بيىل 17 مامىردا باستالعان كۇردەلى جوندەۋ جاڭا جىلعا دەيىن ءبىتۋى كەرەك
1505 بالا ونلاين وقۋعا ءماجبۇر. الماتى وبلىسىنا قاراستى گۇلدالا اۋىلىنداعى جالعىز مەكتەپ كۇردەلى جوندەۋگە جابىلعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
سوڭعى قوڭىراۋى مەن ءبىرىنشى قىركۇيەگى مەيرامحانادا وتكەن اتا-انالار كەلەر جىلعا دەيىن ماسەلە شەشىلمەي مە دەپ الاڭدايدى. ويتكەنى، وقۋ ماۋسىمى جاقىنداعاندا مەكتەپ اكىمشىلىگى «بالالاردىڭ ءبارى كورشى اۋىلعا بارىپ وقيدى» دەگەن. وعان جاعداي دا جاسالعان كورىنەدى.
«اۆتوبۋس جالدايمىز، بالالاردى 3 مەكتەپكە بولدىك، ءبارىن ۇيىمداستىردىق» دەگەن. ال وقۋ باستالعاندا ءبىرى دە جوق»، – دەدى گۇلدالا اۋىلىنىڭ تۇرعىنى مارينا فەدينكوۆا.
«اۆتوبۋس ءبولىندى. بۇگىن جينالىستا ايتىپتى. 4 اۆتوبۋسقا 111 ادامدى سىيعىزامىز، كۇتىڭىزدەر، شىداڭىزدار»، – دەدى گۇلدالا اۋىلىنىڭ تۇرعىنى زۋلميرا مامييەۆا.
وقۋشىلار ءالى ونلاين وقىپ كەلەدى. ال كەمى 20 شاقىرىم بولاتىن كورشى اۋىلدارعا بالانى كۇن سايىن اپارىپ-اكەلۋ دە وڭاي ەمەس. ماسەلەنى ءتيىستى ورگانداردىڭ الدىندا اشىق ايتتىم دەگەن مەكتەپ باسشىسى كۇتۋدەن باسقا امال جوق دەپ وتىر.
«بىزگە اۆتوبۋستار بولادى» دەپ ايتقان بولاتىن. وسى ۋاقىتتا ءبىز اتا-انالاردىڭ ءبارىن دايىنداپ، بۇگىن ساعات 14:30-دا 3 مەكتەپكە بالالاردى اپارۋ كەرەك بولعانبىز. اۆتوبۋس شىقپايتىنىن ايتتى»، – دەدى №21 مەكتەپتىڭ ديرەكتورى قۋان ايتبايەۆ.
اۆتوبۋستىڭ شىقپايتىنىن ايتقان اۋدان مامانى مۇنىڭ ءبارى تەندەرگە تىكەلەي قاتىستى دەيدى.
«وبلىستىق ىشكى اۋديت ليسەنزيانىڭ جوق بولۋىنا بايلانىستى جاريالاعان ۇسىنىسىمىزدى توقتاتتى. كەلىسىم-شارتقا قول قويىلعان جاعدايدا وقۋشىلاردى مەكتەپكە اپارادى»، – دەدى تالعار اۋدانى ءبىلىم ءبولىمى باسشىسىنىڭ مىندەتىن اتقارۋشى ءلاززات قۇرمانبايەۆا.
وقۋ جىلىنىڭ باستالعانىنا 1 ايعا جۋىقتادى. «بۇل ماسەلە جازدا-اق شەشىلۋى ءتيىس ەدى» دەگەن اتا-انالار ناقتى جاۋاپتى ءالى دە الا الماي كەلەدى.
مەكتەپ 1967 جىلى سالىنعان. بيىل 17 مامىردا باستالعان كۇردەلى جوندەۋ جاڭا جىلعا دەيىن ءبىتۋى كەرەك. جوسپار سولاي. ال 1505 بالا وعان دەيىن باسقا مەكتەپكە بارا تۇرا ما، جوق قۇرىلىستىڭ اياقتالعانىن كۇتە مە، ونى ازىرگە ەشكىم ءدوپ باسىپ ايتا المايدى.