الماتى قالاسىندا قار تازالاۋ جۇمىستارى ءجۇرىپ جاتىر

1300 توننا كوكتايعاققا قارسى ماتەريال پايدالانىلدى

27 جەلتوقسان كۇنى ساعات 02.00-دە الماتى قالاسىنىڭ تومەنگى اۋداندارىندا قار جاۋا باستادى. تاڭعى ساعات 07.00-دە 5 سم-گە دەيىن قار ءتۇستى، دەپ حابارلايدى Almaty-akshamy.kz. 

الماتى قالاسى تۇرعىن ءۇي ساياساتى باسقارماسىنىڭ مالىمەتىنشە، كوكتايعاقتىڭ الدىن الۋ ماقساتىندا قار جاۋا سالىسىمەن جولدارعا كوكتايعاققا قارسى ماتەريالدار سەبىلگەن. 1300 توننا كوكتايعاققا قارسى ماتەريال پايدالانىلىپتى.

«تروتۋارلاردى، جاياۋ جۇرگىنشىلەر ايماقتارىن، قوعامدىق كولىك ايالدامالارىن، ورتاق پايدالانۋ ورىندارىن تازالاۋ بويىنشا جۇمىستار ۇيىمداستىرىلدى.
تەحنيكانىڭ شىعۋى 501 بىرلىكتى قۇرايدى، ونىڭ ىشىندە 195 قۇمشاشقىش جانە 338 جول جۇمىسشىسى. تاڭەرتەڭنەن باستاپ 526 بىرلىك ارنايى تەحنيكا، 174 قۇمشاشقىش جانە 1340 جول جۇمىسشىسى شىعارىلادى دەپ جوسپارلانعان»، - دەلىنگەن حابارلامادا.

اۋدان اكىمدىكتەرى مەن قالا اكىمدىگىندە قار تازالاۋ جۇمىستارىنىڭ ءوندىرىسىن باقىلاۋ بويىنشا تاۋلىك بويى كەزەكشىلىك ۇيىمداستىرىلدى.
"قازگيدرومەتتىڭ" بولجامى بويىنشا، ارالاس جاۋىن-شاشىن تۇستەن كەيىن توقتايدى. اۋا تەمپەراتۋراسى بۇگىن كۇندىز 0، -2 گرادۋس، كۇننىڭ ەكىنشى جارتىسىندا ودان ءارى تومەندەيدى.