الماتىدا تۇرمىستىق قاتىناستار سالاسىنداعى قىلمىستىق احۋالدى جاقسارتۋ جانە قىلمىستىڭ الدىن الۋ ماقساتىندا “تۇرمىس”، “تۇرمىستىق زورلىق-زومبىلىققا جول جوق”، “باقىتتى وتباسى” سىندى ماقساتتى پروفيلاكتيكالىق ءىس-شارالارى وتكىزىلۋدە.
جىل باسىنان بەرى وتباسى-تۇرمىستىق قاتىناستار سالاسىندا ايەلدەرگە قاتىستى قىلمىس تىركەلگەن جوق. وتباسى-تۇرمىستىق قاتىناستار سالاسىندا قۇقىق بۇزۋشىلىق جاساعان ادامدارعا قاتىستى پروفيلاكتيكالىق ىقپال ەتۋدىڭ نەگىزگى شارالارىنىڭ ءبىرى – پروفيلاكتيكالىق ەسەپكە الۋ جانە جەكە الدىن الۋ جۇمىستاردى جۇرگىزۋ، ماسكۇنەمدىكتەن ماجبۇرلەپ ەمدەۋگە جىبەرۋ. وسى كەزەڭدە 803 ادام پروفيلاكتيكالىق ەسەپكە قويىلسا، ونىڭ 733-ىنە قورعاۋ نۇسقاماسى، تاعى 70-ىنە قۇقىق بۇزۋشىنىڭ تارتىبىنە ەرەكشە تالاپتار قويىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الكوگوليزم مەن ناشاقورلىقتان ماجبۇرلەپ ەمدەۋگە 9 ادام جىبەرىلدى. الماتى پوليسياسى زورلىق-زومبىلىققا ۇشىراعان، سونداي-اق وسى سالاداعى قولدانىستاعى زاڭنامانى تۇسىندىرۋگە جۇگىنگەن 159 ايەلگە جەكە كەڭەستىك كومەك كورسەتتى.
سونىمەن قاتار تۇرمىستىق زورلىق-زومبىلىقتىڭ الدىن الۋعا باعىتتالعان پروفيلاكتيكالىق ءىس-شارالار ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ، ءبىلىم بەرۋ، ەڭبەك جانە حالىقتى الەۋمەتتىك قورعاۋ ورگاندارىنىڭ، سونداي-اق ۇكىمەتتىك ەمەس ۇيىمداردىڭ وكىلدەرىن تارتا وتىرىپ، تۇراقتى نەگىزدە جۇرگىزىلىپ جاتىر. جىل باسىنان بەرى ۇەۇ-مەن 16 كەزدەسۋ وتكىزىلدى، وندا ۇەۇ مەن پوليسيانىڭ ءوزارا ءىس-قيمىلىنىڭ وڭ تاجىريبەسى، زورلىق-زومبىلىق قۇرباندارىنا پسيحولوگيالىق كومەك كورسەتۋدىڭ تيىمدىلىگى جانە تۇرمىستىق زورلىق-زومبىلىقتىڭ الدىن الۋدىڭ ماسەلەلەرى، سونداي-اق ولاردى شەشۋ جولدارى باعالاندى.
وتباسى-تۇرمىستىق قاتىناستار سالاسىنداعى جۇمىستار الماتى قالاسىنداعى قمۋ “جان-سايا” مەملەكەتتىك داعدارىس ورتالىعىمەن، سونداي-اق “رودنيك”، “انالار ءۇيى”، “تين-چەللەندج” قوعامدىق قورلارىمەن تىعىز بايلانىستا جۇرگىزىلەدى. جىل باسىنان بەرى داعدارىس ورتالىقتارىنا 29 ايەل ورنالاستىرىلدى.