بەس مينۋتتىق جيىلىك: الماتى مەتروپوليتەنىندە قوسىمشا قۇرام جەلىگە شىعارىلدى
جولاۋشىلار اعىنىن ساراپتاۋ ناتيجەسىندە الماتى مەتروپوليتەنىندە جىلجىمالى قۇرام سانى كوبەيتىلدى، دەپ حابارلايدى Almaty-akshamy.kz
ەندى قاربالاس ۋاقىتتا جەلىدە 11 قۇرام 5 مينۋت 38 سەكۋند جيىلىكپەن قىزمەت كورسەتەتىن بولادى.
وقۋ جىلىنىڭ باستالىسىمەن جولاۋشىلار اعىنى 70 مىڭنان 90 مىڭعا دەيىن ءوستى. تالداۋ ناتيجەسىندە جولاۋشىلار سانى كۇنىنە 100 مىڭعا دەيىن كوبەيگەندىگى ەسكەرىلىپ، جەلىگە قوسىمشا قۇرام شىعارۋ تۋرالى شەشىم قابىلداندى.
ءار قۇرام جالپى سىيىمدىلىعى 900 ادامنان اساتىن 4 ۆاگوننان تۇرادى.
ەسكە سالا كەتەيىك، الماتى مەتروپوليتەنى 2011 جىلعى 1 جەلتوقساندا ىسكە قوسىلدى، قازىرگى كەزدە 11 ستانسيا بار. ءارى قاراي 4 ستانسيانىڭ قۇرىلىسى بويىنشا جۇمىستار جۇرگىزىلىپ جاتىر.