ءبىلىم سالاسى - نازاردا
ى.التىنسارين اتىنداعى №159 گيمنازيادا ق ر پارلامەنتى ءماجىلىسىنىڭ دەپۋتاتى جۇلدىز سۇلەيمەنوۆا، مەدەۋ اۋدانىنىڭ اكىمى اسەت ماسابايەۆ، اباي اتىنداعى قازۇپۋ رەكتورى دارحان ءبىلالوۆ جانە ءبىلىم باسقارماسىنىڭ وكىلدەرى قالا مەكتەپتەرىنىڭ ديرەكتورلارىمەن كەزدەسۋ وتكىزدى، دەپ حابارلايدى Almaty-akshamy.kz
ج.سۇلەيمەنوۆا مەن ا.ماسابايەۆ پارلامەنتتىڭ زاڭ شىعارۋ قىزمەتى جانە ق ر پرەزيدەنتىنىڭ دەپۋتاتتىق كورپۋسقا ەلدەگى ءبىلىم بەرۋگە قاتىستى تاپسىرمالارى تۋرالى قىسقاشا باياندادى. كەزدەسۋ بارىسىندا پەداگوگيكالىق كادرلاردىڭ جەتىسپەۋشىلىگى، ينكليۋزيۆتى ءبىلىم بەرۋ ماسەلەلەرى، مۇعالىمدەردىڭ كاسىبي دەڭگەيىن ارتتىرۋ، وقۋلىقتاردىڭ ساپاسى، قالا مەن اۋىل اراسىنداعى ءبىلىم بەرۋ سالاسىنداعى الشاقتىقتى جويۋ تۋرالى وزەكتى ماسەلەلەر تالقىلاندى.
رەكتور دارحان ءبىلالوۆ مەكتەپ ديرەكتورلارىنا ءبىلىم سالاسىن دامىتۋعا قوسقان ۇلەستەرى، سونداي-اق اباي ۋنيۆەرسيتەتىنىڭ ستۋدەنتتەرى مەن تۇلەكتەرىنىڭ بىلىكتىلىگىن ارتتىرىپ، ولاردى جۇمىسقا ورنالاستىرۋعا قولعابىس ەتكەندەرى ءۇشىن العىسىن ءبىلدىردى. ق ر بعم پەداگوگيكالىق ءبىلىم بەرۋ سالاسىندا كەلەسى وزەكتى ماسەلەلەرگە اسا نازار بولەتىنى اتاپ ءوتىلدى، ولار: كادر تاپشىلىعى، قالالىق جانە اۋىلدىق مەكتەپتەر دەڭگەيىندەگى الشاقتىق، پەداگوگتاردىڭ مارتەبەسى مەن ولاردىڭ بىلىكتىلىگىن ارتتىرۋ. ول Abai University-نە جۇكتەلگەن مىندەتتەردىڭ ءبىرى – ناقتى ءبىلىم بەرۋ باعدارلامالارىن ازىرلەۋدىڭ ماڭىزدىلىعىن العا تارتتى. ونىڭ ايتۋىنشا، بۇل جۇمىس ءۇش نەگىزگى باعىت بويىنشا جۇزەگە اسىرىلۋدا: يننوۆاسيالىلىق، پراكتيكاعا باعدارلانۋ جانە بەلسەندى قاتىسۋ، سونداي-اق، ولاردىڭ ءارقايسىسىنا جەكە توقتالىپ ءوتتى.
رەكتور مەكتەپتەرمەن بايلانىستى نىعايتۋ جونىندەگى جوسپارلارىمەن ءبولىستى. ماسەلەن، «ۋنيۆەرسيتەت - مەكتەپ» جوباسى تاراپتاردىڭ تىكەلەي (مەكتەپ مۇعالىمدەرىن ساپالى دايارلاۋ) جانە جاناما (ءبىلىم دەڭگەيى جوعارى مەكتەپ تالاپكەرلەرىن دايارلاۋ) ءوزارا بايلانىسىن كەڭەيتۋگە نازار اۋدارىلاتىن بولادى. بۇل باعىتتاعى جۇمىستار Abai University تاجىريبەسىندە جوعارى كاسىبي جانە ءتيىمدى مەنەدجەرلەردىڭ، تالانتتى كوشباسشى-باسشىلاردىڭ كادرلىق رەزەرۆىن قالىپتاستىرۋ، دۋالدى جانە ينكليۋزيۆتى ءبىلىم بەرۋدى دامىتۋدى قامتيدى.
جوعارى وقۋ ورنىنىڭ قاتىسۋى الماتى قالاسى مەن جالپى ەلىمىزدىڭ ءبىلىم بەرۋ سالاسىنداعى ماسەلەلەردى شەشۋگە باعىتتالعان. ەلىمىزدىڭ مەكتەپتەرىن تابىستى جاس ۇستازدارمەن قامتاماسىز ەتۋ ماقساتىندا ۋنيۆەرسيتەت الەمنىڭ كوپتەگەن ۋنيۆەرسيتەتتەرىندە قولدانىلىپ جۇرگەن جاڭا «Honors College» جوباسىن ازىرلەۋدە. جوبانىڭ ماقساتى – پەداگوگيكالىق ماماندىقتار بويىنشا ءبىلىم الۋشى ستۋدەنتتەرگە قاجەتتى قۇزىرەتتىلىكتەر، تەرەڭ ءبىلىم مەن داعدىلار بەرۋ. سونداي-اق، رەكتور ءبىلىم بەرۋ ساپاسىن ارتتىرۋ جانە جوعارى كاسىبي مۇعالىمدەردى دايارلاۋدى جاقسارتۋ بويىنشا قىزىقتى ۇسىنىستارىمەن ءبولىستى.
كەزدەسۋ سوڭىندا دەپۋتات جۇلدىز سۇلەيمەنوۆا پىكىر الماسۋ مەن ۇسىنىستاردىڭ وتە پايدالى ەكەنىن جانە العا قويىلعان ماسەلەلەردى شەشۋگە بار كۇشىن سالاتىنىن اتاپ ءوتتى.