ميگراسيالىق پوليسيا شەتەلدىكتەردى تىركەۋدەن باستاپ، كوشى-قون زاڭناماسىنىڭ ساقتالۋىن باقىلاۋعا دەيىنگى كەڭ اۋقىمدى مىندەتتەردى قامتيدى.
بيىلعى جىلدىڭ باسىنان باستاپ الماتى وبلىسىندا 4،5 مىڭنان استام شەتەلدىك قازاقستان ازاماتتىعىن الدى، دەپ حابارلايدى aqshamnews.kz
«وسى كەزەڭدە وڭىردە 73 545 شەتەلدىك ازامات تىركەلىپ، 2639 ۆيزا بەرىلدى. كوشى-قون زاڭناماسىن بۇزعانى ءۇشىن 9653 ادام جاۋاپقا تارتىلدى، ولاردىڭ 6803ء-ى – شەتەل ازاماتتارى، ال 2830-ى – قازاقستان ازاماتتارى. ەل اۋماعىنان 389 شەتەلدىك شىعارىلىپ، 8301 ادامعا ايىپپۇل سالىندى، ال 489 ادام اكىمشىلىك تارتىپپەن قاماۋعا الىندى. كوشى-قون زاڭناماسىن بۇزۋعا بايلانىستى 23 قىلمىستىق ءىس قوزعالدى»، – دەپ مالىمدەدى الماتى وبلىسى پد كققب باستىعى رۇستەم جارىقباسوۆ.
كوشى-قون زاڭناماسىن بۇزۋمەن كۇرەسۋگە ەرەكشە كوڭىل بولىنەدى. انىقتالعان ءتارتىپ بۇزۋشىلاردىڭ 80%-دان استامى – شەتەل ازاماتتارى. كوشى-قون قىزمەتى شەتەلدىك جۇمىس كۇشىن زاڭسىز تارتۋدىڭ الدىن الۋ ءۇشىن جۇمىس بەرۋشىلەرمەن جانە جەرگىلىكتى تۇرعىندارمەن تىعىز ىنتىماقتاستىقتا جۇمىس ىستەيدى.
«سونىمەن قاتار 11 ايدىڭ ىشىندە 4551 ادام قازاقستان رەسپۋبليكاسىنىڭ ازاماتتىعىن الدى. بۇل كورسەتكىش ەلگە تۇراقتى مەكەن رەتىندە قىزىعۋشىلىقتىڭ ارتىپ كەلە جاتقانىن كورسەتەدى»، – دەپ قوستى ر. جارىقباسوۆ.