قاسيەتتى رامازان ايى بيىل 23 ناۋرىزدا باستالادى
الماتى قالاسىندا باس ءمۇفتي ناۋرىزباي قاجى تاعان ۇلىنىڭ توراعالىعىمەن قمدب جانىنداعى ساراپشىلار كەڭەسىنىڭ IV ءماجىلىسى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
"وزدەرىڭىز جاقسى بىلەسىزدەر، جۋىردا مەملەكەت باسشىسى قاسىم-جومارت توقايەۆ حالقىمىزدىڭ دۇنيەتانىمىنا ساي ءداستۇرلى يسلامدى دارىپتەۋ اسا ماڭىزدى ەكەنىن، وسكەلەڭ ۇرپاقتىڭ رۋحاني تاربيەسىن نازاردان تىس قالدىرۋعا بولمايتىنىن ەرەكشە اتاپ ءوتتى. اللاعا شۇكىر، قازاقستان مۇسىلماندارى ءدىني باسقارماسى ءداستۇرلى يسلامدى ناسيحاتتاۋدا، جاستاردى ىزگىلىككە تاربيەلەۋدە ءونىمدى ەڭبەك ەتىپ كەلەدى. سىزدەر دە ورتاق ىسكە اتسالىسىپ، بەلسەندىلىك تانىتىپ كەلەسىزدەر. اللا رازى بولسىن! ەندىگى ماقسات - جىل باسىندا جوسپارلانعان جۇمىستارىمىزدى جۇيەلى تۇردە جۇزەگە اسىرۋ"، - دەدى باس ءمۇفتي ناۋرىزباي قاجى تاعان ۇلى.
ءماجىلىس جۇمىسىندا قمدب-نىڭ رۋحاني، ءدىني، ۇلتتىق قۇندىلىقتاردى ناسيحاتتاۋداعى ءرولى، قمدب-نىڭ 2023-2027 جىلدارعا ارنالعان ستراتەگيالىق دامۋ باعدارلاماسى، رەسپۋبليكالىق جانە جەرگىلىكتى اقپاراتتىق-ناسيحات توبى مۇشەلەرىنە ارنالعان قۇجاتتاردىڭ جوبالارى تالقىلاندى.
ەسكە سالايىق، قاسيەتتى رامازان ايى بيىل 23 ناۋرىزدا باستالادى. ايلاردىڭ سۇلتانى سانالعان 30 كۇندە جاماعات اۋىز بەكىتىپ، ورازا تۇتادى. ال قاسيەتتى ءقادىر ءتۇنى ءساۋىردىڭ 17-نەن 18-نە قاراعان تۇنگە ءتۇسىپ تۇر. 21 ءساۋىر – ورازا ايتتىڭ ءبىرىنشى كۇنى.