تۇزدىباستاۋ اۋىلىندا 22 مىڭ ادام تۇرادى
«اپتاپ ىستىقتا اۋىز سۋسىز قالدىق». وسىلاي دەپ ارنامىزعا جۇگىنگەن الماتى وبلىسى تۇزدىباستاۋ اۋىلىنىڭ تۇرعىندارى 2 ايدان بەرى تىرشىلىك ءنارىنسىز وتىرمىز دەپ شاعىمىن ايتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
تامشى سۋدان تارىققان تۇزدىباستاۋلىقتاردىڭ ايتۋىنشا، اكىمدىكتىڭ تابالدىرىعىن توزدىرعالى تالاي جىل بولىپتى. ۋادەگە تويعان حالىق شەلەگىن ارقالاپ اكىمدىك عيماراتىنا بارۋدى ادەتكە اينالدىرىپتى. الايدا ماسەلەنىڭ شەشىلەر ءتۇرى جوق.
«2 اي بولدى سۋ جوق. مەن 6 كۋب باسسەيندى 18 مىڭعا ساتىپ الدىم. باسسەيندى سۋعا تولتىرىپ، ىشەمىز»، – دەدى تۇزدىباستاۋ اۋىلىنىڭ تۇرعىنى زاكير تۇردىمامەتوۆ.
«سۋ جوق، سىزدىقتاپ اعاتىن ەدى، ول دا بولماي تۇر. تۇنگى ساعات 22:00-دە سۋ بەرەدى، كەيدە تاڭعا دەيىن كۇتىپ جۇرەمىز. قولىمىزدى دالادان جيناعان سۋمەن جاۋامىز»، – دەدى تۇزدىباستاۋ اۋىلىنىڭ تۇرعىنى گۇلميرا قۇرمانبايەۆا.
ال اۋىل ادامدارىنىڭ ارىزىن تىڭداۋعا كەلگەن «تالعار سۋ» مەكەمەسى ماسەلەنىڭ شەشىمىن تەك مەملەكەتكە وتكەن سوڭ عانا شەشۋگە بولادى دەپ سەندىردى. ياعني جەكەنىڭ جەتەگىندە كەتكەن سۋ قۇبىرلارىن ءبىر ارىق جەلىسىنە قوسۋ كەرەك.
«ءتاريفتىڭ باعاسى وسى كۇنگە دەيىن تۇزدىباستاۋ اۋىلدىق وكرۋگىندە 122 تيىن بولىپ كەلگەن. جەكە كومپانيالارمەن كەلىسىمشارتتا كورسەتىلىپ تۇرادى، ءبىز سوعان ساي جۇمىس ىستەيمىز»، – دەدى «تالعار سۋ» شارۋاشىلىق جۇرگىزۋ قۇقىعىنداعى مكك باسشىسى قۋاتبەك سماعۇلوۆ.
22 مىڭ حالقى بار تۇزدىباستاۋ اۋىلىندا اۋىز سۋ ماسەلەسى جاۋىر بولعالى قاشان. اقجاعىلالار بۇل ماسەلەنى ءبىر جاقتى ەتەمىز دەپ سەندىردى.
«اۋدان تاراپىنان اقشا ءبولىندى دەپ وتىرمىز. 90 ميلليون شاماسىندا پزد جاساۋعا، ىشىندە كاناليزاسياسى دا، سۋ قۇبىرى دا ەنگىزدىك. اۋىستىرۋ ءۇشىن قاراجات قاراستىرىلعان»، – دەدى تۇزدىباستاۋ اۋىلدىق وكرۋگىنىڭ اكىمى ميراس بايمولدانوۆ.
اۋىل ماڭىندا سالىنىپ جاتقان 12 شاقىرىمدىق ماگيسترالدى سۋ قۇبىرى اياقتالسا، اۋىل حالىقىنىڭ قاجەتىنە جارار ەدى دەيدى تۇزدىباستاۋ اكىمى. 250 مەتر شارشى كۋبتى قۇرايتىن قوس قۇدىقتىڭ قۇرىلىسى الداعى قاراشا ايىندا اياقتالماق. ال ازىرگە جەرگىلىكتى جۇرت 1968 جىلى سالىنعان ەسكى قۇبىردان سۋ كۇتۋگە ياكي ساتىپ الىپ ىشۋگە ءماجبۇر.