1 قىركۇيەك كۇنى، سونداي-اق، وقۋ جىلىنىڭ العاشقى اپتالارىندا دا پوليسيا قىزمەتكەرلەرى كۇشەيتىلگەن رەجيمدە قىزمەت ەتەدى.
ءتارتىپ ءبىلىم بەرۋ مەكەمەلەرى ماڭىنداعى جاياۋ جۇرگىنشىلەر وتكەلدەرىندە كەزەكشىلىك اتقارىپ، قوزعالىسقا قاتىسۋشىلارمەن، جاياۋ جۇرگىنشىلەرمەن — اتا-انالارمەن جانە بالالارمەن، سونداي-اق جۇرگىزۋشىلەرمەن جۇمىس ىستەيتىن بولادى. پوليسيا قىزمەتكەرلەرى جولداردا مۇقيات بولۋ كەرەكتىگىن ەسكە سالادى. بۇل تۋرالى وكق بريفينگىندە الماتى پوليسيا دەپارتامەنتىنىڭ رەسمي وكىلى سالتانات ازىربەك مالىمدەدى، دەپ حابارلايدى Almaty-akshamy.kz.
«وقۋ جىلىنىڭ باستاپقى كەزەڭىندە جول قوزعالىسى قاۋىپسىزدىگىنىڭ دەڭگەيىن ارتتىرۋ ءۇشىن مەكتەپ وكرۋگتەرىندە پاترۋلدىك پوليسيا ەكيپاجدارى، يۋۆەنالدى پوليسەيلەر كەزەكشىلىك ەتەتىن بولادى. بۇگىنگى تاڭدا مەكتەپتەردىڭ جانىنداعى جول بەلگىلەرىن اۋىستىرۋ، جاساندى تومپەشىكتەردى ورناتۋ جۇمىستارى جۇرگىزىلدى. بارلىعى 62 جاساندى تومپەشىك ورناتىلدى»، - دەدى سالتانات ازىربەك.
سونىمەن قاتار، «ابايلاڭىز، بالالار» جەدەل الدىن الۋ شاراسىنا دايىندىق كەزىندە جالپى ءبىلىم بەرەتىن، مەكتەپكە دەيىنگى ءبىلىم بەرۋ مەكەمەلەر اۋماعىندا 47 جاڭا جول بەلگىلەرى ورناتىلدى، 43 جول بەلگى قالپىنا كەلتىرىلدى، 10500 شارشى مەتر اۋماققا جولدى بەلگىلەۋ سىزىقتارى سالىندى جانە ت.ب.
پوليسەيلەردىڭ باستى مىندەتتەرىنىڭ ءبىرى - جول قاۋىپسىزدىگىن قامتاماسىز ەتۋ. وسىعان بايلانىستى پوليسيا دەپارتامەنتىنىڭ قىزمەتكەرلەرى قالا تۇرعىندارىن جول قوزعالىسى ەرەجەلەرىن قاتاڭ ساقتاۋعا شاقىرادى. سالتانات ازىربەك ەرەسەك تۇرعىندارعا جول ەرەجەلەرىن ساقتاۋعا، جول ءجۇرۋ بولىگىن بەلگىلەنبەگەن جەرلەردەن وتپەۋگە شاقىردى.
«قوعامنىڭ ءاربىر مۇشەسىنىڭ جول قوزعالىسى ەرەجەلەرىن مۇلتىكسىز ساقتاۋى وتە ماڭىزدى. قۇرمەتتى ەرەسەكتەر، بالالارىڭىزعا دۇرىس ۇلگى كورسەتىڭىزدەر. ايتپەسە، ولار بۇل ارەكەتتى ءسىز بولماعان كەزدە قايتالايدى»، - دەيدى سالتانات ازىربەك.
وكق الاڭىندا بريفينگكە قاتىسقان سپيكەر ستاتيستيكانى كەلتىردى. جەرگىلىكتى پوليسيا قىزمەتى باسقارماسىنىڭ مالىمەتىنشە، اعىمداعى جىلدىڭ 7 ايىندا الماتىدا بالالاردىڭ قاتىسۋىمەن 381 جول-كولىك وقيعاسى ورىن الىپ، 384 بالا جاراقات الىپ، 5 بالا قايتىس بولدى.
جۋرناليستەردىڭ سۇراقتارىنا جاۋاپ بەرە وتىرىپ، پد وكىلى قالادا اپاتتىق ورىندارعا تالداۋ جۇرگىزىلگەنىن، بۇل اۋداندار بويىنشا اپات ءجيى بولاتىن ۋچاسكەلەردى انىقتاۋعا مۇمكىندىك بەرگەنىن ايتتى:
الاتاۋ اۋدانى - رايىمبەك داڭعىلى، رىسقۇلوۆ كوشەسى، سولتۇستىك اينالما كوشەسى.
المالى اۋدانى - تولە بي داڭعىلى، سەيفۋللين داڭعىلى، بايتۇرسىنوۆ كوشەسى.
اۋەزوۆ اۋدانى – اباي داڭعىلى، التىنسارين كوشەسى، رايىمبەك داڭعىلى
بوستاندىق اۋدانى - ءال-فارابي داڭعىلى، جاندوسوۆ كوشەسى، جاروكوۆ كوشەسى.
جەتىسۋ اۋدانى - انگارسكايا كوشەسى، سولتۇستىك اينالما كوشەسى، جانسۇگىروۆ كوشەسى.
مەدەۋ اۋدانى – دوستىق داڭعىلى، قۇلجا تراكتى، حاليۋللينا كوشەسى
ناۋرىزباي اۋدانى – ءجۇنىسوۆ كوشەسى، رايىمبەك تراكتى، ءاشىموۆ كوشەسى
تۇركسىب اۋدانى - ءسۇيىنباي داڭعىلى، شولوحوۆ كوشەسى، مايلين كوشەسى.
«ءبىلىم بەرۋ مەكەمەلەرى اۋماعىندا كولىك جىلدامدىعىن باقىلاۋ ءۇشىن «سەرگەك» اوك-نىڭ 12 بەكەتى جۇمىس ىستەيدى. سونىمەن قاتار، 2023 جىلى «سەرگەك» اوك-نىڭ 97 پوستىن ورناتۋ جوسپارلانۋدا»، - دەپ قورىتىندىلادى سالتانات ازىربەك.