الماتى پوليسەيلەرى ۇرلىقتىڭ جولىن كەستى

الماتى پوليسەيلەرى ۇرلىقتىڭ جولىن كەستى. 

قىلمىسكەرلەردى قولعا تۇسىرۋدە “بۋران-147” پاترۋلدىك ەكيپاجىنىڭ قىزمەتكەرلەرى جوعارى كاسىبيلىك، جەدەلدىك پەن ءىس-قيمىلدىڭ جۇيەلىلىگىن كورسەتتى، دەپ حابارلايدى Almaty.kz Polisia.kz-كە سىلتەمە جاساپ.

جشس-نىڭ باس ديرەكتورى الماتى قالاسى پد-نىڭ باسشىلىعىنا العىس حاتپەن جۇگىندى. ول الماتى پوليسياسىنىڭ قاسكويلەردى ىزدەستىرۋ، ۇستاۋ جانە تۇرعىن ءۇي كەشەنىنەن قۇرىلىس ماتەريالدارىن ۇرلاۋ دەرەكتەرىن اشۋدا ءوز مىندەتتەرىن ادال اتقارعانىن اتاپ ءوتتى.

«بوستاندىق اۋدانىندا پوليسيا قىزمەتكەرلەرى جالعاس بەكتۇروۆ، ماقسات تىلەۋوۆ جانە جالعاس قالييەۆ “بۋران-147” اۆتوەكيپاجىمەن قىزمەتكە شىقتى. ايماقتى پاترۋلدەۋ كەزىندە كارىموۆ كوشەسىنىڭ بويىندا ولار Honda Odyssey اۆتوكولىگىن تەكسەرۋ ءۇشىن توقتاتقان. جۇرگىزۋشى مەن جولاۋشى قاتتى قوبالجىدى. كولىكتىڭ ءىشىن تەكسەرگەن ينسپەكتورلار ون قۇرىلىس قىسقىشىن تاپتى. ولار بۇل ماتەريالداردىڭ كىمگە تيەسىلى ەكەنىن انىقتاي باستادى، ءبىراق كۇدىكتىلەر جاۋاپ بەرە المادى. ودان ءارى ءىس جۇرگىزۋ بارىسىندا بوتەننىڭ مۇلكىن ۇرلاۋ دەرەگى انىقتالدى. اۋداندىق پب-دا سوتقا دەيىنگى تەرگەۋ امالدارى باستالدى»، – دەدى الماتى قالالىق پد جپقب پاترۋلدىك پوليسيا پولكىنىڭ كومانديرى باۋىرجان حانتەمىروۆ.  

«ءبىزدىڭ قاۋىپسىزدىگىمىزگە، تىنىشتىعىمىزعا قىزمەت ەتكەندەرىڭىزگە جانە ءوز مىندەتتەرىڭىزگە ادالدىقپەن قاراعاندارىڭىز ءۇشىن راقمەت. كۇدىكتىلەردى ۇستاۋدا پوليسيا قىزمەتكەرلەرى جوعارى كاسىبيلىك تانىتتى»، – دەدى حات اۆتورى.