كريمينالدىق پوليسيا قىزمەتكەرلەرى مال ۇرلىعىمەن اينالىسقان كۇدىكتىلەردى قۇرىقتادى.
الماتى وبلىستىق ءىىد باستىعىنىڭ ورىنباسارى، پولكوۆنيك سەرىك شالحاروۆ وڭىردە مال ۇرلىعى دەرەگىن اشۋمەن اينالىساتىن ارنايى توپتار قۇرىلعانىن ايتتى، دەپ حابارلايدى Almaty-akshamy.kz.
جەدەل ىزدەستىرۋ ءىس-شارالارىنىڭ ناتيجەسىندە ۇيعىر، كەگەن، تالعار اۋداندارىندا، سونداي-اق قونايەۆ قالاسىندا مال ۇرلاپ، ساتۋمەن اينالىسقان قىلمىستىق توپ ۇستالدى. قازىرگى تاڭدا ولارعا مال ۇرلىعىنىڭ 7 دەرەگى بويىنشا ايىپ تاعىلىپ وتىر.
«جەدەل ءىس-شارالار بارىسىندا پوليسيا قىزمەتكەرلەرى بىرنەشە اۋداندا مال ۇرلاعان 1993، 1984 جانە 1983 جىلى تۋعان ەر ادامداردى ۇستادى. ولارعا 16 باس ءىرى قارا مەن ەكى جىلقى ۇرلادى دەگەن ايىپ تاعىلىپ وتىر»، - دەدى پوليسيا پولكوۆنيگى سەرىك شالحاروۆ.
ق ر قىلمىستىق كودەكسىنىڭ 188-1 بابى «مال ۇرلىعى» بويىنشا سوتالدى تەرگەۋ باستالدى.