الماتى پوليسياسى ينتەرنەت-الاياقتىق تۋرالى اقپاراتتىق جادىنامالار ازىرلەدى.
قالالىق پد ينتەرنەت-الاياقتىق قىلمىسىنىڭ كۇشەيگەنى تۋرالى حابارلادى جانە تۇرعىنداردى قىراعى بولۋعا شاقىردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«وكىنىشكە قاراي، قىلمىس ءبىر ورىندا تۇرمايدى: كۇن سايىن جاڭا فورما مەن ادىستەر شىعىپ جاتىر. بۇگىندە قارتتارعا قاتىستى الاياقتىق دەرەكتەرى جيىلەپ كەتتى. كوبىنە بۇل الاياقتىق جابىرلەنۋشىلەردىڭ ۇيىنە نەمەسە تەلەفوندارىنا قوڭىراۋ شالۋ ارقىلى جاسالادى. الاياقتار وزدەرىن جاقىن تۋىستارى (ۇلى، قىزى، نەمەرەلەرى) رەتىندە تانىستىرىپ، كەنەتتەن تۋىنداعان جاعدايدى رەتتەۋ ءۇشىن اقشا اۋدارۋ قاجەت ەكەنىن حابارلايدى»، – دەدى المالى اۋداندىق پوليسيا باسقارماسىنىڭ باستىعى ولجاس ءشارىپوۆ.
سپيكەر بۇگىنگى كۇنى الاياقتاردىڭ قالاي ارەكەت ەتەتىنى تۋرالى اقپاراتتىق جادىنامالاردىڭ بىرنەشە نۇسقاسى ازىرلەنگەنىن ايتتى.
«بۇل جادىنامالاردا الاياقتاردىڭ قىلمىستىق ارەكەتىنىڭ ەڭ تانىمال تىزبەكتەرى ەگجەي-تەگجەيلى سيپاتتالعان جانە وڭاي اقشانى جاقسى كورەتىندەردىڭ ۋىسىنا تۇسپەۋ تۋرالى كەڭەستەر بەرىلگەن. جادىنامالاردى تۇرعىندار اراسىندا ۋچاسكەلىك پوليسيا ينسپەكتورلارى تاراتادى. ماقسات – قوعامدى قاسكويلەردەن قورعاۋ جانە مۇنداي قىلمىستىق كورىنىستەردىڭ الدىن الۋ»، – دەدى ءشارىپوۆ.