الماتى قالاسى №7 قالالىق كلينيكالىق اۋرۋحاناسىنىڭ نەيروحيرۋرگ-دارىگەرلەرى ونكولوگيالىق اۋرۋى بار، ومىرتقاعا زاقىم كەلتىرگەن جانە اۋىر نيەۆرولوگيالىق جەتىسپەۋشىلىك ءقاۋپى بولعان ناۋقاسقا جوعارى تەحنولوگيالىق وپەراسيانى ءساتتى جاسادى.
51 جاستاعى ناۋقاس ومىرتقانىڭ كەۋدە بولىگىندەگى قاتتى اۋىرسىنۋ جانە اياقتارىنىڭ جانسىزدانۋ شاعىمدارىمەن ەمدەلۋگە جاتقىزىلعان. تەسكەرۋ بارىسىندا ومىرتقانىڭ مەتاستازدى كولەمدى ءتۇزىلىسى – بۇيرەك ءۇستى بەزىنىڭ قاتەرلى ىسىگىنىڭ ەكىنشى وشاعى دياگنوزى قويىلدى. پايدا بولعان ىسىك جۇلىندى قىسىپ، ناۋقاستىڭ سال بولىپ قالۋ ءقاۋپىن تۋدىرعان.
پاتولوگيا ومىرتقانىڭ جوعارعى كەۋدە بولىگىندە ورنالاسقان – بۇل اناتوميالىق جاعىنان كۇردەلى جانە اعزاداعى وتە فۋنكسيونالدىق ماڭىزدى اۋماق، بۇل اۋماققا كەز كەلگەن حيرۋرگيالىق ارالاسۋ جۇلىن مەن ونىڭ وتكىزگىش جولدارىنا زاقىم كەلتىرۋ ءقاۋپىن ارتتىرادى.
اسا كۇردەلى، بىرەگەي وپەراسيانى جاساعان №7 قالالىق كلينيكالىق اۋرۋحانانىڭ ديرەكتوردىڭ ۇيىمداستىرۋ ادىستەمەلىك جۇمىس جونىندەگى ورىنباسارى، نەيروحيرۋرگ، مەديسينا عىلىمدارىنىڭ كانديداتى، قاۋىمداستىرىلعان پروفەسسور مارات امانگەلدى الييەۆتىڭ ايتۋىنشا، حيرۋرگيالىق ەمدەۋ كەشەندى جانە كوپ كەزەڭدى سيپاتتا بولدى جانە ءبىر وپەراسيا شەڭبەرىندە جاسالدى.
«ءبىرىنشى كەزەڭدە ءبىز جۇلىندى ىسىكتەن بوساتۋ ماقساتىندا ومىرتقانىڭ لامينەكتومياسىن جاسالدى. سودان كەيىن، وپەراسيالىق ميكروسكوپتى قولدانىپ، جۇلىننىڭ كولەمدى ىسىگىن ميكروحيرۋرگيالىق جولمەن الدىق. ارالاسۋدىڭ نەگىزگى ەلەمەنتى ينتراوپەراسيالىق نەيروفيزيولوگيالىق مونيتورينگتى پايدالانۋ بولدى، ول ناقتى ۋاقىت رەجيمىندە جۇلىننىڭ فۋنكسيونالدىق جاعدايىن باقىلاۋعا جانە نيەۆرولوگيالىق اسقىنۋ ءقاۋپىن ازايتۋعا مۇمكىندىك بەردى. ومىرتقانىڭ زاقىمدانۋىن جانە ومىرتقانىڭ تىرەك فۋنكسياسىنىڭ بۇزىلۋىن ەسكەرە وتىرىپ، كەلەسى كەزەڭدە ترانسپەديكۋليارلى فيكساسيا ادىسىمەن ومىرتقا سەگمەنتىن تۇراقتاندىرۋ جۇرگىزىلدى. ومىرتقانىڭ بەرىكتىگى مەن كوتەرگىش قابىلەتىن قالپىنا كەلتىرۋ ءۇشىن ۆەرتەبروپلاستيكا جاسالدى"، - دەپ اتاپ ءوتتى پروفەسسور مارات الييەۆ.
وپەراسيا قورىتىندىسى بويىنشا وڭ كلينيكالىق-فۋنكسيونالدىق ناتيجەگە قول جەتكىزىلدى. وپەراسيادان كەيىنگى كەزەڭ اسقىنۋلارسىز ءوتتى.
پاسيەنتتىڭ جاعدايى ايتارلىقتاي جاقساردى، جۇلىنعا تۇسكەن قىسىم جويىلدى، اۋىرسىنۋ سەزىمدەرى ەداۋىر ازايدى، سەزىمتالدىق قالپىنا كەلتىرىلدى. قوزعالىس ساقتالعان، جۇيكە جۇيەسى جاعىنان ناشارلاۋ بەلىگەلەرى جوق.
قايتالاپ تەكسەرۋ نايجەلەرىنەن وپەراسيانىڭ ءساتتى وتكەنىن كورۋگە بولادى: ومىرتقا نىق بەكىتىلگەن، بارلىق ەلەمەنتتەر دۇرىس ورنالاسقان، تۇراقتىلىقتىڭ قايتا بۇزىلۋى نەمەسە ومىرتقا بۋىنتىقتارىنىڭ ىعىسۋى بەلگىلەرى انىقتالمادى.
وسىلاي جوعارى كاسىبي دەڭگەيدە جاسالعان حيرۋرگيالىق ەمدەۋ ومىرگە ءقاۋىپتى جاعدايدى جويىپ قانا قويماي، ومىرتقانىڭ تۇراقتىلىعىن قالپىنا كەلتىردى، بۇل پاسيەنتتىڭ قيمىل-قوزعالىسىنا جانە ودان ءارى ەرتە وڭالۋىنا جاعداي جاسالدى.