شوپان قالا ماڭىنان قارۋ-جاراق پەن ارنايى وق-دارىلەر جاسىرىلعان جەردى تاۋىپ الدى
الاتاۋ اۋداندىق پوليسيا باسقارماسىنىڭ قىزمەتكەرلەرى اسكەري وق وتكىزبەيتىن كەۋدەشە، كاسكا، تراۆماتيكالىق تاپانشا مەن ونداعان پاترون تاپتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«ءبىزدىڭ بولىمشەگە ۋ. ەسىمدى ازامات حابارلاسىپ، «دارحان» ىقشاماۋدانىنداعى سايدا مال باعىپ جۇرگەن كەزىندە قارۋ-جاراق ارسەنالىن تاۋىپ العانىن ايتتى. اقپارات راستالدى. جەدەل تەرگەۋ توبى كاسكا، وق وتكىزبەيتىن كەۋدەشە، كالاشنيكوۆ اۆتوماتىنان پاترونسالعىش، 7،62 مم كاليبرلى 20 پاترون، «بەرەتتا» تراۆماتيكالىق تاپانشاسى، رەزەڭكە تاياقشالار، «ماكاروۆ» تاپانشاسىنان 19 پاترون جانە بەلگىسىز تراۆماتيكالىق تاپانشا تاپتى»، – دەدى الاتاۋ اۋداندىق پوليسيا باسقارماسىنىڭ باستىعى ءىلياس ومىرسەرىكوۆ.
ونىڭ ايتۋىنشا، تابىلعان ارسەنالدىڭ مەنشىك قۇقىعى مەن قايدان الىنعانى ودان ارعى تەكسەرۋ بارىسىندا انىقتالادى.
«ارسەنالدى جاسىرعان تۇلعالار انىقتالىپ، جاۋاپقا تارتىلادى»، - دەدى ول.
