جىل سايىن سەل ءقاۋپى كەزەڭدە «قازسەلدەنقورعاۋ» ماماندارى كىشى جانە ۇلكەن الماتى، قارعالى جانە اقساي وزەندەرىنىڭ باسسەيندەرىندە اسا ءقاۋىپتى مۇزداق كولدەردى سۋدان بوساتۋ بويىنشا الدىن الۋ جۇمىستارىن جۇرگىزۋدە.
مۇزداق كولدەردەن جينالعان سۋدى وزدىگىنەن اعىزۋ ءۇشىن سيفوندى قۇبىرلار سالىنىپ، سۋ اعىزۋ ارنالارى تەرەڭدەتىلىپ، ونىمدىلىگى جوعارى سورعىلار ورناتىلادى، دەپ حابارلايدى almaty-akshamy.kz.
توتەنشە جاعدايلار مينيسترلىگىنىڭ مالىمەتىنشە، اتالعان جۇمىستاردى جۇرگىزۋ ءۇشىن قالا اكىمىنىڭ قولداۋىمەن جەرگىلىكتى بيۋدجەتتەن، سونىمەن قاتار 1000-نان استام مەتر پوليەتيلەن قۇبىرلارىن ساتىپ الۋ جانە ولاردى ورناتۋ، مۇزداق كولدەردىڭ ەۆاكۋاسيالىق ارنالارىن تازارتۋ جانە تەرەڭدەتۋ جۇمىستارىنا قارجى ءبولىندى.
بيىلعى جىلى الماتى قالاسى ءۇشىن سەل ءقاۋپىن تۋدىراتىن كىشى جانە ۇلكەن الماتى، اقساي وزەندەرى باسسەيندەرىىڭ 6 اسا ءقاۋىپتى مۇزداق كولىندە (اقساي وزەنىنىڭ باسسەينىندە №8، №9، №10 كولدەر،ۇلكەن الماتى باسەينىندە: №10، № 13 كولدەر، كىشى الماتى: №6 كولى) سۋدان بوساتۋ بويىنشا الدىن الۋ جۇمىستارىن جۇرگىزۋ جوسپارلانۋدا.
ءقاۋىپتى مۇزداق كولدەردى بوساتۋ بويىنشا الدىن الۋ جۇمىستارى اعىمداعى جىلدىڭ قىركۇيەك ايىنىڭ سوڭىنا دەيىن جالعاساتىن بولادى.
سەل ءقاۋپىن كۇندەلىكتى باقىلاۋ ءۇشىن قوسىمشا 13 بەكەت اشىلدى، «قازسەلدەنقورعاۋ» مەكەمەسىنىڭ بازاسىندا شۇعىل جۇمىستاردى جۇرگىزۋ ءۇشىن اۆاريالىق بريگادا قۇرىلدى (34 ادام جانە 19 ارنايى تەحنيكا).
سەل احۋالى ءمينيستردىڭ جەكە باقىلاۋىندا. سونىمەن قاتار تجم داعدارىس جاعدايلارىندا باسقارۋ ورتالىعىندا سەل احۋالىنا تاۋلىك بويى مونيتورينگ جۇرگىزىلەدى.