الماتى پوليسەيلەرى سوعىس ارداگەرىنە ارناپ اۋلادا كونسەرت ۇيىمداستىردى

الماتى قالالىق پد ءانسامبلى ارداگەردىڭ اۋلاسىندا سوعىس جىلدارىنداعى اندەردى ورىندادى

98 جاستاعى ۇلى وتان سوعىسىنىڭ ارداگەرى قامبار ءامىر ۇلى سارسەنوۆ ءۇشىن 9 مامىردىڭ تاڭى ەرەكشە باستالدى. سەبەبى الماتى قالالىق پد ءانسامبلى ارداگەردىڭ اۋلاسىنا كەلىپ، سوعىس جىلدارىنداعى اندەردى ورىنداپ بەردى، دەپ حابارلايدى Almaty-akshamy.kz Almaty.tv-گە سىلتەمە جاساپ.

«ۇوس ارداگەرى قامبار ءامىر ۇلى تۋرالى وسىعان دەيىن «جەڭىس» سيكلىنىڭ ەگجەي-تەگجەيلى ماتەريالىمىزدا حابارلاعان بولاتىنبىز. ول – شىندىق پەن ادىلدىك ءۇشىن ناعىز كۇرەسكەر، وتانىمىزدىڭ بوستاندىعى ءۇشىن تالاي كەسكىلەسكەن شايقاستاردىڭ قاتىسۋشىسى. اۋىر جاراقاتتانعانىنا قاراماستان، قامبار اتا سوعىستان كەيىنگى جىلداردا دا ازاماتتاردىڭ تىنىشتىعىن كۇزەتۋگە شەشىم قابىلدادى. بۇگىن، وسى ايتۋلى كۇنى،  ارداگەرگە ناعىز مەرەكە ۇيىمداستىردىق. پد ءانسامبلىنىڭ ارتىستەرى اسكەري شىعارمالاردى ورىندادى. كونسەرت ويداعىداي ءوتتى. اقساقال جاستارعا باتا بەرىپ، تۇرعىندار جاندى داۋىستاعى اندەردى ىقىلاسپەن تىڭدادى»، – دەدى، الماتى قالالىق پوليسيا دەپارتامەنتى باستىعىنىڭ ورىنباسارى، پوليسيا پولكوۆنيگى ولجاس مىرزابەكوۆ.