قاراپايىم ءارى كۇردەلى الداۋدىڭ ءادىسىن الماتى وبلىسىنىڭ 23 جاستاعى تۇرعىنى ويلاپ تاپقان.
اۋەزوۆ اۋداندىق پب-عا بىرنەشە جەرگىلىكتى تۇرعىن ارىزبەن جۇگىنگەن، ولاردىڭ ايتۋىنشا، جاس جىگىت كريپتوۆاليۋتانىڭ قارجىلىق ينتەرنەت-الاڭىندا قاراجاتتى كوبەيتىپ بەرەمىن دەگەن جەلەۋمەن ءىرى كولەمدە اقشانى يەمدەنگەن، دەپ حابارلايدى Almaty-akshamy.kz.
«جەدەل-ىزدەستىرۋ ءىس-شارالارى بارىسىندا كۇدىكتى ۇستالدى. ول 23 جاستاعى ل.ەسىمدى ازامات بولىپ شىقتى. بەلگىلى بولعانداي، كۇدىكتى اقشانى قايتارۋ بويىنشا ءوز مىندەتتەرىن ورىنداۋدى ويلاماعان. اتالعان دەرەك بويىنشا ق ر قك-نىڭ 190-بابى 3-بولىگىنە سايكەس قىلمىستىق ءىس تىركەلدى. كۇدىكتىگە قاتىستى قاماۋعا الۋ تۇرىندەگى بۇلتارتپاۋ شاراسى تاڭدالدى. قازىرگى ۋاقىتتا وسىعان ۇقساس 11 ەپيزود تىركەلدى، ياعني 11 جابىرلەنۋشى كۇدىكتىگە كەمىندە 3 ميلليون تەڭگەدەن بەرگەن»، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.
قازىرگى ۋاقىتتا پوليسيا قىزمەتكەرلەرى اتالعان زاڭسىز ارەكەتتىڭ قوسىمشا ەپيزودتارىن انىقتاۋعا باعىتتالعان جەدەل-ىزدەستىرۋ جانە تەرگەۋ ءىس-شارالارىن جۇرگىزىپ جاتىر. ق ر قپك-نىڭ 201-بابىنا سايكەس وزگە اقپاراتتار تەرگەۋ مۇددەسىنە وراي جاريالاۋعا جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.