الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ №13 مەكەمەسىندە قىلمىستىق-اتقارۋ جۇيەسىندەگى سىبايلاس جەمقورلىقتىڭ الدىن الۋ تاقىرىبىندا سەمينار وتكىزىلدى، دەپ حابارلايدى aqshamnews.kz.
الماتى قالاسى بويىنشا سىبايلاس جەمقورلىققا قارسى قىزمەت ۇيىمداستىرعان كەڭەسكە №13 مەكەمەسىنىڭ قىزمەتكەرلەرى، قاداعالاۋ قىزمەتىنىڭ وكىلدەرى، سونداي-اق 200-دەن استام سوتتالعاندار قاتىستى. سەميناردا بايانداما جاساعان الماتى قالاسى بويىنشا سىبايلاس جەمقورلىققا قارسى قىزمەتتىڭ الدىن الا باقىلاۋ باسقارماسىنىڭ باسشىسى قانات ساليمبايەۆ قىلمىستىق-اتقارۋ جۇيەسى مەكەمەلەرىنىڭ جۇمىسىندا اشىقتىق پەن زاڭدىلىقتى قامتاماسىز ەتۋ – مەملەكەتتىڭ سىبايلاس جەمقورلىققا قارسى ساياساتىنىڭ اجىراماس بولىگى ەكەنىن اتاپ ءوتتى.
- زاڭ تالاپتارىن ساقتاۋ جانە سوتتالعانداردىڭ قۇقىقتارىن قورعاۋ – تەك زاڭنامالىق مىندەت قانا ەمەس، سونىمەن قاتار قۇقىقتىق مەملەكەتتىڭ دامۋ دەڭگەيىن كورسەتەتىن ماڭىزدى ولشەم. قىزمەتكەرلەر دە، سوتتالعاندار دا كەز كەلگەن سىبايلاس جەمقورلىق تاۋەكەلدەرىنەن اۋلاق بولۋى ءتيىس. ول ءۇشىن قوعامدىق جانە ىشكى باقىلاۋ تەتىكتەرىن ءتيىمدى ەنگىزۋ قاجەت، – دەپ اتاپ ءوتتى قانات ساليمبايەۆ.
كەزدەسۋ بارىسىندا جازانى وتەۋ كەزىندە زاڭ تالاپتارىنىڭ ساقتالۋى، قىلمىستىق-اتقارۋ جۇيەسى قىزمەتكەرلەرىنىڭ جۇمىسىنىڭ اشىقتىعى، سونداي-اق سوتتالعانداردى قايتا تاربيەلەۋ جانە قوعامعا بەيىمدەۋ شارالارىنىڭ تيىمدىلىگى تالقىلاندى. اسىرەسە، تۇزەۋ مەكەمەلەرىنىڭ قىزمەتكەرلەرى ءۇشىن ادەپ قاعيدالارىن قاتاڭ ساقتاۋ جانە قىزمەتتىك مىندەتتەردى ورىنداۋدا ىشكى باقىلاۋدى كۇشەيتۋ قاجەتتىگىنە ەرەكشە نازار اۋدارىلدى. سوتتالعاندار وزدەرىنىڭ جازا وتەۋلەرى بەلگىلەنگەن تالاپتارعا سايكەس ەكەنىن جانە مەكەمە قىزمەتكەرلەرىنىڭ ىس-ارەكەتتەرىنە قاتىستى شاعىمدارى جوق ەكەنىن ايتتى. سونىمەن قاتار ولار جازانى جەڭىلدەتۋ ماسەلەسىندەگى سوت شەشىمدەرىنىڭ ارتۇرلىلىگىنە الاڭداۋشىلىق ءبىلدىردى.
قانات ساليمبايەۆ سوتتالعاندارعا سىبايلاس جەمقورلىق جاعدايلارىمەن بەتپە-بەت كەلگەن كەزدە قانداي قادامدار جاساۋ كەرەكتىگىن، سىبايلاس جەمقورلىققا قارسى قىزمەتكە جۇگىنۋ جولدارىن جان-جاقتى ءتۇسىندىردى. الدىن الۋ شارالارى اياسىندا سوتتالعاندارعا قىلمىستىڭ الدىن الۋ جانە ونىڭ سالدارى رەتىندە قىلمىستىق جازا تۋرالى الەۋمەتتىك بەينەجازبالار دايىنداۋعا قاتىسۋ ۇسىنىلدى. بۇل ءتاسىل قۇقىقتىق ءتارتىپتى نىعايتۋعا جانە حالىقتىڭ مەملەكەتتىك ورگاندارعا دەگەن سەنىمىن ارتتىرۋعا باعىتتالعان مەملەكەتتىك ساياساتتىڭ ماڭىزدى سانالادى.