ماسەلە ءبىر اي بۇرىن قالالىق كوشى-قون قىزمەتىنە كومەك سۇراپ جۇگىنگەن 51 جاستاعى سەرگەي چايكين تۋرالى بولىپ وتىر.
«ول بىزگە باسىنان وتكەن وقيعانى ايتىپ، 1996 جىلى قاتتى سوققىعا جىعىلعان كەزدە ەسكى ءتولقۇجاتىن جوعالتىپ العانىن مالىمدەدى. وسى ۋاقىت بويى ەر ادام قيىن ومىرلىك جاعدايدا بولدى، كەز كەلگەن جۇمىستاردى جاسادى. ءبىر ايدىڭ ىشىندە جەكە كۋالىگىن راسىمدەپ، تابىستادىق»، – دەدى كوشى-قون قىزمەتى باسقارماسىنىڭ ءبولىم باستىعى جاننا جاقىپبايەۆا.
«مەن الماتى قالاسىندا دۇنيەگە كەلدىم، ءومىر بويى وسىندا تۇردىم. 90-جىلدارى مەن وتە قيىن ومىرلىك جاعدايعا تاپ بولدىم. قىزىل ءتولقۇجاتىمدى جوعالتتىم، پاتەرىمنەن، جۇمىسىمنان ايىرىلدىم. كۇن كورىسسىز قالدىم. ۇزاق ۋاقىت بويى مەن قۇجاتتاردى جيناۋعا تىرىستىم، ءبىراق دەنساۋلىعىما بايلانىستى قولىمنان ەشتەڭە كەلمەي ءجۇردى. الماتى قالاسىنىڭ كوشى-قون پوليسياسىنا جۇگىنگەنىمدە، قاجەتتى قۇجاتتاردى جيناپ، ءبىر ايدىڭ ىشىندە راسىمدەۋگە كومەكتەستى، اقىرى كوپتەن كۇتكەن قۇجات – جەكە كۋالىكتى الدىم. الماتى قالالىق كوشى-قون پوليسياسىنىڭ قىزمەتكەرلەرىنە العىسىم شەكسىز»، – دەپ ريزاشىلىعىن ءبىلدىردى سەرگەي چايكين.