بۇل تۋرالى بۇدان بۇرىن حابارلاعانبىز.
الماتى قالاسىنىڭ پروكۋراتۋراسى بالالاردىڭ جازعى دەمالىسىن ۇيىمداستىرعان "بەلريچي" ءجشس-سىن ("ارمان دالا" لاگەرىن) تەكسەرۋگە كىرىستى، دەپ حابارلايدى Almaty-akshamy.kz
لاۋازىمدىق وكiلەتتiكتەردى تەرىس پايدالانۋ (ق ر قىلمىستىق كودەكسىنىڭ 361-بابى) جانە "ساۋنا عيماراتىندا بالالار لاگەرىن" ۇيىمداستىرۋ كەزىندە كامەلەتكە تولماعان ادامدى تاربيەلەۋ ءجونiندەگi مiندەتتەردi ورىنداماۋ (قازاقستان رەسپۋبليكاسىنىڭ قىلمىستىق كودەكسىنىڭ 140-بابى) فاكتىلەرى بويىنشا سوتقا دەيىنگى تەرگەۋ جۇرگىزىلىپ جاتىر.
پروكۋراتۋرا لاگەر جەتىم جانە اتا-اناسىنىڭ قامقورلىعىنسىز قالعان بالالارعا ارنالىپ الماتى قالاسى ءبىلىم باسقارماسىنىڭ بيۋدجەتىنەن قارجىلاندىرىلعانىن انىقتاعان. بۇل رەتتە ۇسىنىلعان كونكۋرستىق قۇجاتتاما تالاپتارعا تولىق سايكەس كەلمەگەن.
"قىلمىستىق ىستەردى تەرگەۋ الماتى قالالىق سىبايلاس جەمقورلىققا قارسى قىزمەتكە جۇكتەلدى"، – دەلىنگەن حابارلامادا.
ىستەردى تەرگەپ-تەكسەرۋ اياسىندا وقيعانىڭ بارلىق ءمان-جايى انىقتالىپ، جەرگىلىكتى اتقارۋشى ورگاننىڭ لاۋازىمدى تۇلعالارى مەن لاگەردى ۇيىمداستىرۋشىلاردىڭ ارەكەتىنە باعا بەرىلەدى.
الماتىدا حالىقتىڭ الەۋمەتتىك وسال توپتارىنا جاتاتىن وتباسىلاردىڭ بالالارى لاگەرگە تەگىن جولداما العان. الايدا ساۋنا عيماراتىنان اشىلعان لاگەر اتا-انالاردىڭ اشۋىن كەلتىردى. لاگەردەن اتا-انالار ۆيدەو ءتۇسىرىپ، جاريالادى.