الماتىدا «زورلىق-زومبىلىقسىز 16 كۇن» رەسپۋبليكالىق اكسياسى وتۋدە.
مەگاپوليستىڭ ءتارتىپ ساقشىلارى الدىن الۋ تەكسەرۋلەرىن وتكىزىپ جاتىر. وكق بريفينگىندە الماتى قالاسى پوليسيا دەپارتامەنتى وكىلدەرى ناۋقاننىڭ نەگىزگى مىندەتتەرىن اتادى، دەپ حابارلايدى Almaty-akshamy.kz.
الماتى قالالىق پد جەرگىلىكتى پوليسيا قىزمەتى باسقارماسى باستىعىنىڭ ورىنباسارى، پوليسيا پولكوۆنيگى دياس دۋانبەكوۆتىڭ ايتۋىنشا، پوليسياعا كۇن سايىن 10-15 ارىز تۇسەدى، ءبىراق زورلىق-زومبىلىق قۇرباندارىنىڭ ءبارى بىردەي كومەككە جۇگىنبەيدى. كوپ جاعدايدا جانجالدار پوليسيا قىزمەتى كەلگەننەن كەيىن شەشىلەدى نەمەسە ودان ارى ءىستىڭ ءمان-جايى انىقتالماي جاتىپ، بەرگەن ارىزدان باس تارتىپ جاتاتىن جاعدايلار كەزدەسىپ جاتادى.
«پوليسيانىڭ نەگىزگى ءرولى - قىلمىس پەن اۋىر زارداپتاردىڭ الدىن الۋ. الدىن الۋ قازاقستان رەسپۋبليكاسىنداعى زاڭنامانىڭ نەگىزگى تۇتقاسى بولىپ تابىلادى. اكىمشىلىك جانە الدىن الۋ شارالارى سياقتى بارلىق ادىس-تاسىلدەر بار. كوپ جاعدايدا جابىرلەنۋشىلەر وتباسىنداعى زورلىق-زومبىلىققا توزەدى، بۇل كوبىنەسە قايعىلى سالدارعا اكەلەدى. ماسەلەن، ءبىر ايەلدىڭ تۇرمىسقا شىققانىنا 9 جىل بولعان، ەكى بالاسى بار. 7 جىل بويى كۇيەۋىنەن تۇرمىستىق زورلىق-زومبىلىق كورگەن ول پوليسيادان كومەك سۇراپ كورمەگەن. ال اۋىر دەنە جاراقاتىن العاننان كەيىن عانا پوليسياعا ارىزدانعان»، — دەيدى دياس دۋانبەكوۆ.
سپيكەر ايەلدەردىڭ وتباسىنداعى زورلىق-زومبىلىققا شىداي جۇرە بەرمەي، قىسىلماي كومەك سۇراۋلارى كەرەكتىگىن ەسكە سالدى.
پد وكىلى زورلىق-زومبىلىق قۇربانى ارىزدانىپ كەلگەن جاعدايدا قالاي ارەكەت ەتۋ كەرەكتىگىن ايتتى.
«ءبىز كەلىپ، قۇقىقبۇزۋشىققا قاتىستى ءمان-جايدى انىقتايمىز. كۇش كورسەتىلىپ، دەنەگە زاقىم كەلتىرىلسە، دەنساۋلىققا زيان كەلتىرۋ فاكتىسى بويىنشا اكىمشىلىك ءىس قوزعايمىز. ەگەر بۇل قاراپايىم ۇرىپ-سوعۋ بولسا، وعان ءتيىستى جازا قاراستىرىلعان. ەگەر مۇنداي فاكتىلەر تىركەلمەگەن بولسا، ءبىراق جاي عانا جانجال بولسا، ءوندابىز اگرەسسورمەن ءتيىستى جۇمىستاردى جۇرگىزەمىز.10 تاۋلىككە دەيىن قاماۋ تۇرىندە جازالاۋ قاراستىرىلعان. ءبىز ولاردى ەسەپكە الىپ، ءبىر اي بويى ونىڭ ءوزىن قالاي ۇستايتىنىن باقىلايمىز»، - دەيدى ول.
ايتا كەتەيىك، بيىل تۇرمىستىق زورلىق-زومبىلىق قۇرباندارىنان 8 مىڭنان استام ارىز-شاعىم تىركەلىپ، ونىڭ 20 پايىزى جاۋاپكەرشىلككە تارتىلدى. قالعان جانجالدار پوليسيا قىزمەتكەرلەرىنىڭ كەلۋىمەن رەتتەلدى. 7 مىڭ ادام پروفيلاكتيكالىق ەسەپكە الىندى.
الماتى قالالىق پد جەرگىلىكتى پوليسيا قىزمەتى باسقارماسىنىڭ ايەلدەردى زورلىق-زومبىلىقتان قورعاۋ توبىنىڭ اعا ينسپەكتورى اقبوتا ءابىلقاسىموۆانىڭ ايتۋىنشا، داعدارىس ورتالىقتارى دا بەلسەندى تۇردە اتسالىسۋدا، وندا قۇقىقتىق كەڭەستەر مەن پسيحولوگيالىق كومەك كورسەتەتىن سەنىم تەلەفوندارى جۇمىس ىستەيدى.
«پوليسياعا جۇگىنگەن تۇرمىستىق زورلىق-زومبىلىق قۇرباندارىنا ءبىز ولاردىڭ كونستيتۋسيالىق قۇقىقتارىن قورعاۋ ءۇشىن بارلىق شارالاردى قولدانىپ جاتقانىمىزدى اتاپ وتكىم كەلەدى. ءبىراق كەيدە ايەلدەر پسيحولوگيالىق جانە الەۋمەتتىك كومەكە دە ءزارۋ، ءبىز ولاردى زورلىق-زومبىلىق قۇرباندارىنا كومەك كورسەتەتىن داعدارىس ورتالىقتارىنا جىبەرەمىز. كوپتەن بەرى «جانسايا» مەملەكەتتىك پانالاۋ ورنىمەن بىرلەسە جۇمىس ىستەپ كەلەمىز. ول جەردە 50 توسەك بار، ول بارلىق ستاندارتتارعا ساي. تۇرمىستىق زورلىق-زومبىلىقتان زارداپ شەككەن ايەلدەرگە دە تولىققاندى الەۋمەتتىك قولداۋ كورسەتىلەدى»، - دەدى اقبوتا ءابىلقاسىموۆا.
ودان بولەك، ۆولونتەرلار دا پوليسەيلەرگە بەلسەندى كومەك كورسەتەدى. ولار «تۇرمىس»، «وتباسىندا زورلىق-زومبىلىققا جول جول»، «باقىتتى وتباسى» سياقتى جەدەل الدىن الۋ شارالارىنا قاتىسادى.
«الماتىدا ۆولونتەرلار كوپ. ولار «جانسايا» جانە «انالار ءۇيى» داعدارىس ورتالىقتارىنا كومەكتەسەدى. ەرىكتىلەر ءتۇرلى ءىس-شارالارعا قاتىسادى. ولار ابىلاي حان داڭعىلى، 79 مەكەنجايىندا ورنالاسقان. ول جەرگە ءتۇرلى ارىز-شاعىمىن ايتۋشىلار بارادى»، - دەيدى الماتى قالاسى پد المالى اۋداندىق پوليسيا باسقارماسىنىڭ ايەلدەردى زورلىق-زومبىلىقتان قورعاۋ توبىنىڭ اعا ينسپەكتورى لاريدا سلامدجانوۆا.
بريفينگ سوڭىندا سپيكەرلەر ەگەر وتباسىنداعى زورلىق-زومبىلىق جايلى سىزگە بەلگىلى بولسا، بولماسا، ءوزىڭىز قانداي دا ءبىر زورلىق-زومبىلىق قۇربانى بولساڭىز، ول تۋرالى جاسىرۋدىڭ قاجەتى جوق ەكەنىن ەسكە سالدى.
پوليسياعا «102» ءنومىرى بويىنشا جۇگىنۋ كەرەك.