جالپى قۇنى 320 ملرد. تەڭگەدەن اسىپ تۇسەدى.
الماتى وبلىسىنىڭ اكىمى مارات سۇلتانعازييەۆ ەڭبەكشىقازاق اۋدانىنىڭ تۇرعىندارىمەن كەزدەسىپ، ايماقتىڭ ەكونوميكالىق جاي-كۇيىنە توقتالدى، دەپ حابارلايدى Almaty-akshamy.kz
تۇتاس الماتى وبلىسىندا 8 اي ىشىندە ينۆەستيسيا اعىنى 19%-عا ۇلعايدى، ونىڭ جالپى قۇنى 320 ملرد. تەڭگەدەن اسىپ تۇسەدى.
وبلىس اكىمىنىڭ سوزىنە سەنسەك، جىل باسىنان بەرى وبلىستا 54،2 ملرد. تەڭگەنىڭ 10 ءىرى ينۆەستيسيالىق جوباسى جۇزەگە اسىرىلىپ، 700-گە جۋىق جۇمىس ورنى اشىلدى.
ەڭ ءىرى جوبالار – «ناۋرىز اگرو» اسىل تۇقىمدى قۇس رەپرودۋكتورى، «اليۋگال» قورىتپالارىنان قۇرىلىس ماتەريالدارىن شىعاراتىن زاۋىت، «مەديكال حولدينگ Sintez-KZ» مەديسينالىق تيتان يمپلانتاتتارى مەن ترەناجەرلار ءوندىرىسى جانە «قاراساز اگرو» بالىق شارۋاشىلىعى جانە ت.ب.
سونىڭ ىشىندە ەڭبەكشىقازاق اۋدانىنىڭ ەكونوميكاسىن دامىتۋعا 26 ملرد تەڭگەگە جۋىق ينۆەستيسيا تارتىلعان، بۇل وتكەن جىلمەن سالىستىرعاندا 1،2 ەسەگە ارتىق.
دەيتۇرعانمەن، اۋداننىڭ جالپى وبلىس كولەمىندەگى ۇلەسى 8 پايىزدان شامالى عانا ارتىق. وبلىس اكىمى وسى ورايدا، اتالعان ايماققا ينۆەستيسيا اعىنىن ارتتىرۋ قاجەتتىگىن اتاپ ءوتتى.
«بۇگىنگى كۇنى ىسكە اسقان 20 شاقتى جوبا بولسا، سونىڭ ىشىندە «جەتىسۋ ەنەرگياسى» ءجشس-نىڭ قۋاتى 60 مۆت شەلەك جەل ەلەكتر ستانسياسى جاقىندا ىسكە قوسىلعانى بارشاعا ءمالىم. جوباعا تارتىلعان ينۆەستيسيا كولەمى – 37،4 ملرد. تەڭگەنى قۇرايدى. سايكەسىنشە، 30 جۇمىس ورنى قۇرىلعان بولاتىن»، - دەدى مارات سۇلتانعازييەۆ.