الماتى پوليسەيلەرى ونلاين نەسيە راسىمدەگەن الاياقتاردى ۇستادى

ولار ۋاقىتشا ۇستاۋ يزولياتورىنا قامالدى.

مەدەۋ اۋداندىق پوليسيا باسقارماسىنىڭ قىزمەتكەرلەرى ۇزاق ۋاقىت بويى تۇتىنۋشىلىق ماقساتتا بانكتەن ونلاين نەسيە راسىمدەگەن 36 جانە 24 جاستاعى بۇرىن سوتتالماعان ازاماتتاردى ۇستادى، دەپ حابارلايدى Almaty-akshamy.kz.

«العاشقى تەرگەۋ ارەكەتتەرى بارىسىندا انىقتالعانداي، كۇدىكتىلەر وتىنىشتە كورسەتىلگەن ادامدارعا ايتپاستان جانە كەلىسىمىنسىز ادامداردىڭ وتىنىشىندە كورسەتىلگەن جەكە دەرەكتەردى، سونداي-اق ولاردىڭ سۋرەتتەرىن نەمەسە بەينەفراگمەنتىن قولدانا وتىرىپ، بانكتىڭ سايتىندا ونلاين نەسيە الۋعا وتىنىمدەردى تولتىردى.  نەسيەلىك وتىنىمدەر ماقۇلدانعاننان كەيىن جانە كليەنتتەردىڭ شوتتارىنا قاراجات تۇسكەننەن كەيىن، قاراجاتتى ينتەرنەت-بانكينگ ارقىلى باسقا بانكتەردىڭ شوتتارىنا شىعارعان.  وسىلايشا، بانكتەردىڭ بىرىنە جالپى سوماسى 10 ميلليون تەڭگەدەن استام ماتەريالدىق زالال كەلتىرىلدى»، - دەدى مەدەۋ اۋداندىق پوليسيا باسقارماسىنىڭ باستىعى داۋرەن وتەبايەۆ.

 الماتى قالالىق پوليسيا دەپارتامەنتى باسپا ءسوز قىزمەتى ءمالىم ەتكەندەي، پوليسەيلەر جۇرگىزگەن ارنايى شارالاردىڭ ارقاسىندا ولار الاياقتاردى انىقتاپ، ۇستاۋعا قول جەتكىزدى.  قازىرگى ۋاقىتتا، تەرگەۋ اياقتالعانشا، «الاياقتاردىڭ» ەكەۋى دە ۋاقىتشا ۇستاۋ يزولياتورىنا قامالدى.  قىلمىستىق ءىس قىلمىستىق كودەكستىڭ 190 بابى 4 بولىگى 2 تارماعى - «اقپاراتتىق جۇيەنى پايدالانۋشى الداۋ نەمەسە سەنىمىنە قيانات جاساۋ ارقىلى جاسالعان الاياقتىق» بويىنشا تەرگەلۋدە.  ەگەر كۇدىكتىلەردىڭ كىناسى دالەلدەنسە، ولار 5 جىلدان 10 جىلعا دەيىن باس بوستاندىعىنان ايىرىلۋى مۇمكىن.