جەر ۋچاسكەسىن ساتىپ الاردا اۋماقتىڭ قىزىل سىزىقتا تۇرعانىن ەشكىم ەسكەرتپەگەن
الماتى وبلىسىندا تۇرعىن ءۇي توڭىرەگىندە داۋ تۋدى. وسىدان ءبىر اپتا بۇرىن قاراساي اۋدانىنىڭ جەر ءبولىمى جۇزدەگەن باسپانانىڭ سۇرىلەتىنى تۋرالى حابارلاعان. سەبەبى كوكوزەك اۋىلىنىڭ ىرگەسىنەن گاز قۇبىرى وتەدى، دەپ حابارلايدى Almaty-akshamy.kz Qazaqstan.tv-گە سىلتەمە جاساپ.
تالاپ بويىنشا ماگيسترالدىڭ ەكى جاعىندا 150 مەترگە دەيىن نىسان بولماۋى ءتيىس. مۇنى جاقىندا عانا ەستىگەن تۇرعىندارعا توبەسىنەن جاي تۇسكەندەي اسەر ەتكەن. جانار سەيىتقوجايەۆا ءتورت جىلدان بەرى بار تاپقانىن باسپاناسىنا سالىپ كەلەدى. ءىشىن تولىق بىتىرگەنشە قىرۋار قارجى كەتكەنىن ايتادى. جەر ۋچاسكەسىن ساتىپ الاردا اۋماقتىڭ قىزىل سىزىقتا تۇرعانىن ەشكىم ەسكەرتپەدى دەيدى.
«ارامىزدا 137 ءۇيدى سالىپ تاستاعاندار جانە ونىڭ 10 شاقتىسىندا عانا زاڭدى قۇجات بار ۇيلەرىندە. باسقامىزدا قۇجات جوق. قانشاما كرەديت الدىق، كوپ بالالى وتباسىلار بار، مۇگەدەكتىگى انىقتالعان وتباسىلار بار. جانە جالعىزباستى انالار تۇرادى»، - دەيدى كوكوزەك اۋىلىنىڭ تۇرعىنى جانار سەيىتقوجايەۆا.
اۋىل حالقىنىڭ دەنى باسپاناسىن زاڭداستىرىپ ۇلگەرمەگەن. ول ازداي بىلتىردان بەرى ءۇيدىڭ قۇجاتىن راسىمدەۋگە جەر ءبولىمى تاراپىنان شەكتەۋ قويىلعان. تۇرعىندار سەبەبىن بىلمەي دال. جاقىندا عانا باسپانالارىنىڭ سۇرىلەتىنى تۋرالى حابار كەلگەن.
«مىنا جەردە جازىلعان "مەملەكەت مەنشىگىنە قايتارىلسىن" دەپ. ءبىز ول ءۇيدى باسىپ العان جوقپىز. ول جەردى زاڭدى تۇردە ساتىپ الىپ وتىرمىز. مەملەكەتتىك اكتىمەن كەلىسىمشارتپەن زاڭدى تۇردە. گازدىڭ ترۋباسىن باسقالاي جۇرگىزۋدى تالاپ ەتەمىز. تالابىمىز - ءبىزدىڭ قۇجاتىمىزدى جاساپ بەرسىن»، - دەدى كوكوزەك اۋىلىنىڭ تۇرعىنى گۇلىم قۇسايىن قىزى.
جينالعان جۇرتتىڭ تالابىن تىڭداۋعا وبلىس، اۋدان اكىمدىگىنەن ادامدار كەلدى. ايتۋلارىنشا، 2016 جىلى ءوڭىر باسشىسىنىڭ شەشىمىمەن اۋماقتا قۇرىلىسقا تىيىم سالۋ تۋرالى قاۋلى شىققان. جەر ۋچاسكەلەرىنىڭ دە قالاي زاڭداستىرىلىپ، ساتىلىپ كەتكەنى بەلگىسىز.
«ول جەردە قۇرىلىس جۇرگىزۋگە بولمايدى. بىزدە سۋرەتى بار. 2016 جىلى بەلگىلەگەندە، بۇل جەردە ءبىر ءۇي دە بولماعان. بۇلاردىڭ بارلىعى - 2016 جىلدان كەيىن سالىنعان ۇيلەر. ءقازىر سىزدەرگە ەشكىم بۇل ءۇيدى زاڭداستىرىپ بەرمەيدى. زاڭعا قايشى بولادى»، - دەيدى وبلىستىق جەر قاتىناستارى باسقارماسى باسشىسىنىڭ مىندەتىن اتقارۋشى قايرات قىدىربايەۆ.
قۇرىلىس جۇرگىزۋگە شەكتەۋ بولا تۇرا، 40 شاقتى ءۇي قۇجاتتارىن الىپ، زاڭداستىرىپ العان. بۇل ساۋالعا مەملەكەتتىك قىزمەتكەرلەر بىر-بىرىنە سىلتەپ ناقتى جاۋاپ بەرمەدى. جەر ۋچاسكەلەرىن ساتۋ فاكتىسى بويىنشا قاراساي اۋدانىنىڭ اكىمدىگى قۇزىرلى ورگاندارعا شاعىمدانباقشى. ال تۇرعىندار ماسەلەسى شەشىلەدى دەپ سەندىردى.
وسىلايشا تاراپتار ورتاق شەشىمگە كەلە المادى. تۇرعىندار الدىمەن ماڭداي اقى، تابان تەرمەن سالعان باسپانامىزدى زاڭداستىرىپ الماي، كەلىسىمگە كەلمەيمىز دەپ وتىر. ماسەلەگە قاشان نۇكتە قويىلارى ازىرگە بەلگىسىز. ال جوسپار بويىنشا گاز قۇبىرىن تارتۋ جۇمىستارى جازدا باستالۋى ءتيىس.