الماتى وبلىسىندا وقۋشىلار مەكتەپكە بارا الماي وتىر

ءۇش مەزگىل جۇرەتىن جالعىز اۆتوبۋس ءبىر بارعاندا ءۇش مەكتەپتەن وقۋشى جينايدى.

الماتى وبلىسىندا ءبۇتىن ءبىر شاعىناۋداننىڭ وقۋشىلارى مەكتەپكە بارا الماي وتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.

اۋىل اراسىن جالعايتىن جالعىز اۆتوبۋستىڭ جىرى جەرگىلىكتى جۇرتقا جاۋىر بولعالى جىلدار بولعان. ەكى مىڭعا جۋىق حالقى بولسا دا، ەلدىڭ قىزمەتىنە جارايتىن قوعامدىق كولىك ماسەلەسى ءالى شەشىلمەگەن. ال اكىمدىكتەن بەرىلگەن جالعىز اۆتوبۋس ءبىر كۇن جۇرسە، ەكى كۇنى توقتاپ تۇرادى.

«بالالارىم مەكتەپكە بارعالى 5 جىل بولدى. تورتەۋى بارادى ساباققا. تاڭەرتەڭ ساعات 6:00-دە بالانى وياتامىز. ساعات 7:00-دە اۆتوبۋس كەلۋى كەرەك. ال كەي كۇنى ول اۆتوبۋس كەلمەيدى. تاكسي شاقىرامىز. اينالدىرعان 3-4 تاكسي بار اكەسىنىڭ قۇنىن سۇرايتىن»، – دەدى ارمان اۋىلىنىڭ تۇرعىنى انارا اتابەكوۆا.

«كىرسەڭ، شىعا المايسىڭ، شىقساڭ، كىرە المايسىڭ. كەشە ءبىر كۇنگە تاكسيگە 5 مىڭ تولەدىك. ءۇش قىزىم ءۇش ۋاقىتتا وقيدى. ءقازىر قىزىم شىقتى. ەندى 1،5 ساعات اۆتوبۋس كۇتۋى كەرەك»، – دەدى ارمان اۋىلىنىڭ تۇرعىنى بالجان دوسمىرزايەۆا.

اۆتوبۋس ارمان بولعان "ارماندىقتار" وسىدان ءبىر اي بۇرىن عانا بەس بالانى كولىك قاعىپ، ءبىر بالانىڭ كوز جۇمعانىن ايتىپ وتىر. ول كەزدە دە اۋىلعا قاتىنايتىن جالعىز اۆتوبۋستىڭ اقىلى جولمەن جۇرگەندەگى بەرەشەگى ءۇشىن، شلاگباۋم اشىلماي قالعان. سول ساتتە قوعامدىق كولىكتەن ءتۇسىپ جولدى كەسىپ وتپەك بولعان بالالاردى ماشينا قاققان.  

تەحنيكامىزدى تىڭعىلىقتى ەتىپ، اۆتوبۋس بەرسىن دەگەن اۋىل ازاماتتارى ىلە اۋداندىق اكىمدىگىنە باردى. جەرگىلىكتى بيلىك بۇل ماسەلەدەن حاباردار.

«نەگىزگى قوعامدىق كولىك ماسەلەسى شەشىلسە ەكەن. اۆتوبۋس شەشىپ بەرىڭىزدەر. ەكى اپتا وقۋشىلارىمىز ساباققا بارمادى. كەشەلى بەرى كىسىلەر شۋىلداپ جاتقان سوڭ، اۆتوبۋسىمىز ءجۇرىپ قالدى»، – دەدى ارمان اۋىلىنىڭ تۇرعىنى گۇلنار ساقوۆا.

«وتەگەن باتىر مەن "ارمان" شاعىناۋدانى اراسىندا جول سالىپ باستادىق. قىس بولىپ كەتتى دە كەلەسى جىلعا قالدى. جول بىتسە، مارشرۋت بەرىلەدى. ماعان جەتكەن مالىمەت بويىنشا، 10 كۇن كولەمىندە اۆتوبۋس جۇرمەپتى»، – دەدى ەنەرگەتيچەسكيي اۋىلدىق وكرۋگىنىڭ اكىمى قانات راحيموۆ.

وكرۋگ اكىمى اۆتوبۋستى بۇگىن جۇرگىزدىك دەگەنىمەن، ءۇش مەزگىل جۇرەتىن جالعىز اۆتوبۋس ءبىر بارعاندا ءۇش مەكتەپتەن وقۋشى جينايدى.

«بالا سانى كوپ. تاڭەرتەڭ سىيماي قالادى، ءبارى شىققان كەزدە. اۆتوبۋس بۇزىلىپ، جوندەدىك»، – دەدى اۆتوبۋس جۇرگىزۋشىسى باقبەرگەن توقمامبەتوۆ.

«جانارمايى قاتىپ، جۇرۋگە جارامسىز بولدى» دەگەن قوعامدىق كولىك بۇگىن جۇرە باستاپتى. ال جەرگىلىكتى بيلىك وكىلدەرى اۆتوبۋس سانىن كوبەيتۋگە بارىن سالىپ جاتقانىن جەتكىزدى.