الماتى وبلىسىندا مەشىت اشىلدى

مەشىتتىڭ جالپى سىيىمدىلىعى – 1000 ورىن.

الماتى وبلىسى تالعار اۋدانىنا قاراستى قىزىلتۋ اۋىلىندا جاڭادان مەشىت اشىلىپ، ەل يگىلىگىنە بەرىلدى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.

يگى راسىمگە قمدب ءتوراعاسىنىڭ ورىنباسارى، نايب ءمۇفتي  كەنجەالى قوڭىراتباي ۇلى، الماتى وبلىسىنىڭ باس يمامى قۋانىش باقىتبەك ۇلى جانە اۋىل تۇرعىندارى، ءدىن جاناشىرلارى قاتىستى. جاماعاتقا  باس ءمۇفتي ناۋرىزباي قاجى تاعان ۇلىنىڭ قاسيەتتى زۇلحيججا ايىنىڭ  قۇتتىقتاۋى مەن سالەمىن جەتكىزگەن نايب ءمۇفتي:

«مەشىت – مۇسىلماننىڭ جاراتۋشىسىنا قۇلشىلىق جاساپ، تاۋبەگە كەلەر، جانىنا جارا سالعان، حاكىم اباي ايتقانداي «قيامەتشىل دۇنيەنىڭ» كىرىنەن تازارىپ، بار ارمان، ءۇمىتىنىڭ اقتالۋىن تىلەپ، دۇعا جاسايتىن ءقادىرلى ءۇيى. ال، مەشىتتىڭ قابىرعاسىنان  ءدىني ۋاعىز تىڭداپ، ءبىلىمىن جەتىلدىرىپ، ساۋاتىمدى ارتتىرامىن، ۇستازدان ءتالىم الامىن دەگەن مۇسىلماندار ءۇشىن – تاربيە ورداسى» دەدى.

اۋىل حالقىن اۋىزبىرشىلىك پەن ىنتىماققا شاقىرىپ،  ىستەرىنە ساتتىلىك پەن بەرەكە تىلەدى. سونداي-اق كەنجەالى قوڭىراتباي ۇلى اللا ۇيىنە قۇران كارىم جانە ارنايى سىيلىقتى جاڭا يمامعا تارتۋ ەتىپ،  مەشىت سالعان كاسىپكەر ازاماتتارعا العىس ايتىپ، قۇرمەت كورسەتىپ، كوپشىلىككە اق  باتاسىن بەردى. بۇدان كەيىن جاماعات جاڭا مەشىتتە «زۇلحيججا ايىنىڭ العاشقى ون كۇنىنىڭ ارتىقشىلىعى» تاقىرىبىندا ۋاعىز تىڭداپ، العاشقى جۇما نامازىن وتكىزدى.

ايتا كەتەيىك، قىزىلتۋ اۋىلىنىڭ «مولداحمەت» مەشىتى 2009-2012 جىلى تۇرعىنداردىڭ كومەگىمەن سالىنىپ، قولدانىسقا بەرىلسە، 2020 جىلى اپاتتى جاعدايعا بايلانىستى ءسۇرىلىپ،  كاسىپكەر تالعات ورىنباسار ۇلىنىڭ دەمەۋشىلىگىمەن قايتا بوي كوتەردى. «Ibrahim Khalil Alla»  اتاۋى بەرىلگەن مەشىتتىڭ جالپى سىيىمدىلىعى – 1000 ورىن. ءدارىسحانا مەن دارەتحانا، كولىك تۇراعى جانە بالالارعا ارنالعان سپورت الاڭقايىمەن قامتىلعان.