الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ زاڭ فاكۋلتەتىنىڭ ستۋدەنتتەرىمەن كەزدەستى.
قالانىڭ باس پوليسەيى جينالىس وتكىزىپ، پوليسيا قىزمەتى تۋرالى ايتىپ بەردى. سونىمەن قاتار جينالعانداردى قالاداعى ەسىرتكى قىلمىسىمەن كۇرەس جانە جول قاۋىپسىزدىگى تۋرالى اقپاراتتاندىردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«شىنىندا، مەن ءۇشىن ءبىر كەزدەرى ءوزىم وقىعان ۋنيۆەرسيتەتتە ءسوز سويلەۋ ۇلكەن مارتەبە. زاڭ فاكۋلتەتىندە وقىپ ءجۇرىپ، بارلىقتارىڭىز بولاشاق ماماندىقتارىڭىزدى تاڭداپ، كىم بولعىلارىڭىز كەلەتىنىن بىلەسىزدەر دەپ ويلايمىن. ماماندىقتى دۇرىس تاڭداۋ – ومىردەن ءوز ورنىڭدى دۇرىس تابۋ دەگەن ءسوز. مەملەكەت باسشىسى قاسىم-جومارت توقايەۆ جاڭا قازاقستان جاستارى ءۇشىن ءۇش ماڭىزدى باسىمدىقتى اتاپ ءوتتى: بىلىمگە ۇمتىلۋ، ەڭبەكقورلىق جانە پاتريوتتىق. بۇگىن سىزدەر بىرنەشە تىلدە ەركىن سويلەيسىزدەر جانە وزدەرىڭىزگە ۇلكەن جانە امبيسيالىق جوسپارلار قوياسىزدار. جاستاردىڭ قاتىسۋىمەن ەلىمىز، ازاماتتاردىڭ ءال-اۋقاتى مەن ءومىر ءسۇرۋ ساپاسىن ارتتىرۋدى قامتاماسىز ەتە وتىرىپ، باسەكەگە قابىلەتتى بولۋ كەرەك. وتانىنا قاجەتتى جانە پايدالى بولۋ ءاربىر جاستىڭ ماقساتى بولۋى كەرەك»، – دەدى ارىستانعاني زاپپاروۆ.
سونىمەن قاتار پد-نىڭ باستىعى پوليسيا قىزمەتىنىڭ ارتىقشىلىقتارىنا توقتالدى. پوليسيا دەپارتامەنتىنىڭ نەگىزگى مىندەتتەرى پروفيلاكتيكا، ياعني قۇقىق بۇزۋشىلىقتىڭ الدىن الۋ بولىپ سانالادى. ال ەگەر ولار بۇرىن جاسالعان بولسا، ولاردى اشۋ جانە تەرگەۋ، ۇيىمداسقان قىلمىسپەن كۇرەسۋ، ەسىرتكى قىلمىسىنا، ەكسترەميزمگە قارسى تۇرۋ، سونداي-اق جول قاۋىپسىزدىگىن جانە كوشى-قوندى باقىلاۋدى قامتاماسىز ەتۋ ەكەندىگىن ايتتى.
«پوليسيا قىزمەتى زاڭدىلىق پەن ءتارتىپتى ساقتاۋعا، ازاماتتارىمىزدىڭ قۇقىقتارى مەن بوستاندىقتارىن قورعاۋعا تىكەلەي بايلانىستى. دەمەك، پوليسياداعى قىزمەت تە قاۋىپسىزدىكتى قامتاماسىز ەتۋ ارقىلى ەلىمىزدىڭ دامۋىنا قوسىلعان وراسان زور ۇلەس بولىپ سانالادى. پوليسيا قىزمەتكەرى ماماندىعى – قاۋىپ-قاتەردەن قورىقپايتىن جانە ازاماتتارىمىزدىڭ قاۋىپسىزدىگىنە ۇلەس قوسۋعا دايىن ادامدار ءۇشىن جاقسى تاڭداۋ. وسى باعىتتى تاڭداۋ ارقىلى سىزدەر تاپتىرماس مىقتى مامان اتانىپ، قازاقستاننىڭ بولاشاعىنا اسەر ەتە الاسىزدار، سوڭعى كەزدە مەملەكەت تاراپىنان پوليسياعا الەۋمەتتىك قولداۋ ايتارلىقتاي ارتتى»، – دەدى ارىستانعاني زاپپاروۆ.
پد باستىعىنىڭ ايتۋىنشا، قوعامدىق ءتارتىپ پەن ازاماتتاردىڭ قاۋىپسىزدىگى پوليسيانىڭ كاسىبي جۇمىسىنا عانا ەمەس، بۇكىل حالىقتىڭ بەلسەندى ۇستانىمىنا بايلانىستى. وسىعان وراي، ول بولاشاق زاڭگەرلەردى ءوز ورتاسىنداعى قىلمىستىڭ الدىن الۋ جولىندا ۇلەس قوسۋعا شاقىردى.