ەلىمىزدەگى ەڭ ءىرى شاھارداعى ءتارتىپ ساقشىلارى اكادەميانىڭ 300 مىڭنان استام عىلىمي جانە وقۋ باسىلىمدارى، وقۋ-ادىستەمەلىك قۇرالدارى مەن كوركەم ادەبيەتى بار باي كىتاپحانا قورىنا قول جەتكىزدى.
ەلەكتروندى كىتاپحانانىڭ جانە م. ەسبولاتوۆ اتىنداعى ق ر ءىىم-نىڭ الماتى اكادەمياسىندا احمەت بايتۇرسىنوۆ اتىنداعى زالدىڭ سالتاناتتى اشىلۋىنا الماتى قالاسىنىڭ پوليسيا باسشىسى ارىستانعاني زاپپاروۆ قاتىستى، دەپ حابارلايدى Almaty-akshamy.kz Polisia.kz-كە سىلتەمە جاساپ.
كىتاپتىڭ ەلەكتروندى نۇسقاسى – قولدانۋ ءۇشىن ەڭ قولجەتىمدى جانە ىڭعايلى. ەندى قۇپيا ءسوز العان كەز كەلگەن الماتىلىق پوليسەي كىتاپحانا قورىن پايدالانا الادى. سونىمەن قاتار، سيفرلىق كىتاپحانا اكادەميا ستۋدەنتتەرى، ماگيسترانتتار، دوكتورانتتار، ونىڭ ىشىندە قاشىقتان وقيتىندار، سونداي-اق بىلىكتىلىگىن ارتتىرۋ كۋرستارىنان ءوتىپ جاتقان قىزمەتكەرلەر ءۇشىن تاپتىرماس كومەكشى بولادى.