الماتى وبلىسىندا اۋىل تۇرعىندارى ەرەۋىلگە شىقتى

20 مىڭعا جۋىق تۇرعىنى بار شامالعان گاز ماسەلەسىنىڭ زاردابىن تارتىپ كەلەدى.

الماتى وبلىسى، قاراساي اۋدانى، شامالعان اۋىلىنىڭ تۇرعىندارى ەرەۋىلگە شىقتى، دەپ حابارلايدى Almaty-akshamy.kz Sputnik قازاقستان سايتىنا سىلتەمە جاساپ.

تۇرعىنداردىڭ ايتۋىنشا، اۋىلعا گاز تاسىمالداۋشى «سيگما» كومپانياسى جىلۋ ءتاريفىن قايتا-قايتا قىمباتتاتىپ وتىر.

قاراساي اۋدانىندا ءۇش بىردەي گاز كومپانياسى بار. سونىڭ ءبىرى – «سيگما». ءۇش كومپانيانىڭ ىشىندەگى قىمباتى وسى «سيگما» ەكەن، ويتكەنى گازدى رەسەيدەن تاسىمالدايتىن كورىنەدى. اۋداننىڭ وزگە اۋىلدارى گازدىڭ ءبىر كۋبىنا 26-28 تەڭگەدەن تولەسە، شامالعان اۋىلىنىڭ تۇرعىندارى گازدىڭ ءبىر كۋبىنا 35 تەڭگە تولەيدى.

«سيگما كومپانياسى سوڭعى ەكى جىلدا گاز باعاسىن ون تەڭگەگە كوتەردى. گاز قىسىمى وتە تومەن بولدى. ايازدى كۇندەرى ءتورت كۇن جىلۋسىز قالدىق. گازدى توقتاتىپ تاستادى. كومپانيانىڭ قىزمەت ساپاسى تومەن»، - دەيدى تۇرعىندار.

الماتىنى اياز قىسقان كۇندەرى قاراساي اۋدانىندا بىرنەشە اۋىل جىلۋسىز قالعان بولاتىن. سەبەپ گاز قۇبىرلارىندا سۋ قاتىپ، ىستەن شىققان.

اكىمدىكتىڭ ايتۋىنشا، كومپانيا گاز قۇبىرلارىن تەكسەرمەگەن. ەرەۋىلگە كەلگەن اۋدان اكىمى اۋىل تۇرعىندارىنا كومپانيانى تەكسەرۋ تۋرالى ۇسىنىس ايتتى.

«سيگما» كومپانياسىنا ءبىزدىڭ دە شاعىمىمىز كوپ. ءبىراق بۇلاي شۋلاپ، ەش نارسەنى شەشپەيمىز. ول جەكەمەنشىك كومپانيا بولعاندىقتان، «ءتاريفتى ءتۇسىر» دەپ تالاپ قويۋعا حاقىمىز جوق. نەگىزى بۇل ءتاريفتى كومپانياعا انتيمونوپوليا بەكىتىپ بەرگەن. ەندى ءبىز بىرنەشە ادامنان قۇرىلعان كوميسسيا قۇرىپ، كومپانيانىڭ جۇمىسىنا تەكسەرۋ جۇرگىزەمىز. كوتەرگەن تاريفىنە وراي ساپالى قىزمەت كورسەتىپ وتىر ما، جوق پا، ءبىلۋىمىز كەرەك. تەك سودان كەيىن عانا ءتاريفتى ارزانداتۋ تۋرالى تالاپ قويا الامىز»، - دەيدى قاراساي اۋدانىنىڭ اكىمى جاسۇلان ەستەنوۆ.