بەس كۇن بويى جىلۋسىز قالعان ۇيدە 5 ايلىق بالا دا بار
«قاقاعان قارا سۋىقتا قاتىپ قالدىق». بەس كۇن بويى جىلۋسىز قالعان ۇيدە 5 ايلىق بالا دا بار. الماتى وبلىسىنا قاراستى وتەگەن باتىر كەنتىندە جىلۋ جايى قاشان ءبىرجاقتى بولادى؟ بۇل تۋرالى Almaty.tv ايتىلدى، دەپ حابارلايدى Almaty-akshamy.kz.
«بۋى بۇرقىراپ، ابدەن ىلعالدانعان ءدالىز كوكتەم شىقسا كوگەرەدى»، – دەپ الاڭدايدى جۇرت. ال وعان دەيىن جىلۋ جۇيەسى جارىلماسا يگى. ويتكەنى، قاشان اۋىستىرىلعانى بەلگىسىز قۇبىر ءقازىردىڭ ءوزى بىرتىندەپ ىستەن شىعا باستاعان.
«كوپبالالى انامىن، ەڭ كىشكەنتايىم 5 ايلىق. ءقازىر مۇزداي جەردە وتىرمىز. دالا اياز، ءۇيدىڭ ءىشى سۋىق. بالالار اۋىرىپ جاتىر»، – دەدى وتەگەن باتىر اۋىلىنىڭ تۇرعىنى نۇرگۇل يسا.
138 پاتەرى بار جاتاقحانا تيپىندەگى ۇيگە جىلۋ وزگەلەردەن 1 ايعا كەشىكتىرىلىپ بەرىلگەن. وعان دا توزىعى جەتكەن جىلۋ جۇيەسى كىنالى. كىنا كىمدە دەسەك، اينالىپ كەلىپ ايتىلاتىنى – وسى قۇبىردىڭ جايى. ال ونى اۋىستىرماعان – تۇرعىنداردىڭ ءوزى،–دەيدى جاۋاپتى مامان.
«اتالعان ءۇيدىڭ جىلۋىن قالىپقا كەلتىرۋ – سول ونداعان ادامنىڭ مىندەتىنە كىرەدى. ءبىز جىلۋدى جىبەردىك، ونى تالاپقا ساي ورناتۋ – جەكەمەنشىكتەگى ءار ادامنىڭ ءوز جۇمىسى. ەگەر تۇرعىندار ۇيىندەگى قۇبىردى اۋىستىرىپ بەرسە، ونى ورتالىقتاندىرىلعان جۇيەگە قوسۋ قيىن ءىس ەمەس. بۇل جەردە ازاماتتاردىڭ اۋىزبىرشىلىگى كەرەك»، – دەدى «جىلۋ جۇيەلەرى» ج ش س ديرەكتورى ۆاسيليي باتىر.
ءقازىر مۇنداعى 12 پاتەردىڭ تەرەزەسىنە قىراۋ تۇرىپ، مۇز قاتقان. جىلىتۋ قۇبىرى ىستەن شىققان دا ءدال وسى ۇيلەر. «جىلىنامىن دەگەندەر سول جىلۋ جۇيەسىن جونگە كەلتىرۋى كەرەك»،–دەپ مامان اقىل ايتىپ كەتتى. ال ول ءۇشىن اۋەلى ءبىر باسپانادا تۇرعانمەن، بۇل ونشاقتى پاتەردىڭ جايىنا باس اۋىرتا قويمايتىن كورشىلەردى كوندىرۋ كەرەك.
«جەرتولەدەگى قۇبىرلاردان ىلعي سۋ تامشىلاپ تۇرادى. ءتيىستى اقشانى تولەپ جاتىرمىز، ءبىراق ءالى ءۇيدىڭ ەش شارۋاسى شەشىلگەن جوق. مىنا سۋىقتا قاشانعى وتىرا بەرەمىز؟» – دەدى وتەگەن باتىر اۋىلىنىڭ تۇرعىنى ەۆگەنيا رازۋموۆا.
اۋداننىڭ جىلۋ جۇيەلەرىنە جاۋاپتى مامان ءدال وسى ۇيدەگى اپاتتى جاعداي تۇتاس ەلدىمەكەنگە كەرى اسەر ەتۋى مۇمكىن دەيدى. ويتكەنى، اقاۋى بار قۇبىر ورتالىق جىلۋ جۇيەسىنە قوسىلعان. ەگەر ول جارىلسا، باسقا تۇرعىندارعا دا ءقاۋىپ تونەدى.