الماتى مەن اتىراۋ اراسىندا تاعى ءبىر قوسىمشا رەيستى جولعا شىعارادى

پويىز الماتىدان ەرتەڭ، 19 ساۋىردە اتتانسا، اتىراۋدان 21 ءساۋىر كۇنى كەرى قاراي جۇرەدى.

سۋ تاسقىنى بولىپ جاتقان وڭىرلەرگە جانە سول وڭىرلەردەن ادامداردى تاسىمالداۋ ءۇشىن "قازاقستان تەمىر جولى" ۇلتتىق كومپانياسى الماتى مەن اتىراۋ اراسىندا تاعى ءبىر قوسىمشا رەيستى ىسكە قوسىپ وتىر، دەپ حابارلايدى اlmaty-akshamy.kz. 
كومپانيا مالىمەتىنشە، №215/216 "الماتى-اتىراۋ" پويىزى كەلەسى كەستەگە سايكەس قاتىنايدى:

الماتىدان 19 ساۋىردە ساعات 13:40-تا جونەلتىلىپ، اتىراۋعا 21 ساۋىردە ساعات 15:32-دە كەلەدى؛
اتىراۋدان 21 ساۋىردە ساعات 23:16-دا جونەلتىلىپ، الماتىعا 24 ساۋىردە ساعات 03:50-دە كەلەدى.

"قابىلدانىپ جاتقان شارالار 700-دەن استام جولاۋشىنى قوسىمشا تاسىمالداۋعا مۇمكىندىك بەرەدى. قوسىمشا پويىزعا بيلەتتەردى ساتۋ 17 ساۋىردە باستالدى. بيلەتتەردى كوميسسياسىز bilet.railways.kz سايتتان جانە ۆوكزالدىڭ بيلەت كاسسالارىنان ساتىپ الۋعا بولادى. جولاۋشىلار پويىزدارىنىڭ قوزعالىس كەستەسى بويىنشا انىقتامالىق اقپاراتتى "1433" تەگىن ءنومىرى بويىنشا الا الادى"، – دەلىنگەن كومپانيا حابارلاماسىندا.

ەسكە سالايىق، ءدال وسىنداي، ءبىراق ءبىر باعىتتاعى، ياعني اتىراۋدان الماتىعا قاتىناعان قوسىمشا رەيس 14 ساۋىردە دە ىسكە قوسىلعان بولاتىن. پويىز جولاۋشىلارىن الماتىعا 17 ساۋىردە جەتكىزدى.