رەسپۋبليكا كولەمىندە ءوتىپ جاتقان “STOP-ترافيك” جەدەل الدىن الۋ ءىس-شاراسى بارىسىندا الماتى پوليسەيلەرى بەس جەزوكشەلەر ءۇيىن انىقتادى. سونداي-اق جاڭا تۋعان ءسابيدى ساتۋ دەرەگىنىڭ جولى كەسىلدى، – دەپ حابارلايدى almaty-akshamy.kz Polisia.kz. سىلتەمە جاساپ.
ۇيىمداسقان قىلمىسقا قارسى كۇرەس باسقارماسىنىڭ حابارلاۋىنشا، جەزوكشەلىكپەن اينالىساتىن ورىندار، سونداي-اق ادام ساۋداسىنا قاتىستى باسقا دا زاڭ بۇزۋشىلىقتار رەسپۋبليكالىق STOP-ترافيك” جەدەل الدىن الۋ ءىس-شاراسى بارىسىندا انىقتالدى.
ايتا كەتۋ كەرەك، الماتى قالاسى پروكۋراتۋراسىنىڭ ۇيلەستىرۋىمەن جەدەل جانە ارنايى ءىس-شارالار جۇرگىزىلدى.
– جىنىستىق ەكسپلۋاتاسيانىڭ الدىن الۋ ماقساتىندا ويىن-ساۋىق مەكەمەلەرىندە، مونشا كەشەندەرىندە، ساۋنالاردا، قوناقۇيلەردە جەدەل الدىن الۋ ءىس-شارالارى ۇيىمداستىرىلدى. ق ر قك-نىڭ 309-بابى بويىنشا قىلمىستىق ىستەردى تىركەۋگە نەگىز بولعان جەڭگەتايلىق پەن جەزوكشەلىكپەن اينالىسۋدىڭ 5 دەرەگى انىقتالدى. سونىمەن قاتار ارنايى ءىس-شارا بارىسىندا جاڭا تۋعان نارەستەنى ساتۋ ارەكەتىنىڭ جولى كەسىلدى. قىلمىستىق ءىس ق ر قك-نىڭ 135-بابى 2-بولىگى بويىنشا تەرگەلىپ جاتىر. سونداي-اق ەمدىك ماسساج جاسايتىن ورىننىڭ كەيپىن جامىلىپ، ينتيمدىك قىزمەت كورسەتۋمەن اينالىسقان ەكى ماسساج سالونىنىڭ زاڭسىز ارەكەتى انىقتالدى، – دەپ مالىمدەدى الماتى قالالىق پد ۇيىمداسقان قىلمىسقا قارسى كۇرەس باسقارماسىنىڭ باستىعى جانات نۇرعالييەۆ.