قازاقستان تەننيسى تاريحىنداعى بەسىنشى ATP ءتۋرنيرى جانە الماتىدا وتەتىن العاشقى جارىسقا دايىندىق قالاي ءجۇرىپ جاتىر؟ بۇل تۋرالى قتف ماتەريالىندا باياندالادى.
كوپفۋنكسيونالدى Almaty Arena كەشەنى الەمنىڭ ەڭ مىقتى تەننيسشىلەرىن قابىلداۋعا تولىقتاي دايىن. ورتالىق كورتتا جەكەلەي جانە جۇپتىق رازريادتاردا 30 ماچ وتەدى دەپ جوسپارلانعان. ال №1 كورتتا تاعى 24 ماچ ويناتىلادى.
Almaty Arena ارنايى تەننيس ارەناسى بولماسا دا، ءتۋرنيردى ۇيىمداستىرۋشىلار سپورت كەشەنىن بارىنشا قىسقا مەرزىمدە تەننيس ءۇشىن تولىق بەيىمدەدى.
نەگىزگى ارەنانىڭ تريبۋنالارى 6 مىڭ كورەرمەنگە ارنالعان، ال قوسىمشا ارەنادا 1 مىڭ كورەرمەندى قابىلداي الادى. سپورت كەشەنىنىڭ سىرتىندا 3 جاتتىعۋ كورتىنا ارنالعان ۋاقىتشا قۇرىلىم سالىنعان.
ۇيىمداستىرۋ كوميتەتى Almaty Open ءتۋرنيرىنىڭ بولاشاقتا دامۋ مۇمكىندىكتەرىن جوعارى باعالاپ وتىر. وسىعان بايلانىستى الەمدىك تاجىريبەگە سۇيەنىپ، تەننيس تۋرنيرلەرىن ۇلكەن مۋلتيسپورتتىق ارەنالاردا وتكىزۋدى جوسپارلاپ وتىر. مۇنداي ءتاسىل "ۇلكەن دۋلىعا" جانە Masters سەرياسىنداعى بىرنەشە تۋرنيرلەردى قوسپاعاندا. الەمدىك تۋرنيرلەردىڭ شامامەن 70%-ىندا قولدانىلادى.
ATP 250 Almaty Open ءتۋرنيرى ءۇشىن جالپى اۋدانى 2 مىڭ شارشى مەتردەن اساتىن ءۇش جاتتىعۋ كورتى جانە شامامەن 1700 شارشى مەتردى قۇرايتىن ەكى ويىن كورتى توسەلدى.
- كورتتار ەرەكشە فانەرادان، پاتەنتتەلگەن تەحنولوگيامەن جاسالعان.
- بۇل كورتتار حالىقارالىق تەننيس فەدەراسياسى (ITF)، ATP جانە WTA تاراپىنان سەرتيفيكاتتالعان.
- كورتى ۆەنگريادان Rebound Sport kft كومپانياسى جەتكىزدى.
- بۇل كومپانيا ەۋروپاداعى حالىقارالىق تۋرنيرلەرگە ارنالعان تەننيس جابىندارىمەن اينالىسادى.
- كورتتار ءپورتاتيۆتى پانەلدەردەن قۇراستىرىلادى.
- ءبىر كورتتىڭ سالماعى شامامەن 15 توننانى قۇرايدى جانە ونى تاسىمالداۋ ءۇشىن ءبىر فۋرا قاجەت.
- ورتالىق كورت 361 پانەلدەن تۇرادى.
Almaty Open ءتۋرنيرى: جۋرناليستەر مەن كورەرمەندەرگە ارنالعان شارالار
مەديا ورتالىقتا جۋرناليستەر ءۇشىن بارلىق قاجەتتى جاعدايلار جاسالعان. جۇمىس ىستەۋگە ارنالعان بولمەلەر، باسپا ءسوز كونفەرەنسيالارى وتەتىن جالپى زال جانە كوفە-برەيك ايماعى قاراستىرىلعان.
Almaty Arena اينالاسىنداعى اۋماق تۋرنير كەزىندەگى ەڭ تانىمال ورىنعا اينالادى. مۇندا تۇراقتى تۇردە "تەننيس فەستيۆالى" ۇيىمداستىرىلادى، ول مۋزىكا، ءتۇرلى تەننيس سايىستارى: "ءدال سوققى"، "تەننيس دارتسى" سياقتى ويىنداردى قامتيدى. سونىمەن قاتار، تۋرنيرگە ارنالعان برەندتىك كيىمدەر مەن مەرچەندايزينگ ونىمدەرىنىڭ ساتىلىمى، جۇلدەلەر ۇتىسى، ەڭ كىشكەنتاي كورەرمەندەر مەن جاسوسپىرىمدەرگە ارنالعان "كيدس زوناسى"، امفيتەاتر ساحناسى، تۋرنير ماچتارىن كورۋگە ارنالعان ۇلكەن ەكران جانە فوتوزونا ورناتىلادى. اۋە شارى، فۋد-كورتتار، دەمەۋشىلەر مەن سەرىكتەستەردىڭ كورمەلەرى دە كەلۋشىلەردى بەي-جاي قالدىرماسى انىق.
بۇل شارالار Almaty Open ءتۋرنيرىن تەك سپورتتىق جارىس قانا ەمەس، جان-جاقتى مادەني جانە ويىن-ساۋىقتىق ءىس-شاراعا اينالدىرۋعا باعىتتالعان.
Almaty Open ءتۋرنيرىنىڭ ترانسلياسياسى الەمنىڭ 40-تان استام ەلىندە كورسەتىلەدى
Almaty Open ءتۋرنيرىنىڭ ترانسلياسيالارى 40-تان استام ەلدە كورسەتىلەتىن بولادى. تەلەديدار ارقىلى ءتۋرنيردى شامامەن 3 ميلليون كورەرمەن تاماشالايدى، ال الەۋمەتتىك جەلىلەر، ستريمينگ جانە باسقا پلاتفورمالار ارقىلى جالپى 8،5 ميلليون ادام تاماشالايدى.
قازاقستان اۋماعىندا ماچتاردىڭ تىكەلەي ترانسلياسيالارى قازاقستان تەننيس فەدەراسياسىنىڭ رەسمي سايتىندا – ktf.kz، سونداي-اق، Qazsport جانە Insport سپورتتىق تەلەارنالارىندا كورسەتىلەدى.
تۋرنير جازبالارىن 31 ارنا، Sport Plus Qazaqstan جانە Almaty TV ارنالارىنان تاماشالاۋعا بولادى.
تۋرنير ماچتارىنا بيلەتتەردى ticketon.kz جانە almaty-arena.kz سايتتارىنان ونلاين ساتىپ الۋعا بولادى. بيلەتتەردىڭ باعاسى 3000 تەڭگەدەن باستالادى.
ATP 250 Almaty Open ءتۋرنيرى 13-20 قازان ارالىعىندا وتەدى. جەرەبە 12 قازاندا شىمبۇلاقتا وتەدى.