ءبىلىم ءبولىمىنىڭ وكىلى سۇراققا ماردىمدى جاۋاپ بەرە المادى.
الماتى وبلىسىندا مەملەكەت بيۋدجەتىنە سالىنعان مەكتەپ قاڭىراپ تۇر. قۇرىلىسىنا قىرۋار قاراجات كەتكەن عيمارات ءقازىر، اۋىل تۇرعىندارىنىڭ ايتۋىنشا، قاڭعىباستار مەن ناشاقورلاردىڭ مەكەنىنە اينالعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
ايتەي اۋىلىنىڭ قاق تورىندە قاڭىراپ تۇرعان بۇل عيمارات 2008 جىلى سالىنعان. مەكتەپ رەتىندە پايدالانۋعا بەرىلگەن نىساننىڭ الىپ جاتقان اۋماعى دا از ەمەس. الايدا مەملەكەت قاراجاتىنا بوي كوتەرگەن ءبىلىم ورداسىندا ەسىكتەگى قۇلىپتان باسقاسىنىڭ ءبارى قيراپ بىتكەن.
«وبال، ارينە. اقشاعا سالىنعان دۇنيە. يا حالىققا پايداسى تيسە ەكەن، بوسقا قاراۋسىز قالدى. داربازاسى دا اڭعال-ساڭعال. مىسالى، مەنىڭ بالالارىم مەكتەپكە بارادى. بالالارىمدى جالعىز جىبەرۋگە قورقامىن»، – دەدى ايتەي اۋىلىنىڭ تۇرعىنى تامارا ابدىرەموۆا.
ەلدى مەكەن تۇرعىندارى بۇل عيمارات قاراۋسىز قالعالى ناشاقورلار مەن ىشىمدىككە سالىنعانداردىڭ ورداسىنا اينالعانىن ايتتى. راسىندا، بۇرىنعى مەكتەپتىڭ اۋماعىندا سىرانىڭ بوس بوتەلكەسى، كيىم-كەشەك پەن وزگە دە زاتتار جاتىر.
وكرۋگ اكىمى جۇمىس بابىمەن وزگە جەردە جۇرگەنىن سىلتاۋراتىپ، «بارىنە قاراساي اۋداندىق ءبىلىم ءبولىمى جاۋاپتى» دەپ قۇتىلدى. مەكتەپتىڭ نە سەبەپتى بوس قالعانىن بىلمەيتىن سىڭايلى. ءبىلىم ءبولىمىنىڭ وكىلى دە بۇل سۇراققا ماردىمدى جاۋاپ بەرە المادى.
«ەسكى مەكتەپتىڭ عيماراتى «اپاتتى جاعدايدا» دەپ تانىلماعان. ول تۋرالى ءبىزدىڭ قولىمىزدا ەشقانداي قۇجات جوق. ەندى ونىمەن ارنايى ماماندار اينالىسادى. جاڭا مەكتەپ سالىندى. البەتتە، بارلىق وقۋشى سول جاڭا مەكتەپكە بارعىسى كەلەدى. ول 1200 ورىندىق، مەكتەپتە 1500 بالا سىيىپ تۇرعاندىقتان، سول مەكتەپكە كوشىرىلگەن»، – دەدى قاراساي اۋداندىق ءبىلىم ءبولىمى باسشىسىنىڭ مىندەتىن اتقارۋشى اسەل ەركىنبايەۆا.
اكىمدىك وكىلىنىڭ سوزىنە سەنسەك، بۇعان دەيىن بىرنەشە رەت تەكسەرىس جۇرگىزگەن ارنايى كوميسسيا كەلەشەكتە تاعى جۇمىسىن جالعاستىرماق. باستى ماقسات – عيماراتتىڭ جارامدى نە جارامسىز ەكەنىن انىقتاۋ.