ۇلكەن تاس جول ەلدى مەكەندى قاق بولگەن
«قورشاۋدا قالدىق». قاراساي اۋدانىنا قاراستى بايتوبە اۋىلىنىڭ تۇرعىندارى اۋىل ماڭىنا جاڭا ۇلكەن اينالما جولى تۇسكەلى ءتۇن ۇيقىمىز ءتورت ءبولىنىپ، ابىگەر بولعان. ويتكەنى 6 جولاقتى رەسپۋبليكالىق تاس جولدا اۋىلعا كىرەتىن جولايرىق سالىنباعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
الماتى وبلىسىنداعى 500 وتباسى اۋىلدان شىعا الماي قالعان. ولاردىڭ ايتۋىنشا، ۇلكەن تاس جول ەلدىمەكەندى قاق ءبولىپ ءوتىپ، بايتوبەگە كىرەتىن جول قالدىرماعان. كەسىرىنەن تۇرعىندار باسپاناسىنا تاۋ اسىپ، باتپاق كەشىپ جەتىپ ءجۇر.
«بالالارىمىز 3 مەزگىل مەكتەپكە بارادى. «باكاد جابىلادى» دەپ ءبىز ارالدا قالدىق. ۋچاسكەنى ساتقان كەزدە، باكاد تۇسەدى دەگەن سوڭ، حالىق قۋانىپ العان. اكىمدىككە ايتساق، بىلمەيتىنىن ايتتى. ولار جەر ساتىلعان كەزدە قالاي بىلمەگەن؟ قۇجاتىمىز بار»، – دەدى اۋىل تۇرعىنى بۇركىت بايداۋلەتوۆ.
وسىندا قونىس تىككەن قاراپايىم حالىق قالاعا قاتىناپ، ءناپاقا تابادى. سوندىقتان ايلىقتىڭ جارتىسى اۋىلدى اينالىپ ءوتىپ كەلەتىن تاكسيگە كەتەدى، ول ازداي ەكى كۇننىڭ بىرىندە كولىك بۇزىلىپ جولدا قالاتىن كورىنەدى.
«كەلەشەگىمىز بالالارىمىز عوي. وسىلار قينالماي مەكتەبىنە، بالاباقشاعا بارىپ كەلگەنىن قالايمىز. ۋادە بەرەدى. ءبىراق تۇك تە جوق»، – دەدى اۋىل تۇرعىنى ماليكا يمانقۇلوۆا.
ال سالا ماماندارىنىڭ ايتۋىنشا، 16 ەلدى مەكەندى باسىپ وتەتىن ۇلكەن الماتى جولىندا تەك 10 شاقىرىمدىق اراقاشىقتىقتا جولايرىق جاسالۋى ءتيىس. سايكەسىنشە، ۇلكەندى-كىشىلى تەحنيكاعا توسقاۋىل بولاتىنداي ءقاۋىپ بولماۋى كەرەگىن ايتادى. ياعني بۇرىلىستى كەز كەلگەن جەرگە قويۋعا بولمايدى.
«قالا قۇرىلىسىن رەتتەۋگە سايكەس، جەرگىلىكتى اتقارۋشى ورگاندار ەلدىمەكەندەرگە شەگىندە جول جيەگىن سالۋعا ءتيىستى قارجىنى ءبولۋ ارقىلى بەكىتىلگەن جوباسىن ىسكە اسىرۋ قاجەت. كەمەرتوعانعا قاراستى بايتوبە اۋىلىنا كەلەتىن بولساق، بۇل رەتتە نورموتيۆتىك قۇجاتتارعا سايكەس، 1 ا تەحنيكالىق اۆتوموبيلدەر ساناتىنداعى جولدارمەن ءبىر دەڭگەيدە قابىسۋعا جول بەرىلمەيدى»، – دەدى ق ر يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ باسقارما جەتەكشىسى جاندوس يگەمبايەۆ.
بايتوبەلىكتەر بازىناسى بيلىككە جەتكەنشە، قالاعا قاتىناۋى قيىنداي تۇسكەنىنە نارازى. جۇرتشىلىق ۇلكەن اينالما جولى تولىق قولدانىسقا بەرىلسە، قازىرگى قارا جولدان دا قۇر قالامىز دەپ مۇڭىن شاقتى.
«ءبىزدىڭ مەكتەبىمىز مىناۋ كەمەرتوعاندا تۇر. ەگەر اينالىپ بارساق، 15 كم اسىپ كەتەدى. كەپتەلىس تاعى بار. ءبىز ءارى قىسقا، ءارى ىڭعايلى جول جاساپ بەرۋىن سۇرايمىز»، – دەدى اۋىل تۇرعىنى ەرمەك تۇرداقىنوۆ.
«ءبىز دەرەۋ شەشىم قابىلداپ، اۋىلعا كىرەتىن قوسىمشا جولدى قاراستىرىپ بەردىك. ءقازىر ول جولايرىق 70 پايىز اياقتالىپ قالدى. اتالعان جول قۇرىلىسىن وسى جىلدىڭ ءساۋىر ايىندا وتكىزۋدى جوسپارلاپ وتىر. ول اياقتالسا، اۋىلعا كىرىپ-شىعۋ قيىندىق تۋدىرمايدى، – دەدى قاراساي اۋدانى اكىمنىڭ ورىنباسارى مارلەن قاسەنوۆ.
ازىرگە بايتوبەلىكتەرگە اۋىلعا كىرەتىن قوسىمشا جول قۇرىلىسىنىڭ اياقتالۋىن كۇتۋدەن باسقا امال جوق.