الماتى وبلىسىندا ءىرى دروپپەرلەر توبى اشكەرەلەندى، - دەپ حابارلايدى aqshamnews.kz.
الماتى وبلىسىنىڭ پوليسيا قىزمەتكەرلەرى ىشكى ىستەر مينيسترلىگىنىڭ كيبەرقىلمىسقا قارسى ءىس-قيمىل دەپارتامەنتى مەن وبلىستىق پروكۋراتۋرانىڭ ۇيلەستىرۋىمەن الاياقتىق جولمەن الىنعان اقشانى كريپتوۆاليۋتاعا اينالدىرۋمەن اينالىسقان ۇيىمداسقان دروپپەرلەر توبىنىڭ قىزمەتىن توقتاتتى. تەرگەۋ بارىسىندا وسى قىلمىستىق سحەماعا قاتىسى بار 20-دان استام تۇلعا انىقتالدى. ولاردىڭ قاتارىندا دروپتار، دروپ-جەتەكشىلەر، كۋراتورلار مەن مەنەدجەرلەر بولعان.
– ءار قاتىسۋشى بىرنەشە بانكتىك شوتتى (5-7-گە دەيىن) پايدالانىپ، ءاربىر ترانزاكسيادان 1-3% مولشەرىندە سىياقى الىپ وتىرعان. جاڭا دروپتاردى تارتۋ Telegram ارنالارى ارقىلى جۇرگىزىلگەن. جەدەل ءىس-شارالاردىڭ ناتيجەسىندە جالپى سوماسى 8 ميلليون تەڭگەدەن استام قارجى قوزعالىسى توقتاتىلىپ، اي سايىنعى اينالىمى 100 ميلليون تەڭگەدەن اساتىن كريپتوۆاليۋتالىق ءاميان انىقتالدى. بۇل ءامياننىڭ قىلمىستىق سحەمانى ۇيىمداستىرۋشىعا تيەسىلى ەكەندىگى بەلگىلى بولدى. قازىرگى ۋاقىتتا بانكتەردەن قارجىلىق وپەراسيالار تۋرالى اقپارات الۋ ءۇشىن قاجەتتى قۇجاتتار راسىمدەلىپ، انىقتالعان اكتيۆتەردى تاركىلەۋ ماسەلەسى قاراستىرىلۋدا، – دەپ مالىمدەدى پوليسيا وكىلدەرى.
جەدەل-ىزدەستىرۋ شارالارىنىڭ ناتيجەسىندە جەتى ادام ۇستالدى، ولاردىڭ اراسىندا ءۇش كۋراتور، ءبىر مەنەدجەر جانە ءۇش دروپپەر بار. بارلىعى ۋاقىتشا ۇستاۋ يزولياتورىنا قامالدى. قۇقىق قورعاۋ ورگاندارى ازاماتتاردى ساق بولۋعا جانە كۇماندى قارجىلىق ۇسىنىستاردان باس تارتۋعا شاقىرادى. بەيتانىس ادامداردىڭ وتىنىشىمەن بانكتىك شوتتار اشۋ نەمەسە قارجىلىق وپەراسيالارعا قاتىسۋ قىلمىستىق جاۋاپكەرشىلىككە اكەلۋى مۇمكىن.