الماتى قالاسى اكىمىنىڭ ورىنباسارى ابزال نۇكەن ۇلى «Alatau Aqparat» مەدياحولدينگىنە ارناي اتباسىن بۇرىپ، جۇمىسىمەن تانىسىپ، قىزمەتكەرلەرىمەن تىلدەستى.
مەدياحولدينگتىڭ باس ديرەكتورى ەرجان قالىمباي ۇلى جاسالىپ جاتقان جۇمىستار مەن جەتىستىكتەردى بايانداپ، ۇلكەن ترانسفورماسيا جۇزەگە اسىرىلۋدا ەكەنىن اتاپ ءوتتى.
كەزدەسۋ بارىسىندا اكىم ورىنباسارى ۇجىمنىڭ مەرەيىن وسىرگەن جاڭالىققا دا توقتالدى. «Almaty aqshamy» گازەتى بيىل «قازاقستانداعى جىل تاڭداۋى» (№1 Choice of the year in Kazakhstan) ۇلتتىق جوباسىنىڭ «مەملەكەتتىك تىلدەگى رەسپۋبليكالىق قوعامدىق-ساياسي گازەت» نوميناسياسىن جەڭىپ العان ەدى. ابزال نۇكەنوۆ وسى مارتەبەلى ماراپاتپەن رەداكسيا ۇجىمىن قۇتتىقتاپ، بۇل جەتىستىك جىل بويى ەسەلى ەڭبەكتىڭ، ساپالى كونتەنت پەن وقىرمان سەنىمىنىڭ ايقىن دالەلى ەكەنىن اتاپ ءوتتى.
سونداي-اق، اكىم ورىنباسارى كەلەر جىلى 90 جىلدىعى اتاپ وتىلەتىن «ۆەچەرنيي الماتى» گازەتىنىڭ ۇجىمىمەن دە تىلدەسىپ، تاريحي باسىلىمنىڭ ورنى مەن ونەگەلى جولىنا توقتالدى. 
حولدينگ قۇرامىنداعى باسىلىمدار مەن ونلاين پلاتفورمالاردىڭ جۇمىسى، سيفرلىق جوبالاردىڭ دامۋى، كونتەنت ازىرلەۋدىڭ كۇندەلىكتى ۇدەرىستەرى دە ايتىلدى. «الەۋمەتتىك جەلىگە جاڭا تولقىننىڭ لەبى، كوزقاراسى كەرەك. قازىرگى تۇتىنۋشىلاردىڭ سۇرانىسىنا ساي كونتەنت دايارلاۋ، اقپاراتتىق كەڭىستىكتى ساپالى اقپاراتتارمەن تولىقتىرۋ ۋاقىت كۇتتىرمەيتىن ماسەلەلەر»، – دەدى ابزال نۇكەنوۆ سايتتار مەن الەۋمەتتىك جەلى ماماندارىمەن كەزدەسكەندە.
سونىمەن بىرگە اكىمنىڭ ورىنباسارى مەدياحولدينگتىڭ مۋزەيىن تاماشالاپ، الماتى جۋرناليستيكاسىنىڭ شەجىرەسىنە اينالعان قۇندى مۇرالارمەن تانىستى. سونىمەن قاتار، بيىل اشىلعان پودكاست ستۋدياسىنىڭ جۇمىسىن كوردى. 
جۋرناليستەرمەن جۇزدەسۋ بارىسىندا ول الداعى جىلى جوسپارلانعان مەدياحولدينگتىڭ 1959 جىلعى عيماراتتىن كۇردەلى جوندەۋ جانە جاڭعىرتۋ جۇمىستارىنا دا توقتالدى. «كەلەر جىلى عيماراتقا تولىعىمەن جوندەۋ جۇمىسى جۇرگىزىلەدى. بۇل جاڭا مۇمكىندىكتەر باستاماسى بولماق »، – دەدى ابزال نۇكەنوۆ.
جۇزدەسۋ سوڭىندا ول رەداكسيا ۇجىمىنا ساتتىلىك تىلەپ، اقپاراتتىق جۇمىستىڭ قالا ومىرىندەگى ماڭىزىن ەرەكشە اتاپ ءوتتى. جانە زاماناۋي مەديا اعىمىنا ىلەسىپ، مۋلتيمەديالىق جۋرناليستيكانى دامىتۋدى تاپسىردى. سونىمەن قاتار، الداعى جاڭا جىلمەن قۇتتىقتاپ، ءار شاڭىراققا اماندىق، بەرەكە-بىرلىك، شىعارماشىلىق تابىس تىلەدى.
ايتا كەتەيىك، «Alatau Aqparat» مەدياحولدينگىنە رەسپۋبليكالىق «Almaty aqshamy»، «ۆەچەرنيي الماتى» گازەتتەرى، سونداي-اق aqshamnews.kz، vecher.kz، alnews.kz ونلاين رەسۋرستارى جانە الەۋمەتتىك جەلىدەگى رەسمي پاراقشالار كىرەدى.