الماتى – قازاقستاننىڭ ەڭ ءىرى قالاسى عانا ەمەس، مادەنيەت پەن ءبىلىمنىڭ دە ورداسى. قالانىڭ ءاربىر كوشەسىنىڭ اتاۋى تاريحپەن، ەلگە ەڭبەگى سىڭگەن تۇلعالاردىڭ ەسىمىمەن تىعىز بايلانىستى. سونىڭ ىشىندە ۇستازدار اتىنا بەرىلگەن كوشەلەر – ەلدىڭ بىلىمگە، عىلىمعا، اعارتۋشىلىققا دەگەن قۇرمەتىن ايقىن كورسەتەتىن بەلگى.
قازاق حالقى ۇستازدى ءارقاشان ەرەكشە قادىرلەگەن. «التى الاشتىڭ بالاسى باس قوسسا، ءتور – مۇعالىمدىكى» دەپ بەس ارىسىمىزدىڭ ءبىرى، ايگىلى اقىن ماعجان جۇمابايەۆ اتامىز ايتقانداي، ۇستاز ەسىمىنىڭ كوشە اتاۋىنا اينالۋى – بۇل ولاردىڭ ەڭبەگىن ۇلىقتاۋدىڭ، حالىق جادىندا ماڭگى قالدىرۋدىڭ ءبىر جولى.
قالامىزدا ءبىرقاتار ۇستاز بەن اعارتۋشىنىڭ ەسىمى كوشەلەرگە بەرىلگەن.
احمەت بايتۇرسىن ۇلى كوشەسى – 18.04.1993 جىلى الماتى قالاسى اكىمىنىڭ №78 شەشىمىمەن الاش پارتياسى كوشباسشىلارىنىڭ ءبىرى، تۇڭعىش «الىپپەءنىڭ» اۆتورى، بەلگىلى تۇركىتانۋشى، رەفورماتور عالىم، قازاق ءتىلى ءبىلىمى، ادەبيەتتانۋ جانە قازاق ءتىلىن وقىتۋ ادىستەمەسى عىلىمدارىنىڭ نەگىزىن سالعان زەرتتەۋشى، قوعام قايراتكەرى، ستاليندىك رەپرەسسيانىڭ قۇربانى احمەت بايتۇرسىن ۇلىنىڭ ەسىمى بەرىلگەن. بۇرىنعى اتاۋلارى: ا)تارانشى؛ ءا)كوسموناۆتار كوشەسى. كوشەنىڭ ۇزىندىعى - 4450 مەتر.
ىبىراي التىنسارين داڭعىلى – 23.10.1991 جىلدان بەرى قازاق حالقىنىڭ تۇڭعىش اعارتۋشىسى، ۇلى ۇستاز، فولكلوريست، ەتنوگراف-زەرتتەۋشى ىبىراي ءالتىنساريننىڭ ەسىمىمەن اتالادى. اۋەزوۆ اۋدانىنىڭ اۋماعىندا ورنالاسقان بۇل داڭعىلدىڭ ۇزىندىعى – 2938 شاقىرىم. بۇرىنعى اتاۋى – پراۆدا داڭعىلى.
سپانديار كوبەيەۆ اتىنداعى كوشە – الماتى قالاسى اتقارۋ كوميتەتىنىڭ 26.12.1962 جىلعى №453/26 شەشىمىمەن قازاق جازۋشىسى، اعارتۋشى-پەداگوگ، قازاق كسر-نە ەڭبەك سىڭىرگەن ۇستاز سپانديار كوبەيەۆتىڭ ەسىمى بەرىلگەن. تۇركسىب اۋدانىندا ورنالاسقان كوشەنىڭ بۇرىنعى اتاۋى – مولودەجنايا، كوشەنىڭ ۇزىندىعى - 1820 مەتر.
زەينوللا قابدولوۆ اتىنداعى كوشە – الماتى قالاسى ءماسليحاتىنىڭ 02.08.2008 №128 شەشىمى جانە الماتى قالاسى اكىمدىگىنىڭ 14.08.2008 №3/557 قاۋلىسىمەن كورنەكتى جازۋشى، ءبىلىمپاز ادەبيەتتانۋشى، ۇستاز-عالىم، فيلولوگيا عىلىمدارىنىڭ دوكتورى، پروفەسسور، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، ق ر حالىق جازۋشىسى، قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن عىلىم قايراتكەرى - زەينوللا قابدولوۆتىڭ ەسىمى بەرىلگەن. اۋەزوۆ اۋدانىندا ورنالاسقان كوشەنىڭ ۇزىندىعى -1350 مەتر، بۇرىنعى اتاۋى - مارەچەك كوشەسى.
جامبىل توباياقوۆ اتىنداعى كوشە – الماتى قالاسى اكىمىنىڭ 21.05.1999 №452 شەشىمىمەن قوعام قايراتكەرى عالىم-فيزيك پروفەسسور، پەداگوگ جامبىل توباياقوۆتىڭ ەسىمى بەرىلگەن. جەتىسۋ اۋدانىندا ورنالاسقان كوشەنىڭ بۇرىنعى اتاۋى - سەميپالاتينسك كوشەسى، ۇزىندىعى - 900 مەتر.
انتون ماكارەنكو كوشەسى – 24.02.1954 جىلى الماتى قالاسى اتقارۋ كوميتەتىنىڭ №5 شەشىمىمەن ۇلى پەداگوگ، جازۋشى، الەمدىك پەداگوگيكا تاريحىندا وزىندىك ورنى بار كەڭەس داۋىرىندەگى پەداگوگيكا كلاسسيگى انتون سەمەنوۆيچ ماكارەنكونىڭ ەسىمى بەرىلدى. جەتىسۋ اۋدانىندا ورنالاسقان كوشەنىڭ ۇزىندىعى - 650 مەتر.
بۇل اتاۋلار – ۇستازداردىڭ ەڭبەگىنە تاعزىم ەتۋدىڭ، ولاردىڭ ءبىلىم سالاسىنا قوسقان ۇلەسىن ۇلىقتاۋدىڭ ايعاعى. ۇستازدار اتىنا بەرىلگەن كوشەلەر – جاس ۇرپاققا ونەگە. بۇل ءداستۇر ارقىلى قوعام ۇستازدىڭ ءقادىرىن دارىپتەپ، «ءبىلىم – باستى قۇندىلىق» ەكەنىن ۇمىتتىرمايدى. ءاربىر كوشە تاقتايشاسىندا جازىلعان ەسىم – تاريحتان تاعىلىم، بولاشاققا باعدار.