قالانىڭ كريمينالدىق پوليسياسى قارقىن الىپ كەلە جاتقان الاياقتىق تۇرىنە باسا نازار اۋداردى.
الماتى پوليسياسى وزدەرىن بانك پەن قۇقىق قورعاۋ ورگاندارىنىڭ قىزمەتكەرلەرىمىز دەپ تانىستىراتىن الاياقتاردىڭ ازاماتتاردى قالاي الدايتىنى جايلى ايتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ونىڭ تىزبەگى مىناداي: جابىرلەنۋشىنىڭ ۇيالى تەلەفونىنا قوڭىراۋ شالىپ، وزدەرىن پوليسيا قىزمەتكەرى نەمەسە بانكتىڭ قاۋىپسىزدىك قىزمەتىنەنبىز دەپ تانىستىرادى جانە ونىڭ اتىنا نەسيە الۋ ارەكەتى بولعاندىعى تۋرالى حابارلايدى. ولاردى شوتتاردا اقشانىڭ بار-جوعى دا قىزىقتىرادى. ەگەر جابىرلەنۋشى بۇل اڭگىمەنىڭ راستىعىنا كۇماندانسا، بانكتىڭ جالعان قىزمەتكەرلەرى ءقازىر ءتارتىپ ساقشىلارىنىڭ حابارلاستىندىعىن ايتادى. سودان كەيىن اڭگىمەگە جالعان پوليسيا قىزمەتكەرى كىرىسىپ، ءوزىن دەپارتامەنتتىڭ نەمەسە پروكۋراتۋرانىڭ باستىعىمىن دەپ تانىستىرادى، وسى قىزمەتتەردىڭ قازىرگى باسشىلارىنىڭ ءاتى-جونىن (مالىمەتتەرى مەن قىزمەتتەرى ينتەرنەتتە ەركىن قولجەتىمدى) اتايدى جانە نەسيە راسىمدەمەك بولعان الاياقتى ۇستاۋ ءۇشىن ازاماتتىق بورىشىن وتەۋدى تاباندى تۇردە سۇرايدى. ول ءۇشىن قوڭىراۋ شالۋشى شوتتارداعى بار قاراجاتتى شەشىپ الىپ، ولاردى بانكتىڭ ءقاۋىپسىز شوتىنا جىبەرۋ قاجەت ەكەنىن حابارلايدى. سودان كەيىن ول سىياقى الۋ ءۇشىن ناقتى دەرەكتەرى مەن كارتالارىن ساتىپ جىبەرگەن، قر-نىڭ ازاماتتارىنا تيەسىلى، كارتا دەرەكتەمەلەرىن بەرەدى. ال جابىرلەنۋشى بۇل ارادا ءوز جيعان-تەرگەنىنە قورقىپ، الاياقتاردىڭ ىقپالىنا ءتۇسىپ، ناعىز قىلمىسكەرلەردىڭ سوڭىنان ەرىپ، ولارعا ءوز قولىمەن اقشا جىبەرەدى»، – دەيدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.
سپيكەردىڭ ايتۋىنشا، قاسكويلەر جابىرلەنۋشىنى وسى ارنايى ءىس-شارانىڭ تيىمدىلىگىنە سىلتەمە جاساي وتىرىپ، بىرنەشە بانكتەن نەسيە الۋعا كوندىرەتىن سەنارييدىڭ ءسال باسقاشا تۇسىندىرمەسى دە بار. كەيبىر جابىرلەنۋشىلەر بۇل تەك رەسمي قاجەتتىلىك ەكەنىنە جانە پوليسياعا شىنىمەن كومەكتەسەتىنىنە سەنىمدى بولا وتىرىپ، بىرنەشە كۇن بويى الاياقتاردىڭ تالاپتارىن ورىندايدى.
«سونىمەن قاتار، جالعان قىزمەتكەرلەر “ارنايى ءىس-شاراعا قاتىسۋشىعا” بۇل تۋرالى بىرەۋگە حابارلاۋعا قاتاڭ تىيىم سالادى. شىن مانىندە بۇل پسيحولوگيالىق تريۋك ءارقاشان تەز باعدارلانا المايتىن جانە بولىپ جاتقان جاعدايدى بايسالدى باعالاي المايتىن قارت ادامدار ءۇشىن جاقسى جۇمىس ىستەيدى. ەگدە ادامدار وتە سەنگىش، سوندىقتان ولار كوبىنەسە الدانىپ قالادى. قۇرمەتتى جەرلەستەر! سىزدەردەن ساق جانە مۇقيات بولۋلارىڭىزدى سۇرايمىز. كۇماندى قوڭىراۋلارعا جانە بەيتانىس ادامداردىڭ سىزگە ايتاتىنىنا سەنە بەرمەڭىز»، – دەدى ق.ناۋاتوۆ.