قوعامدىق كەڭەستەر اتقارار ءرولى زور، ولار دەموكراتيالىق قۇندىلىقتاردى ناسيحاتتاۋ قۇرالى رەتىندە ارەكەت ەتەدى. الماتى قالاسىنىڭ وكق الاڭىندا وتكەن بريفينگتە قوعامدىق كەڭەس مۇشەلەرى حالىق جانە مەملەكەتتىك ورگاندارىمەن جۇمىسى ايتىپ ءوتتى، دەپ حابارلايدى almaty-akshamy.kz.
الماتى قالاسى قوعامدىق كەڭەسىنىڭ كوممۋنالدىق ينفراقۇرىلىم، ۇتقىرلىق، ەكولوگيا، قارجى، اكتيۆتەر جانە قاۋىپسىزدىك جونىندەگى №1 كوميسسياسىنىڭ ءتوراعاسى بوريس جاپاروۆ كەڭەستىڭ جۇمىسى ارقىلى ازاماتتاردىڭ ماڭىزدى ماسەلەلەردى شەشۋ پروسەسىنە قاتىسۋعا مۇمكىندىگى بار ەكەنىن ايتتى.
“ءبىز ءۇشىن ماڭىزدى ماسەلە قالا بيلىگى قابىلدايتىن شەشىمدەردىڭ تيىمدىلىگىن قامتاماسىز ەتۋ. سوندىقتان نەعۇرلىم حالىق، تۇرعىندار شەشىم قابىلداۋ پروسەسسىنە قاتىسىپ، باقىلاۋ مۇمكىندىگىنە يە بولسا، سوعۇرلىم ءبىز دەموكراتيالىق ماقساتتارعا جاقىندايتىن بولامىز. الماتى قالاسى قوعامدىق كەڭەسى 2016 جىلدان بەرى جۇمىس ىستەيدى جانە ونىڭ نەگىزگى ماقساتى تەك الماتىدا عانا ەمەس، ەلىمىزدىڭ باسقا وڭىرلەرىندە ازاماتتار اراسىندا دەموكراتيا قۇندىلىقتارىن دامىتۋ بولىپ تابىلادى"، - دەپ اتاپ ءوتتى ب. جاپاروۆ.
قوعامدىق كەڭەستىڭ قۇرامىنا 5 كوميسسيا كىرەدى، ولاردىڭ قۇرامىندا 7-دەن 10-عا دەيىن مۇشە بار. اتاپ وتىلگەندەي، كوميسسيانىڭ الدىنا قويىلعان مىندەتتەردى ولاردىڭ مۇشەلەرىنىڭ كۇشىمەن عانا ورىنداۋ مۇمكىن ەمەس، سوندىقتان ولاردىڭ مۇمكىندىكتەرىن كەڭەيتۋ ءۇشىن ارنايى كوميتەتتەر، جۇمىس جانە ساراپتامالىق توپتار قۇرىلىپ، سونىمەن قاتار قالانىڭ بەلسەندى تۇرعىندارى تارتىلادى.
“مىسالى، الماتى قالاسىنداعى قوعامدىق ترانسپورت ماسەلەسى ءبارىمىزدى تولعاندىرىپ وتىرعان وزەكتى ماسەلە. قالا تۇرعىندارىنان وسى ماسەلە بويىنشا كوپتەگەن ۇسىنىستار، ارىز-شاعىمدار كەلىپ تۇسەدى. وسى جانە باسقا دا ماسەلەلەردى شەشۋ ءۇشىن ءبىز قالالىق موبيلدىلىك باسقارماسىمەن بىرلەسىپ جۇمىس ىستەيمىز، ولاردى ىسكە اسىرۋ ءبىزدىڭ نەگىزگى قىزمەتىمىز دەپ ايتۋعا بولادى. سونداي-اق، قوعامدىق ءتارتىپ، سىبايلاس جەمقورلىققا قارسى كۇرەس، ەكولوگيا جانە ت.ب. ماسەلەلەرىن اتاپ وتۋگە بولادى. بيىلدان باستاپ، قالا جۇرتشىلىعىن سىبايلاس جەمقورلىققا قارسى كۇرەسكە تارتۋ ماقساتىندا قوعامدىق كەڭەس ق ر سىبايلاس جەمقورلىققا قارسى ءىس - قيمىل اگەنتتىگىنىڭ الماتى قالاسى بويىنشا دەپارتامەنتىمەن بىرلەسىپ ءىس-قيمىل جوسپارىن ازىرلەدى"، - دەپ تولىقتىردى ب. جاپاروۆ.
كوپتەگەن ماسەلەلەرمەن قاتار جاستار ماسەلەلەرى دە نازاردان تىس قالمايدى، بۇل باعىتتا قوعامدىق كەڭەستىڭ قوعامدىق دامۋ، ءدىن، مادەنيەت، سپورت جانە جاستار ءىسى جونىندەگى №4 كوميسسياسى اينالىسادى.
"الماتىدا 680 مىڭنان استام جاستار تۇرادى. قانداي پروبلەمالار تۋىندايدى، ەڭ الدىمەن، ارينە، ناشاقورلىق، قۇمار ويىندار جانە ت.ب. جاستار ساياساتى جونىندەگى كوميسسيانىڭ ساراپشىلارى ۇكىمەت پەن ماجىلىسكە وسى ماسەلەلەردى شەشۋ جونىندە ۇسىنىستار جولدادى. سونىمەن قوسا، بۇگىندە ءبىز سپورت نىساندارى مەن الاڭدارىنا مونيتورينگ جۇرگىزۋدەمىز. سوڭعى ءتورت ايدا كوميتەت مۇشەلەرى بالالار مەن جاسوسپىرىمدەر سپورت مەكتەپتەرىن، اۋلالارداعى ويىن الاڭدارىن تەكسەرۋدە. ناتيجەسىندە بارلىق ەسكەرتۋلەر مەن ۇسىنىستار قالالىق اكىمدىككە، قاجەت بولعان جاعدايدا سپورت مينيسترلىگىنە دە جولداناتىن بولادى"،- دەپ اتاپ ءوتتى كوميسسيا ءتوراعاسى نۇرجان جاقىپوۆ.
ودان بولەك، مادەنيەت جونىندەگى كوميسسيا تاريحي-مادەني مۇرا وبەكتىلەرىنە مونيتورينگ جۇرگىزۋدى جوسپارلاپ وتىرعانى اتالدى.