سۋ رەسۋرستارى جانە يرريگاسيا مينيسترلىگىنىڭ مالىمەتىنشە، الماتى وبلىسى ىلە اۋدانىندا سۋارمالى سۋ تاپشىلىعى جوق، دەپ حابارلايدى aqshamnews.kz
الماتى وبلىسى ىلە اۋدانى اقشي اۋىلىندا 100 گا ەگىستىك القاپ سۋارىلماي، قۋراپ جاتىر دەگەن اقپارات تاراعان بولاتىن. مينيسترلىك جۇمىس توبىن قۇرىپ اۋماقتى بارىپ تەكسەرگەن.
"سۋ مينيسترلىگىنىڭ جۇمىس توبى الماتى وبلىسى ىلە اۋدانىنىڭ اقشي اۋىلىندا شارۋا قوجالىقتارى مەن اۋىل اكىمدىگى وكىلدەرىمەن كەزدەستى. اقشي اۋىلىندا سۋ تاپشىلىعى سالدارىنان 100 گەكتار ەگىس القابىنىڭ قۇرعاپ جاتقانى تۋرالى بۇرىن تاراعان اقپاراتتىڭ شىندىققا جاناسپايتىنى انىقتالدى"، - دەپ جازدى ۆەدومستۆوداعىلار.
شىن مانىندە "قازسۋشاردىڭ" "د.قونايەۆ اتىنداعى ۇلكەن الماتى كانالى" فيليالىمەن سۋ جەتكىزۋ بويىنشا كەلىسىمشارتتارى بولماعاندىقتان، 9 گەكتار جەر سۋارىلماعان.
"ەلدى مەكەنگە سۋ كۇرتى سۋ قويماسىنان وڭ جاعالاۋ ماگيسترالدىق كانالى ارقىلى جەتكىزىلەدى. سۋارۋ ماۋسىمى 16 مامىردا باستالعان. ال ۇلكەن الماتى كانالىنىڭ فيليالى ءساۋىر ايىنىڭ اياعىندا شارۋالاردى كەلىسىمشارتقا وتىرۋعا شاقىرا باستاعان"، - دەيدى مينيسترلىك.
مامىر ايىنىڭ باسىندا كۇرتى سۋ قويماسىنداعى سۋ كولەمى 101،68 ملن تەكشە مەتر بولدى. بۇگىنگە دەيىن وڭ جاعالاۋ ماگيسترالدىق كانالى ارقىلى 3،6 ملن تەكشە مەتر سۋ بەرىلدى، سول جاعالاۋ ماگيسترالدىق كانالى ارقىلى 6 ملن تەكشە مەتردەن استام سۋ بەرىلدى.
سۋ بەرۋ جۇمىستارىنىڭ كەلەشەكتە كەشىگۋىنە جول بەرمەس ءۇشىن جۇمىس توبىنىڭ وكىلدەرى فيليالعا سۋارۋ ماۋسىمى باستالماي تۇرىپ سۋ بەرۋ جونىندە كەلىسىمشارتتار جاساسۋدى ۇسىندى. سونداي-اق كانالداردى مەحانيكالىق ادىسپەن تازارتۋ ماسەلەسى قاراستىرىلىپ جاتىر.