مەترودا جاڭا پويىزدار
ەندى مەتروپوليتەندە 15 پويىز جۇمىس ىستەيتىن بولادى، دەپ حابارلايدى Almaty-akshamy.kz
پاندەمياعا قاراماستان، تاۋەلسىزدىكتىڭ 30 جىلدىعىندا، تۇڭعىش پرەزيدەنت كۇنى قارساڭىندا جانە الماتى مەتروپوليتەنىنىڭ 10 جىلدىعىندا الماتى مەتروپوليتەنى ءۇشىن ارنايى ازىرلەنگەن Hyundai Rotem وڭتۇستىك كورەيا كومپانياسى شىعارعان 8 جاڭا ەلەكتر جىلجىمالى قۇرام پايدالانۋعا بەرىلدى.
«مەتروپوليتەن» كمك ەلەكترودەپو باستىعى جەتكەرگەن ارزايەۆتىڭ ايتۋىنشا، جاڭا قۇرامدار بۇرىنعىلارىنان زاماناۋيلىعىمەن ەرەكشەلەنەدى. ۆاگوندار ىشكى جانە سىرتقى بەينەباقىلاۋ جۇيەسىمەن جابدىقتالعان. سوندىقتان ءماشينيستىڭ كابينادان ۆاگونداردىڭ ىشىندەگى جانە سىرتىنداعى جاعدايدى بەينەباقىلاۋ جۇيەسى مونيتورىنىڭ كومەگىمەن باقىلاۋ مۇمكىندىگى بار.
جالپى قۇرامنىڭ ۇزىندىعى 77،8 مەتر بولاتىن پويىزدىڭ ەڭ ۇلكەن تەحنيكالىق جىلدامدىعى - 90كم/ساع جەتەدى. تەمپەراتۋرا رەجيمى: -35، +40س.
4 ۆاگون قۇرامىنداعى جولاۋشىلاردىڭ سىيىمدىلىعى 940 ادامدى قۇرايدى. ءاربىر ۆاگون جىلىتۋ، جەلدەتۋ مەن اۋا باپتاۋ جۇيەسىمەن، جولاۋشىلار سالونىنىڭ فلۋورەسەنتتى جارىقتاندىرۋىمەن جابدىقتالعان.
«ءبىز مىنا پويىزداردى 10 جىل بويى قولدانىپ كەلەمىز. سول ۋاقىت ىشىندە تەحنيكالىق اقاۋلار، جۇمىس بارىسىندا كەدەرگىلەر بولعان جوق. سول سەبەپتى 2018 جىلى 8 جىلجىمالى قۇرام ساتىپ الۋعا كەلىسىمشارتقا قول قويىلدى. جاڭا قۇرامدار ۆاگوندار اراسىندا وتپەلى وتكەلگە يە، بۇل جولاۋشىلاردىڭ قاۋىپسىزدىگىن قامتاماسىز ەتەدى، جاڭا تەحنولوگيالار وسى قۇرامداردا ەنگىزىلگەن»، - دەدى مەتروپوليتەننىڭ باس ينجەنەرى نۇرعالي ۇسەنوۆ.
بارلىق ۆاگوندار جولاۋشىلارعا ءبىر ۆاگوننان ەكىنشىسىنە ءقاۋىپسىز جانە ىڭعايلى ءوتۋدى قامتاماسىز ەتەتىن اشىق تيپتەگى (ارالىق ەسىكتەرسىز) كەڭ ۆاگونارالىق ءوتۋ جولدارى ارقىلى بىرىكتىرىلگەن. ەنەرگيا تۇتىنۋدى ۇنەمدەۋگە مۇمكىندىك بەرەتىن تەتىكتەر دە قاراستىرىلعان.
ۆاگوندار قايتا جابدىقتاۋدى، تەحنيكالىق نىعايتۋ مەن جوندەۋسىز ءبىر قالىپتى 30 جىل قىزمەت ەتۋ ءۇشىن جوبالانعان، ارنايى قۇراستىرىلعان.
وسىدان ون جىل بۇرىن، 2011 جىلعى 1 جەلتوقساندا تۇڭعىش پرەزيدەنت - ەلباسى نۇرسۇلتان ءابىش ۇلى نازاربايەۆ قازاقستانداعى العاشقى جانە جالعىز مەتروپوليتەندى اشقان بولاتىن. سودان بەرى مەترو جۇمىسى ءبىر مينۋتقا دا توقتاعان جوق.
مەترودا جولاۋشىلار اعىنىنىڭ ۇنەمى ءوسىپ كەلە جاتقانىن اتاپ ءوتتى. ماسەلەن، ەگەر پاندەمياعا دەيىن تاسىمالدانعان جولاۋشىلار سانى 50-60 مىڭ ادامدى قۇراسا، جاڭا ەكى ستانسيا اشىلعالى جولاۋشىلار اعىنى 80-90 مىڭ ادامدى قۇرايدى. ەگەر مەترو التىن وردا بازارىنا جەتسە، جولاۋشىلار اعىنى 160 مىڭ ادامعا دەيىن ارتادى.