ايماعى گۇلدەر – جەتىسۋ اۋدانى.
«سايران» كولىنىڭ رۇقسات ەتىلگەن جەرلەرىندە شىعىس پەن باتىس جاعىنان بۋيكالار ورناتىلعان.
ۇلكەن الماتى كانالىنا (باۋم توعايى، گۇلدەر دەمالىس ايماعى قايتا قۇرۋعا بايلانىستى) وسى جىلى سۋ تولتىرۋ جوسپارلانباعان.
ەرلان الىبەكوۆتىڭ ايتۋىنشا، «جابايى» جاعاجايلاردا شومىلۋ قايعىلى وقيعالارعا اكەلۋى مۇمكىن ەكەنىن ەسكەرتتى. پولكوۆنيك اتا-انالاردىڭ جازعى دەمالىس كەزىندە بالالاردىڭ قاۋىپسىزدىگىنە جەتە نازار اۋدارۋدى ايتتى.
سپيكەر جىل سايىن الماتىنىڭ جاعاجايلارىندا ادام ءولىمىنىڭ ورىن الاتىنىن ەسكە سالدى. ەرلان الىبەكوۆتىڭ پىكىرىنشە، تاجىريبە مەن باقىلاۋعا قاراماستان قايعىلى وقيعالار ەرەجەنىڭ بۇزىلۋىنان بولادى.
پولكوۆنيك تج دەپارتامەنتىنىڭ قىزمەتكەرلەرى پوليسەيلەرمەن بىرلەسىپ كۇن سايىن ق ر اكىمشىلىك كودەكسنىڭ 440-بابى بويىنشا (سپيرتتىك ىشىمدىكتەر ءىشۋ نەمەسە قوعامدىق ورىنداردا ماس كۇيدە بولۋ) ءتارتىپ بۇزعانداردى اكىمشىلىك جاۋاپكەرشىلىككە تارتۋدا ءارى سۋ ايدىندارىنىڭ اۋماعىندا پاترۋلدەر كەزەكشىلىكتەرىن اتقارۋدا. جاز ماۋسىمىندا ءتارتىپ بۇزعان 15 ادامعا ايىپپۇل سالىندى.
الماتى قالاسىنىڭ سايران كولىندە قۇتقارۋ قىزمەتىنىڭ ماۋسىمدىق بەكەتى قويىلىپ، شومىلۋعا تىيىم سالاتىن 14 تاقتايشا ورناتىلدى. اۋەجاي كولىندە ستاسيونارلىق قۇتقارۋ بەكەتى جۇمىس ىستەيدى. سونداي-اق وسى جازدا الماتى سۋ ايدىندارىندا قۇتقارۋشىلار، سۋدا قۇتقارۋ جاساعىنىڭ قىزمەتكەرلەرى، پوليسيا قىزمەتكەرلەرى مەن ق ر ۇلتتىق ۇلانىنىڭ №5571 «وڭتۇستىك» ءبولىمىنىڭ اسكەري قىزمەتشىلەرى كەزەكشىلىك ەتەدى. ەندى قۇتقارۋشىلار تەك قايىقتاردا عانا ەمەس، دروننىڭ كومەگىمەن قاۋىپسىزدىكتى قاداعالايتىن بولادى.
ەرلان الىبەكوۆ سۋ ايدىندارىندا ساقتالۋى ءتيىس بىرنەشە تالاپتاردى ايتتى.
«رۇقسات ەتىلگەن جەردە عانا شومىلىڭىز، جاعالاۋدىڭ قورشاۋ بەلگىلەرى مەن بۋيكالارىنان الىس جۇزۋگە بولمايدى. ەگەر ءسىز رۇقسات ەتىلگەن جەردە شومىلساڭىز، بەلدەن جوعارى سۋعا تۇسپەڭىز. بالالاردى قاراۋسىز قالدىرماڭىز. قايىقتاردان، كوپىرلەر مەن ايلاقتاردان سۋعا سەكىرمەڭىز. تۇنگى ۋاقىتتا، تاۋ وزەندەرىندە ماس كۇيىندە شومىلماڭىزدار»، – دەپ ەسكەرتەدى الماتى تجد باستىعىنىڭ ورىنباسارى.
ءوز كەزەگىندە الماتى قالاسى ءبىلىم باسقارماسىنىڭ ادامگەرشىلىك-رۋحاني تاربيە مەن ءوزىن-وزى تانۋ ءبولىمىنىڭ باسشىسى نۇرگۇل تاۋ اتا-انالاردى بالالاردى سۋ ايدىنىنداعى تالاپتى بۇزباۋعا، كوشە مەن ۇيدەگى قاۋىپسىزدىك ەرەجەلەرىن ورىنداۋعا شاقىرادى.