ەلىمىزدە سوڭعى كەزدەرى قارقىندى ءورىس العان ماماندىق پايدا بولدى. بۇرىن وندايدى شەتەلدىڭ كينولارىنان كورۋشى ەدىك. بۇگىندە جەتكىزۋ قىزمەتى اپ-ساتتە كەرەك- جاراقتى اكەلىپ، اپارىپ تۇر.
«ات جەتپەگەن جەرگە، حات جەتىپ تۇر»
الماتى – ۇلكەن مەگاپوليس. ءبىر شەتىنەن ەكىنشى بۇرىشىنا جەتۋ قيىن. ونىڭ ۇستىنە كەپتەلىسكە قالساڭىز، وندا كوپ كۇتۋگە تۋرا كەلەدى. سوندىقتان اياق جەتپەيتىن جەرگە كۋرەردىڭ شاماسى جەتىپ تۇر. وسىدان بىرنەشە جىل بۇرىن ەلىمىزگە «ياندەكس»، Glovo جانە Wolt سياقتى سەرۆيستىك كومپانيالارى كىرە باستادى. بۇرىن تەك Chocofood بار ەدى. كارانتينگە دەيىن سارى، قىزىل، كوگىلدىر جانە جاسىل سومكە اسىنعان جاس جىگىتتەر قالا پەيزاجىنىڭ داعدىلى بولىگىنە اينالدى. ال لوكداۋن كەزىندە كوپشىلىك ءۇشىن كۋرەرلەر ازىق-تۇلىكتى، تاعام مەن دارى-دارمەكتى جەتكىزىپ بەرەتىن جالعىز مۇمكىندىك بولدى. ءبىر عانا Glovo كومپانياسىنىڭ وزىندە الماتىدا شامامەن 3500-گە استام شابارمانى بار ەكەن. بۇل ستۋدەنتتەرگە تاپتىرماس جۇمىس كۇشى بولىپ تۇر. اتا-اناسىنا قول جايماي، ءوز ءناپاقاسىن تاۋىپ، قارجى جاساپ ءجۇر. ناعىز قۇپتارلىق ءىس.
باسەكە ءداۋىرى باستالدى
ءقازىر نەعۇرلىم ەڭبەكتى ءناتيجەلى ىستەسەڭىز، سوعۇرلىم تابىس ارتىق تۇسەدى. باياعىدا اۋىلدا ءجۇرگەندە ەگىن-تەگىن، مال-مۇلىككە قاراپ كۇن كورەتىن ەدىك. بىرەۋمەن ەكىنشى كىسى جارىسپايتىن. جۇرتتىڭ حال- احۋالى تەڭدەي-تۇعىن. ىلۋدە بىرەۋ باي بولماسا، جاپپاي جانتالاسۋ جوق ەدى. وسىلايشا كۇندەر ءوتتى. بەيقام كەز ەشكىمدى الاڭداتپادى. سودان الگى اتا-انالاردىڭ بالا-شاعاسى جەتىلدى. قالاعا كەلۋشىلەر قاتارى ارتتى. ءسويتىپ، قىزۋ تىرشىلىك باستالدى.
شىنى كەرەك، بۇرىن ەشكىم ءدۇنيە تابۋدى ويلاي قويمادى. ءومىرباقي اۋىلدا كۇن كورەمىز دەپ ويلاعان بولۋى كەرەك. ايتسە دە، ۇرپاق اۋىسقان سايىن ءبارىنىڭ ءوي-ورىسى ءوزگەرەدى. جاستار ءوزىنىڭ اكە-شەشەسى سياقتى بولعىسى كەلە بەرمەيدى. الىپ شاھاردا تۇرىپ، باسپانا، ءتاۋىر كولىك ساتىپ الىپ جەتىلگىسى كەلەدى. مۇمكىن بولسا، بيزنەسپەن شۇعىلدانىپ جۇرەدى. ايتەۋىر قاراپ جاتپايدى. سوندىقتان بالانى اۋىلدا ۇستاپ، قاسىمنان شىقپا دەيتىن داۋرەن كەلمەستىڭ كەمەسىنە ءمىنىپ كەتكەن. سول سەبەپتى، جاستاردى بۇعاتتاپ، جولىن بوگەگەن ءجون ەمەس.
ءقازىر كىمنەن سۇراساڭ دا ءبارىنىڭ ايتارى، وتباسىندا جاعدايى بولماعان. ءسويتىپ، اعايىن-تۋىسقا سالماق سالمايىن دەپ ءوز جونىمەن كۇن كورىپ كەتكەن. ءيا، قيىنشىلىق، توقىراۋ جىلدار ءوتتى. الايدا، زامان وڭالعاندا ءۇي-جاي سالۋعا بولار ەدى عوي. كوبىسى قولدان قىش قۇيىپ، بىرنەشە جىل قۇرىلىس ماتەريالدارىن جينادى. ءسويتىپ، باس-اياعى 2-3 جىلدا ۇلكەن ءۇي سالدى. ەندى وسىندايعا قاراپ قالاي سۇيسىنبەيسىز؟! ءداپ وسىنداي جاعداي ءوزىمىزدىڭ باسىمىزدا دا بار. ءبىر تۇسىنگەنىم، ۇنەمى ءبىر جەردەن شىقپاعان ادام باسقاشا ويلاي دا المايتىن سياقتى. ءويتكەنى، دامۋ، كوركەيۋ تۋرالى ايتا قالساڭ، ات تونىن الا قاشادى. ال ودان كەيىن ءقايتىپ دامۋ بولسىن. وسىندايدى ءجاسوسپىرىم شاعىنان كورگەن بالا ول جەردە ەشقانداي وركەندەۋ جوقتىعىن ءتۇيسىنىپ، ءوز جولىن تاۋىپ كەتەدى. ءبىر سوزبەن ايتقاندا، «قولى قيمىلداعاننىڭ اۋزى قيمىلدايدى» دەمەكپىز.
سمارتفون ناعىز كومەكشىگە اينالدى
ناعىز ارپالىس عاسىرىن وسى شاھاردان بايقاي الامىز. تاڭنان كەشكە دەيىن جۇمىسقا جەگىلگەن ءبىر ادام. ءبارى قاربالاس. بىر-بىرىمەن تالاسقاندا جاعاڭدى ۇستايسىڭ. ءبىراق امال بار ما، ءويتىپ-بۇيتىپ كۇن كەشۋ كەرەك. بۇل ءومىردىڭ جازىلماعان زاڭى.
الماتىعا ەڭ ەڭبەكقور جاندار وقۋعا تۇسەتىن سياقتى. كىمدى قاراساڭ دا، قاراپ جۇرگەن جوق. جاستار جان-جاقتى. وقۋدان شىعىپ، جەتكىءزۋشى، داياشى، كۇزەتشى، كولىك جۋۋشى، اسپاز جانە ت.ب. ىستەردى اتقارا بەرەدى. ماقسات – وز-وزىنە قارجى تابۋ، ەشكىمگە الاقان جايماۋ.
ءبىزدىڭ كوزىمىزگە ەڭ كوپ تۇسەتىن، ول – كۋرەر. ونىڭ قىزمەتىن قازاقشا ءتۇرلى اتاپ ءجۇرمىز. ياعني اتشابار، شابارمان، جەتكىزۋشى دەپ قويامىز. قالاي اتاساق تا، قىزمەتى ءبىر عوي. سونىمەن دەرەۋ زات، قۇجات، اس- اۋقات، سۋسىن – ءتۇرلى-تۇرلى نارسەگە مۇقتاج بولىپ قالامىز. ءوزىمىز بارايىن دەسەك، ۋاقىت جوق. ءسويتىپ، جەتكىزۋ قىزمەتىنە جۇگىنەمىز. قولىمىزداعى سمارتفون ناعىز كومەكشىگە اينالدى. سوعان بەلگىلى ءبىر مەكەنجايدى تەرەمىز، اقىرىندا ويلاعان تاپسىرىستى اكەلىپ بەرەدى. باعاسى اركىمگە ءارتۇرلى بولار. الايدا، تاپتىرماس كومەكشى دەر ەدىك.
سوڭعى كەزدەرى كۋرەر قىزمەتىنە قاتىستى زاڭنامالىق تۇرعىدا ءبىرقاتار جۇمىستار قولعا الىندى. سونداي-اق، جول ەرەجەسى جانە ت.ب. پروبلەمالار وقتىن-وقتىن ەستىلىپ قالىپ جاتىر. ءبارى ءوز جونىمەن رەتتەلسە ەكەن.
الماتى شاھارى ستۋدەنتتەرگە تولدى. ءتىپتى شەتەلدىكتەر دە جەتەرلىك. وسى ماقالانى جازاردا بايقاعانىمىز، وزبەك، قىرعىز، تاجىك اعايىنداردان كەلىپ وقيتىن شاكىرتتەر دە سەرۆيستىك قىزمەتتەردە ءجۇر. ءبىراق سوزگە تارتىپ ەدىك، جولامادى. نە ءۇشىن ەكەنى تۇسىنىكسىز؟! ءتىلدى ۇيرەنىپ العان، ءتىپتى كەيبىرىن ءبىزدىڭ جىگىتتەردەن اجىراتا المايسىز.