مەملەكەتتىك قولداۋدىڭ ارقاسىندا بارلىق تالاپكەرلەر تەگىن وقۋ مۇمكىندىگىنە يە بولدى.
الماتىدا مەكتەپ تۇلەكتەرى وقۋعا تۇسە الاتىن كوللەدجدەرگە 14 905 بيۋدجەتتىك ورىن ءبولىندى. بۇل، 2021 جىلمەن سالىستىرعاندا، 3500 ورىن قوسىلعان. الماتى قالالىق ءبىلىم باسقارماسى تەحنيكالىق جانە كاسىپتىك ءبىلىم بەرۋ باسقارماسىنىڭ باسشىسى ەرىك ابىشايەۆ وكق-دا وتكەن بريفينگتە وقۋعا قابىلداۋ ناۋقانى ءجۇرىپ جاتقانى تۋرالى ايتتى، دەپ حابارلايدى Almaty-akshamy.kz.
ەسكە سالساق، قازاقستاندا مەملەكەت باسشىسىنىڭ تاپسىرماسىمەن «تەگىن تەحنيكالىق جانە كاسىپتىك ءبىلىم» جوباسى جۇزەگە اسىرىلۋدا.
قاسىم-جومارت توقايەۆ بالالاردى ەرتە كاسىپتىك باعدارلاۋ بۇگىنگى تاڭدا ەرەكشە ماڭىزدى دەپ سانايدى. ونىڭ ايتۋىنشا، وسكەلەڭ ۇرپاق بولاشاق ماماندىعىن تاڭداۋدا سانالى بولۋى كەرەك.
قالالىق ءبىلىم باسقارماسى بارلىق 2022 جىلعى تۇلەكتەرگە بولاشاق ءبىلىم تراەكتورياسىن انىقتاۋ ءۇشىن كوللەدجدەرگە تاپسىرار الدىندا كاسىبي دياگنوستيكادان ءوتۋدى ۇسىنادى.
كاسىبي دياگنوستيكادان gz.bilimalmaty.kz سايتىندا وتۋگە بولادى.
«بيىل الماتىنىڭ ورتا ارناۋلى وقۋ ورىندارى مەن ليسەيلەرىنە قابىلداۋ ناۋقانى 25 ماۋسىمنان 25 تامىزعا دەيىن جالعاسادى. كەشكى جانە سىرتتاي وقۋعا قۇجاتتاردى قابىلداۋ مەرزىمى 25 ماۋسىم مەن 20 قىركۇيەك ارالىعىندا. بۇل رەتتە شىعارماشىلىق دايىندىقتى قاجەت ەتەتىن ماماندىقتار بويىنشا وقۋعا قۇجاتتار 20 شىلدەگە دەيىن، ال پەداگوگيكالىق جانە مەديسينالىق ماماندىقتار بويىنشا 15 تامىزعا دەيىن قابىلدانادى»، — دەدى ەرىك ابىشايەۆ.
مەملەكەتتىك قولداۋدىڭ ارقاسىندا بارلىق تالاپكەرلەر تەگىن وقۋ مۇمكىندىگىنە يە بولدى، ول ءۇشىن ەلەكتروندى ۇكىمەت پەن gz.bilimalmaty.kz پورتالدارى ارقىلى قۇجاتتارىن تاپسىرۋ قاجەت، سونىمەن قاتار كوللەدجگە قابىلداۋ جونىندەگى تەحنيكالىق حاتشىلارعا جۇگىنە الادى.
«ورتا بۋىن مامانى بىلىكتىلىگىن تاڭداعان ءاربىر تالاپكەردىڭ ءتورت ماماندىق پەن ءتورت كوللەدجگە دەيىن تاڭداۋ مۇمكىندىگى بار. ماماندىق تاڭداۋ كەزىندە gz.bilimalmaty.kz پورتالىنا تىركەلىپ، قۇجاتتاردى تىكەلەي كوللەدجگە تاپسىرۋ قاجەت»، - دەپ ءتۇسىندىردى سپيكەر.
ەڭبەك بىلىكتىلىگىنە تۇسەتىن تۇلعالار ءۇشىن كوللەدج كاسىپتىك جارامدىلىق بويىنشا اڭگىمەلەسۋدى ۇيىمداستىرادى، ال ەگەر مەملەكەتتىك تاپسىرىس بويىنشا ورىنعا ۇمىتكەرلەر كوپ بولسا، سەرتيفيكاتتىڭ ورتاشا بالى جانە كۆوتا ساناتىنىڭ بولۋى باستى مانگە يە بولادى.
وڭىرلىك كوممۋنيكاسيالار قىزمەتىنىڭ بريفينگىندە الماتى قالالىق ءبىلىم باسقارماسىنىڭ تەحنيكالىق جانە كاسىپتىك ءبىلىم بەرۋ باسقارماسىنىڭ باسشىسى ەرىك ابىشايەۆ بيۋدجەتكە تۇسەتىندەر اراسىندا كونكۋرستىق تەستىلەۋ مەرزىمىن جاريالادى.
«نەگىزگى ورتا ءبىلىم نەگىزىندە وقۋعا تۇسەتىن تۇلعالار اراسىنداعى كونكۋرس 19-22 تامىز ارالىعىندا، جالپى ورتا ءبىلىم بەرۋ بازاسىندا جانە تجكب بازاسىندا 22-25 تامىز ارالىعىندا وتەدى. ونەر جانە مادەنيەت ماماندىعىنا تۇسەتىندەر ءۇشىن 29 شىلدە مەن 2 تامىز ارالىعىندا ىرىكتەۋ وتەدى»، - دەدى سپيكەر.
سونداي-اق، الماتى قالاسىنداعى كوللەدجدەرگە ءتۇسۋ ەمتيحاندارى پەداگوگيكالىق، مەديسينالىق ماماندىقتار مەن شىعارماشىلىق دايىندىقتى قاجەت ەتەتىن ماماندىقتار بويىنشا وتەتىنىن ايتا كەتكەن ءجون.
ە. ابىشايەۆ بيىلعى جىلى بيۋدجەتتىك ورىندار بولىنگەن سالالارعا توقتالدى: «ءبىلىم» - 900 ورىن، «ونەر-گۋمانيتارلىق» - 950 ورىن، «الەۋمەتتىك عىلىمدار» - 25 ورىن، «بيزنەس، مەنەدجمەنت جانە قۇقىق» - 1000 ورىن، «اقپاراتتىق-كوممۋنيكاسيالىق تەحنولوگيالار» – 2058 ورىن، «ماشينا جاساۋ، وڭدەۋ ونەركاسىبى جانە قۇرىلىس يندۋسترياسى» – 6158 ورىن، «اۋىل، ورمان، بالىق شارۋاشىلىعى جانە ۆەتەريناريا» – 160 ورىن، «دەنساۋلىق ساقتاۋ جانە الەۋمەتتىك قامسىزداندىرۋ» – 1066 ورىن، «قىزمەت كورسەتۋ» –2588 ورىن.
ايتا كەتەرلىگى، بيىل الماتىدا 83 كوللەدجگە تۇسۋگە بولادى، ونىڭ 23ء-ى مەملەكەتتىك، 60-ى جەكەمەنشىك. وتكەن جىلدىڭ قورىتىندىسى بويىنشا مەگاپوليس كوللەدجدەرىندە 19 230 بىلىكتى مامان دايىندالسا، ونىڭ 10 278ء-ى مەملەكەتتىك تاپسىرىس بويىنشا. بارلىق تۇلەكتەردىڭ جۇمىسقا ورنالاسۋ كورسەتكىشى 98 پايىزدى قۇرادى.