الماتى پوليسەيلەرى اسا ءىرى كولەمدەگى ەسىرتكى زاتىن تاركىلەدى

بۇل دەرەك بويىنشا سوتقا دەيىنگى تەرگەۋ باستالدى.

الماتى پوليسەيلەرى قاراعاندىلىق ەر ادامنان 650 گرامم ەسىرتكى زاتىن تاركىلەدى، دەپ حابارلايدى Almaty-akshamy.kz. 

ىشكى ىستەر مينيسترلىگىنىڭ رەسمي سايتىنداعى دەرەك بويىنشا، الدىن الا ءسوز بايلاسۋ ارقىلى اسا ءىرى كولەمدە پسيحوتروپتىق زاتتاردى زاڭسىز الۋ، ساقتاۋ جانە ساتۋ بويىنشا قىلمىستىق قۇقىق بۇزۋشىلىق جاسادى دەگەن كۇدىكپەن قاراعاندى ​​وبلىسىنىڭ تۋماسى، 39 جاستاعى ەر ادام ۇستالدى.

«اۋەزوۆ اۋداندىق پب جپقب ۋچاسكەلىك ينسپەكتورى ب.ەسىمدى ەر ادامدى ۇستاۋ كەزىندە جانە جەكە ءتىنتۋ بارىسىندا 80 دانا پسيحوتروپتىق زاتتار تابىلدى جانە تاركىلەدى. ولاردى ول اۋەزوۆ اۋدانىنىڭ اۋماعىنا قويماق بولعان.  پوليسيا قىزمەتكەرلەرى تۇرعىلىقتى جەرى بويىنشا ءتىنتۋ جۇرگىزگەننەن كەيىن پسيحوتروپتىق زات سالىنعان 255 دانا الدىن الا قاپتالعان سومكەلەر جانە سول پسيحوتروپتىق زاتى بار 166 پوليمەرلى كاپسۋلا مەن ەكى قالتا تارازىسىن تاركىلەدى. بارلىعى 650 گرامم ەسىرتكى زاتىن قۇرادى»، – دەدى اۋەزوۆ اۋداندىق پب باستىعى ۇلان ءابىلحايىر.

سوت-حيميالىق ساراپتاماسى انىقتاعانداي، تاركىلەنگەن ەسىرتكى پسيحوتروپتى 2-پيرروليدين نەمەسە قاراپايىم تىلمەن ايتقاندا، «سكوروست» بولىپ تابىلادى. سونداي-اق بايانداماشىنىڭ ايتۋىنشا، بۇل ءىرى كولەمدى قۇرايدى جانە مۇلىكتى تاركىلەۋمەن ون جىلدان ون بەس جىلعا دەيىن باس بوستاندىعىنان ايىرۋ تۇرىندەگى جازانى قاراستىرادى.

بۇل دەرەك بويىنشا ق ر قك-نىڭ 297-بابى 3ء-بولىمى 1،3-تارماعىنا سايكەس سوتقا دەيىنگى تەرگەۋ باستالدى. ۇستالعان ادام الماتى قالاسى پد ۋاقىتشا ۇستاۋ يزولياتورىنا قامالدى.